1 Farisee dim ne gbauŋmi'idib sieba bane yi Jerusalem ni na la la'ase gilig Yesu, 2 ka nye ka o nya'andolib la sieba dit ne nu'udian'ad, ka pu pie ka li a wuu Farisee dim yiti pie si'em ka nyaan n di laa. 3 Farisee dim la'am ne Jew dim wusa ku di diibo, asee ba pie ba nu'us wuu ba yaanam malima poogin pa'an si'em la. 4 Hale ba ya'a yi da'an na ba ku di diibo asee ba pie ba nu'us. Ba me dol malim sieba dine a ye ba pie nwama ne yoya ne kunt dugud. 5 Ka Farisee dim ne gbauŋmi'idib bu'os Yesu ye, “Bo ka fu nya'andolib la pu dol ti yaanam malima, ka dit ne nu'udian'ade?” 6 Ka Yesu lebisi ba ye, “Azaya n da di'e Wina'am pian'ad n tis nidib la, ka li a yel sida yanam zamdim la yela wuu lin sob si'em la, ye, ‘Nimbama nwa zun'od mam ne ba noŋgban pian'ad ka ba sunya lee lal ne mam. 7 Ban n zun'od man la ane zaalim; bozugo ba pa'alug ane ninsaalib din ka ba niŋidi li wenne Wina'am pa'alug.’ 8 Ya nok Wina'am noor yelug n bas ka dol ninsaalib malima” 9 Ka Yesu yeli ba ye, “Ya zan'as Wina'am noor yelug ka lee siaki dol ya meŋ malima. 10 Ka Moses da yel ye, ‘Na'asim fu ba' ne fu ma.’ Ka lem yel ye, ‘Nid ya'a tu o ba' bee o ma, asee ba ku o.’ 11 Ya pa'an ye, ninkane mor bunsuma na nok n suŋ o ba' bee o ma, amaa o ya'a yel ye, ‘Bun la ane Kooban’ (li gbin ane Wina'am bun,) 12 li ka'a tilas ye o zaŋi li suŋ o ba' ne o ma ya'ase. 13 Ne'e yela ka ya dol ya meŋ malima ka gos Wina'am noor yelug ka li a zaalim. Ya niŋid si'elnam bedego n wenne ala.” 14 Ka Yesu buol nidib la ya'as, ka yeli ba ye, “Kelisimi, ka gban'e li gbin. 15 Si'el kae' kpen'ed ninsaal ni ket ka o a dian'ad daana. Amaa dine yit ninsaal ni na ke ka o a dian'ad daan. 16 One mor toba on wum.” 17 Ka o yi nidib la sa'an n kpen' yin. Ka o nya'andolib la bu'os o siiliŋ la gbin. 18 Ka o lebisi bu'osi ba ye, “Ya pu gban'e li gbin ne? Ya ka' ya'am na gban'e m pa'alug la gbin wuu bama la bee? Si'el kae' na kpen' ninsaal ni sid ke ka o a dian'ad daana. 19 Li na kpen' o poogin ka yi o niŋgbina ni ka lee ku kpen' o sunfinee.” (On yel si'el la pa'al ye ba da gosid ye disieba more dian'ade, amaa diib wusa a su'um.) 20 Ka o yel ye, “Li ane dine yi ninsaal ni na ke ka o a dian'ad daan. 21 Ka poten'er be'ed ne po'asa'uŋ ne dausa'uŋ ne na'ayiigim ne ninkuudib ne 22 fufum ne bugusum ne dama'ar ne tuumbe'ed wusa ne yu'ur sa'uŋ ne tita'alim ne yalim tuuma, 23 bunbe'ed bama zan'asa yitne ninsaal sunfin na, ka ke ka o a dian'ad daan.” 24 Ka Yesu yi zin'ikan ka keŋ paae Taya teŋin, ka kpen' yin, ka pu bood ye so' baŋ ye o be anii. Amaa o da ku nyaŋe sua' o meŋa. 25 Ka po'a so' da be more o bipuŋ ka kikirig dol o. Ka o wum Yesu yela, ka keŋ igini o tuon. 26 Ka sos Yesu ye o kadim kikirig la yiisi o biig la ni. Po'a la da ane Greek dim buudi ka ba du'a o Fonisia teŋin line be Siriya so'olim la. 27 Ka Yesu lebis o ye, “Li pu su'um ye ba nok biis diib n tis baase, asee biis la di n tig yiiga.” 28 Ka po'a la lebis o ye, “Sida, m zugsoba, baas bane bee ba zugsob tuon la ditne biis dizora dine lut la.” 29 Ka Yesu yel o ye, “Fune lebis si'em la zug, kulim, ka kikirig la basi fu biig la.” 30 Ka po'a la lebi kul n paae nye ka o biig la dig. Ka kikirig la sid yi ka bas o. 31 Ka Yesu bas Taya teŋin ka doli yi Sidon ne Dekapolis teensin, ka lem lebi paae Galilee mo'arin. 32 Ka ba mor dau na ka o a tobkpida ka lem a gik. Ka ba belim Yesu ye o nok o nu'ug pa'al o zug. 33 Ka o mor o yi kukpeŋ ka nok o nu'ubibis tum o toba ni, ka tubis nintoond, ka si'is dau la zilim, 34 ka gos arazana ni, ka si'im, ka yel dau la ye, “Effata.” (Li gbin ane ye “yo'ogum.”) 35 Ka o toba la yo'og. Ka o zilim la me lak. Ka o pian'ad su'uŋa. 36 Ka Yesu yel nidib la ye ba da ke ka so' baŋi li yelaa. On daa yel ye ba da yel so' li yela la, ka nidib la kuduŋ kpelim mooni li. 37 Ka li lidigi ba hale ka ba ye, “O niŋid si'el mekama su'um, ka la'am maan ka tobkpida wum ka gigis pian'ad.”
