MAAK 8

1Saŋkan la ka nidib bedego lem kena la'as. Ka diib da kae' ka ba na dii. Ka Yesu buol o nya'andolib la, ka yeli ba ye, 2“Nidib nwa mor nimbaanlig bozugo li paae daba atan' ka ba be m sa'an ka pu dii. 3Ba sieba yine teŋ lalle na, ka m ya'a pu tisi ba diibo ka ba kul ala, bam na ti vip ko'om sueren.” 4Ka o nya'andolib la bu'os o ye, “Ba na nye diib yaani n diis nimbama zan'asa moogin kpe'?” 5Ka o lebisi bu'osi ba ye, “Ya mor bodobodo gbila ala?” Ka ba lebis ye, “Ayopoi.” 6Ka o yel nidib la ye, ba zin'inim teŋin. Ka o zaŋ bodobodo gbila ayopoi la ka pu'us Wina'am bareka, ka gben'esi li tis o nya'andolib la ka ye ba pudug nidib la. Ka ba pudug. 7Ka ba daa mor zimbibis bi'ela. Ka Yesu pu'us Wina'am bareka, ka yel o nya'andolib la ye, ba nokim pudug n tis nidib la men. 8Nidib la daa di tig. Ka o nya'andolib la vaae dikane kpelim la, ka li pe'el peed ayopoi. 9Ba daa ane wuu nidib tusa anaasi, ka o basi ba ka ba kul. 10Ka on ne o nya'andolib la kpen' aaruŋ keŋ Dalmanuta teŋin. 11Ka Farisee dim sieba kena ye ba kpans Yesu, ka bood ye o maal bunnyalima line sid yi Wina'am sa'an na. 12Ka Yesu si'im hale, ka bu'os ye, “Bo ka zumaaŋ kaŋa nidib bood ye ba nye bunnyalima? Sida ka m yeti ya ye, zumaaŋ kaŋa ku nye bunnyalimaa.” 13Ka basi ba ka lem keŋ kpen' aaruŋ la keŋ lo'oŋ beuŋ la. 14Ka o nya'andolib la da tam ka pu mor bodobodo aaruŋinee. Ba da more yinni ma'aa. 15Ka Yesu sa'ali ba ye, “Gu'usimi Farisee dim ne Herod dabin la.” 16Ka ba pian'ade tisid taaba ye, “Tiname pu mor bodobodo la zug ka o yel ala.” 17Yesu daa baŋ ban pian'ad si'el la yela, ka bu'osi ba ye, “Bo ka ya pian'ad yaname pu mor bodobodo la yela? Ya nam pu baŋne bee ya pu gban'ene li gbin ne? Ya ya'am pu tumaa? 18Ya mor nini, ka pu nyeta? Ka mor toba, ka pu wuma? Ya pu tenra? 19Man daa gben'es bodobodo gbila anu tis nidib tusa anu la, ya daa vaae bodobodo line kpelim la pe'el peed ala?” Ka ba lebis ye, “Peed piinayi.” 20Ka o bu'os ye, “Man daa nok bodobodo ayopoi n pudug nidib tusa anaasi la, peed ala ka ya daa vaae?” Ka ba lebis ye, “Peed ayopoi.” 21Ka o bu'osi ba ye, “Ya nam kpelim pu gban'e li gbin ne?” 22Ka ba paae Besaida. Ka nidib mor zunzoŋ n kena belim Yesu ye o si'is o. 23Ka Yesu ve' o yi kpeŋ ka tubis nintoond niŋ dau la nini, ka nok o nu'us pa'al o zug, ka bu'os o ye, “Fu tun'e nyet si'ela?” 24Ka dau la due o zug ka ye, “M nyet nidib ka ba wenne tiisne ka lee ken.” 25Ka o lem nok o nu'us pa'al o nini. Ka dau la gos kii. Ka o nini lak. Ka o nyet si'el mekama su'uŋa. 26Ka Yesu yel o ye, “Da leb teŋ poogin laa, amaa kulim.” 27Ka Yesu ne o nya'andolib la keŋ Sizerea teens n be Filipi so'olim. Ka o bu'osi ba sueren ye, “Nidib yet ye mam aa ano'one?” 28Ka ba lebis ye, “Sieba yet ye, fu ane Joon on daa suud nidib ku'om la. Ka sieba ye, fu ane Elija. Ka bam ye, fu ane Wina'am nodi'esidib yinni.” 29Ka o bu'osi ba ye, “Ka yanam ye mam aa ano'one?” Ka Piita lebis ye, “Fu ane Kiristo la, one ka Wina'am gaŋ ye o faaenn o nidib la.” 30Ka Yesu yeli ba ye, “Mit ka ya yel so' m yela.” 31Ka Yesu pin'ili pa'al o nya'andolib la ye, “Asee Ninsaal Biig la namis bedego ka teŋin kpeenmnam ne Jew dim maalmaan kpeenmnam ne gbauŋmi'idib zan'as o, ka ku o. Amaa o na vu'ug li daba atan' daar.” 32O yel ala pa'ali ba nyain. Ka Piita dol o yi kpeŋ, ka yel ye, o da yet alaa. 33Ka Yesu gi'e gos o nya'andolib la ka yel Piita ye, “Lemim nya'aŋ sa, Sutaana. Fu ten'esug ane ninsaal poten'er ka ka' Wina'am dinne.” 34Ka buol nidib la ne o nya'andolib la la'as, ka yeli ba ye, “So' ya'a bood ye o dol mam, asee o ki'is o meŋ yela, ka nok o ku'um dapuudir ze ka dol man. 35On mekama bood ye o gu'u o nyovur, o nyovur la na bodig. Amaa on mekama n bas o nyovur man zug ne labasuŋ la yela, na nye o nyovur. 36Nid ya'a nye dunia nwa la'ad wusa ka pu nye nyovure o nyood a bo? 37Si'el kae' ka nid na zaŋ n tiak o nyovure. 38So' ya'a zo nyan ne man ne m pa'alug la zumaaŋ nwa, dine a po'asa'uŋ ne tuumbe'ed la, Ninsaal Biig la me na zo on daana nyan saŋkane ka o na ti leb na ne o Ba' Wina'am na'am ne malek soma la.”

will be added

X\