MAAK 9

1Ka o yeli ba ye, “Sida ka m yeti ya ye, nin sieba be ya soogin kpe' ka ku kpii, asee ba ti nye Wina'am na'am n sigid na ne kpi'euŋ tita'ar.” 2Ka daba ayuobu daar ka Yesu dol Piita ne Jemes ne Joon n keŋ du zuetita'ar zug ban ma'aa. Ka Yesu tiak. 3Ka o fuud nyeen pil pil ka a pielig farr. So' kae' dunia nwa ni na pie ka li yi ka pelig alaa. 4Ka o nya'andolib la nye Elija ne Moses ka ba nie ani, ka pian' ne Yesu. 5Ka Piita yel Yesu ye “Pa'ana, li a su'um ka ti be kpela. Kel ka ti ti'ig suga atan', n tis fun yinni ne Moses yinni ne Elija yinni.” 6Dabiem daa kpen'e ba hale ka Piita zi' on na yel si'ela. 7Ka saŋgbauŋ ma'asim kena ligili ba. Ka kukor yi saŋgbauŋ la ni na yel ye, “Oŋa a mam binoŋir. Kelisimne o pian'ad.” 8Ka ba gos kii n gilig, ka pu nye so' ya'asa, ka Yesu ma'aa be ne ba. 9Ban naam zuerin n sigid na la ka Yesu yeli ba ye, “Mit ka ya yel so' yanam nye si'el la. Ba kel ka Ninsaal Biig la naan ti vu'ug kumin na.” 10Ka ba siak on yel si'el la, ka lee bu'osid taaba ye “Vu'ug kumin la gbin a bo?” 11Ka ba bu'os Yesu ye, “Bo ka gbauŋmi'idib yel ye Elija na kenn yiiga na?” 12Ka o lebisi ba ye, “Sida Elija na kenn yiiga na maal si'el wusa. Ka bo ka li sob Wina'am gbauŋin ye, Ninsaal Biig na namis bedego hale ka ba ne'es oo? 13Amaa m yeti ya ne ye Elija pun kena. Ka nidib niŋ o ban bood si'em. Ka li a wuu ban da sob Wina'am gbauŋin o yela si'em la.” 14Ka ba leb o nya'andolib bane daa kpelim la sa'an, ka nye nidib bedego ka ba giligi ba. Ka gbauŋmi'idib sieba nwa'asid ne o nya'andolib la. 15Nidib la n daa nye Yesu la ka li lidigi ba. Ka ba zo pu'us o. 16Ka o bu'os o nya'andolib la ye, “Ya nwa'asid bo yela?” 17Ka nidib la yinni lebis ye, “Pa'ana, m biig ka kikirig dol o, ka o gigilim, din ka m dol o na. 18Ka kikirig la ya'a yiti du o, li lubid o ne, ka nintopuud yit, ka o ga'ad nyina, ka tienn o meŋe a gamire. Din la ka m mor o na belim fu nya'andolib la ye ba kad kikirig la bas, ka ba pu nyaŋe.” 19“Oo, zumaaŋ kane nidibi pu niŋid yadda, m na be ne ya daba ala? Ya bood ye m modigne ya hale paae saŋa wala? More biig la na.” 20Ka ba mor o na. Ka kikirig la kpen nye Yesu la, ka lub biig la. Ka o bilim ka nintopuud yit o noorin. 21Ka Yesu bu'os biig la saam ye, “Kikirig la dol o la, li yuugi ya?” Ka o lebis ye, “O biilimin sa. 22Li yiti lub o bugumin bee ku'omin ye li kuu o. Fu ya'a na nyaŋe suŋi ti fun zo m nimbaanlig ka suŋi ti.” 23Ka Yesu lebis ye, “Si'el mekama pu toe tis one niŋ Wina'am yadda.” 24Ka biig la saam tans ye, “M niŋ yadda amaa paasi m yadda ka li poodne.” 25Ka Yesu n nye ka nidib la'ased o sa'an la, ka o tans kikirig la ye, “Kikirig on a gik ne tobkpida la, yim ka bas biis la, ka da lem dol o ya'asa.” 26Ka kikirig la kaas kuŋ, ka lub biig la teŋin be'ed be'ede ka naan yi. Ka biig la wenne ku'um. Ka nidib la bedego yel ye, “O kpine.” 