1 Yesu daa bas teŋ kan la ka keŋ o meŋ teŋin. Ka o nya'andolib la dol o. 2 Ka Jew dim vu'usum daar la ka o kpen' la'asug doogin n pin'ili pa'an. Ka li lidig nimbane wum o pa'alug la wusa. Ka ba bu'os taaba ye, “Dau kaŋa nye pa'alug kaŋa yaani? Ka o niŋ wala nye ya'am kaŋa? Ka niŋ wala me tum tuumnyalim bama? 3 O ka'ane dakpi'eda? O ka'ane Meeri biiga, ka Jemes ne Joses ne Judas ne Simon aa o pitiba? Ka o tanp pu be ne ti kpela?” Ka ba zan'as o ka pu bood o yela. 4 Ka o yeli ba ye, “Zin'ikan wusa ka Wina'am nodi'es keŋ, ba na'asid o, ka lee pu na'asid o, o teŋine la'am ne o yin ne o buudi ni.” 5 O daa pu nyaŋe tum tuumnyalima anina, ya'a ka ban'adnam bi'ela nwa ka o daa nok o nu'ug pa'ali ba zut, ka ba nye laafe. 6 Ban daa pu niŋ o yadda la zug, li daa lidig o hale. Ka Yesu keŋ teŋ kpemis bane kpi'e anina n pa'al nidib. 7 O daa buol o nya'andolib piinayi la n la'as, ka tumi ba ayi yi, ka tisi ba paŋ ka ba na kad kikiris. 8 O daa yeli ba ye, “Da mor diib bee kolug bee ligidi bee si'el si'ela, li ya'a ka'a duor ma'ane. 9 Pidim ta'ada ka ye fuug yinni ma'aa. 10 Ka ya ya'a paae teŋ si'a ka nimbane di'e ya ba yin, yanam be anina ka naan ti yi. 11 Zin'ikan wusa ka nidib pu di'e yaa, bee kelisidi ya pian'ade, yanam yi ka kpa'as ya noba titan bas anina. Din na pa'ali ba ye ba pu tum su'um.” 12 Ka nya'andolib la yi n keŋ pa'al nidib ye ba basimi ba tuumbe'ed. 13 Ka kad kikiris bedego n yiis ka nok kpaam bi'ela suenn ban'adnam bedego zut, ka ba nye laafe. 14 Yesu labaar la daa yadig teŋ kan wusa. Ka na'ab Herod wumi li. Sieba yel ye, “Joon one daa suud nidib ku'om la vu'ug kumin. Dine ke ka kpi'euŋ tuum bama tum o sa'an.” 15 Ka sieba ye, “O ane Elija.” Ka sieba ye, “O ane Wina'am nodi'es wuu Wina'am nodi'esidib bane da be kudim sa la.” 16 Na'ab Herod daa wum ala, ka yel ye, “O ane Joon, on ka m daa fi'ig o zug la lem vu'ug na.” 17 - 18 Linzug ka na'ab la daa ku Joon la ane anwa. Herod daa di o pitu Filip po'a, ka o yu'ur buon Herodias. Ka Joon yel o ye, “Li ka'a su'um ka fu di fu pitu po'a.” Ka po'a la kisig Joon on yel si'el la zug. Linzug ka Herod tum nidib ka ba gban'e Joon lo, ka yo o sarega ni. 19 Ka Herodias sunf due ne Joon, ka o bood ye o ku o ka gu'uŋ. 20 Herod daa zot Joon, bozugo o daa mi' ye o ane popielim sob ka me a sida sob, dina zug ka o daa bas o baanlim. O daa kelisid o pian'ad, hale ka li daamid o. Amaa la'am ne wala, o daa kpelim bood ye o kelis o pian'ad. 21 Ka li daa ti kena, ka Herod du'am dabisir paae. Ka o maal di'ema ka buol teŋin na'anam ne sogia kpeenmnam ne Galilee nimbeda. 22 Ka Herodias bipuŋ kpen'e wa'. Ka Herod ne saam la sunf ma'ae. Ka na'ab la bu'os bipuŋ la ye, “Fu bood bo ka m tisi fo?” 23 Ka po zi'el ye, “M na tis uf fun bood si'el wusa hale li ya'a a m so'olim pusuko.” 24 Ka bipuŋ la yi n ti bu'os o ma ye, “M yel o n di'e bo?” Ka o ma lebis ye, “Yelim ye fu boodne Joon one suud nidib ku'om la zug.” 25 Ka bipuŋ la kpen' to'oto yel na'ab la ye, “Mam bood ye fu nok Joon one suud nidib ku'om la zug n niŋ laan n tisi m nannanna.” 