27Ka Yesu gban' o nu'ug, du o, ka o zi'e. 28Ka Yesu kpen' yin. Ka o nya'andolib la ba kon'o kon' kena n bu'os o ye, “Bo ka ti pa'a pu nyaŋe kad kikirig la yiise?” 29Ka o lebis ye, “Ya'a ka' Wina'am sosugo, si'el kae' na nyaŋe kad bama yiise.” 30Ka ba bas zin'ikan ka buŋ Galilee n gaad. On daa pa'an o nya'andolib la ke ka o daa pu bood ye so' baŋ on be si'ela. 31Ka o yeli ba ye, “Ba na zam Ninsaal Biig la n zaŋ o niŋ nidib nu'usin. Ka ba na kuu o. Amaa li daba atan' daar o na vu'ug kumin.” 32Ba da pu gban'e pa'alug kaŋa gbin ne, ka zot dabiem ne ban na bu'os o. 33Ka ba keŋ n paae Kapeenum, n kpen' yin. Ka Yesu bu'os o nya'andolib la ye, “Bozug ka ya pa'a nwa'asid sueren la?” 34Ka ba sin, bozugo ba pa'a nwa'asidne taaba one na a kpeenm ba soogin. 35Ka Yesu zin'in ka buol o nya'andolib piinayi la, ka yeli ba ye, “One bood ye o a kpeenm, on nokimi o meŋi lieb biig, ka a so' wusa tumtum.” 36Ka o nok bibil n zi'eli ba soogin, ka nok o nu'us kuak o, ka yeli ba ye, 37“On mekama di'e bikaŋa tiraan mam yu'ur zug, o di'ene mam meŋ, ka on mekama di'e mam meŋ, pu di'e mam ma'aa nee, amaa o di'ene one tumi m la na.” 38Ka Joon yel o ye, “Pa'ana, tinam daa nye dau ka o more fu yu'ur n kat kikiris ka on ka'a ti dolim taa la zug ka ti yel o ye o basim.” 39Ka Yesu yeli ba ye, “Da kat o, bozugo one tum tuumnyalima man yu'ur zug, ku nyaŋe pian' be'ed m yela li nya'aŋa. 40One pu zan'asi ti, di'e ti ne. 41Asida ka m yeti ya ye, on wusa tisi ya ku'om, ka ya nu mam yu'ur zug, yaname a Kiristo nidib la yela, on daana ku ko'oŋ o nyoode. 42“One ke ka bibibis bama nwa yinni one niŋim yadda la tum tuumbe'ed. Ba ya'a pun nok neer tita'ar lo o niŋgoonr ka lobin o basin mo'arin son'e. 43Ka fu nu'ug ya'a ke ka fu tum tuumbe'ed, fun fi'igimi li bas, bozugo li a su'um ka fu kpen' arazana ka voe ne nu'uyeuŋ, n gat fun na mor nu'us ayi ka kpen'e bugum teŋin ka li dit ka pu kpiisida. 45Ka fu nobir ya'a ke ka fu tum tuumbe'ed, fun fi'igimi li bas, bozugo li a su'um ka fu kpen' arazana ka voe ne nobyeuŋ, n gat fun na mor noba ayi ka ba nok uf lob bas bugum teŋ. 46Anina ka ba ku kpii ka bugum la pu kpiisida. 47Ka fu nif ya'a ke ka fu tum tuumbe'ed, fun kpidigimi li bas, bozugo li a su'um ka fu kpen' Wina'am so'olim ne nifyeuŋ n gat fun na mor nini ayi ka ba lob uf bas bugum teŋ. 48Anina ka zunzunya be ka pu kpiida, ka bugum pu kpiisida. 49Ba na nok bugum yugus nidib wusa wenne yaarum ne. 50“Yaarum a su'um, amaa yaarum mimilim ya'a yi, so' na niŋ wala maali li mimilugo? More yaarum ya ni ka mor sumalisim ne taaba.”

will be added

X\