26 Ka na'ab la sunf sa'am hale, ka on po nidibin la zug ka o pu bood ye o moŋ oo. 27 Ka o tum sogia ye o keŋ mor Joon zug na. Ka o yi n keŋ sarega ni fi'ig o zug, 28 niŋ laan n mor na tis bipuŋ la. Ka o tis o ma. 29 Ka Joon nya'andolib wum, ka keŋ nok o niŋgbin la n mum. 30 Ka o Tumtumnib la leb na la'as taaba o sa'an, ka yel o bane daa niŋ ka pa'al si'el wusa. 31 Ka nidib bedego me be ani, ka sieba kenna, ka sieba lebid. Dinzug ka Yesu ne o nya'andolib pu nye ya'a n dii. Ka o yeli ba ye, “Keli ka ti yi paalo n keŋ zin'ikan ka nidib kae', ka ya vu'us bi'ela.” 32 Ka ban gullim yi kpen' aaruŋin keŋ zin'ikan ka nidib kae'. 33 Nidib bedego daa nye ban yit, ka baŋ ban a sieba, ka yi teŋ kan wusa n keŋ to'oto ne noba n deŋim paae Yesu ne o nya'andolib la yiiga. 34 Ka Yesu paae n yi aaruŋin, ka nye nidib bedego ka ba wenne pe'es bane ka'a pe'ekemma. Ka o zo ba nimbaanlig, ka pa'ali ba si'elnam bedego. 35 Lin ti kena sobid la, ka o nya'andolib la keŋ yel o ye, “Kpela ane moogin, ka li me sobid, 36 kel ka nidib la keŋ teŋ poogin ne ya' bane be ya'ama la n ti da'a diib n di.” 37 Ka o lebisi ba ye, “Yanam meŋ tisimi ba diib ka ba di.” Ka ba lebisi bu'os ye, “Ti keŋ da' bodobodo poŋ kobus ayi mora tisi ba ka ba onb bee?” 38 Ka Yesu lem bu'osi ba ye, “Ya mor bodobodo gbila ala? Kem gosi.” Ka ba keŋ gos, ka ye “Bodobodo gbila anu ne zimi ayi be.” 39 Ka Yesu yu'un yel o nya'andolib la ye ba kel ka nidib la zin'in moma'asa la zug gbila gbila ka ba pudugi tisi ba. 40 Sieba daa zin'in kobug kobug ka sieba zin'in piisnu nu. 41 Ka Yesu nok bodobodo la ne zimi la n gos arazana ni ka pu'us Wina'am bareka, ka gben'es bodobodo la n tis o nya'andoliba ye ba tis nidib la, ka nok zimi ayi la n gben'es n pudugi ba wusa. 42 Ka ba wusa onb n tig. 43 Ka o nya'andolib la vaae bodobodo ne zimi line kpelim la n pe'el peed piinayi. 44 Dap bane daa be anina n di diib la daa ane tusa anu. 45 To'oto yim ka Yesu ke ka o nya'andolib kpen' aaruŋ ye ba lo'oŋ beuŋ keŋ Besaida. Ka on kpelim ye o kees nidib la. 46 On keesi ba naae la, ka keŋ zueya ni ye o pu'us Wina'am. 47 Ka zaam ti kena ma'ae ka aaruŋ la be mo'atita'ar la soogin. Ka Yesu be goor o kon'o kon', 48 ka nye ka sisi'em da'ad bedego, ka o nya'andolib la pu tun'e n gaad aaruŋ laa. Ka beog ti yoe nier, ka o keŋ ne noba ku'om la zug n paae ba ni, ka ye o gaadi ba. 49 Ka ba wusa nye on ken ku'om la zug la, ka ten'es ye, “Li ane silinsiug.” 50 Ka dabiem kpen'e ba ka ba kaas kuŋ. To'oto yim ka o yeli ba ye, “More sukpi'euŋ ka li ane man. Da zoti dabiem!” 51 Ka kpen' aaruŋ la ka sisi'em la lebi fon' baanlim. Ka li lidigi ba, bozugo 52 ba sukpi'euŋ la zug ka ba pu baŋ bodobodo gbila la tum nyalima la gbin ne. 53 Ka ba lo'oŋ mo'ar la n paae Gennesaret teŋin ka lo aaruŋ la zi'el. 54 Ban daa kpen yi aaruŋin, ka nidib baŋ Yesu la, 55 ba keŋ to'oto gilig teŋ la wusa n ze ban'adnam n keŋ Yesu n be zin'isi'a la. 56 Ka o ya'a keŋ teŋ kpeŋ bee teŋ poogin bee yaan zin'isi'a, ba nokidne ban'adnam keŋ teŋ kan la da'an n digili ba, ka belim o ye o ke ka ban'adnam la kudum si'is o fuug noor. Ka bane wusa da si'is o fuug noor la nye laafe.
