MAAK 5

1Ka Yesu ne o nya'andolib kena paae Gerasene teŋin, Galilee beuŋ nya'aŋ. 2Ka Yesu yi aaruŋin la. Ka dau daa be yaadin ka yi na n tu'os o. 3Ka kikiris dol o. So' daa kae' na nyaŋe lo dau kaŋa hale ne kunte. 4Ba daa yiti nok bana lo o noba ne o nu'us. Ka o yiti kens nu'us bana ka kensi kens noba bana la n bas. So' daa ka' paŋ na nyaŋ oo. 5Nintaŋ ne yu'uŋ o yiti goond yaadin ne zueya la ni n nokid kuga nwe'edi o meŋ ka kpiid. 6O da pu lal saa, ka nye Yesu ka zo igin o tuon 7ka tans ye, “Yesu, Wina'am one ka' tiraan la Biiga, bo be man ne fu sisoogine? Wina'am su'um zug, m belim fu ne, ye fu da saansi ma.” 8Yesu daa pun yel ye, “Kikiriga yiim o sa'an.” Lina ke ka o yel ala. 9Ka Yesu bu'os o ye. “Fu yu'ure?” Ka dau la lebis ye, “M yu'ur buon Legion (li gbin a ye, bedego), tiname a bedego la zug.” 10Ka o nam kpelim belim Yesu ye o da kad kikiris la yiis teŋ kan la nii. 11Kukurnam bedego daa be zuer la baba n dit ka ba kal a wuu tusa ayi. 12Ka kikiris la belim ye, “Kel ka ti keŋ kukurnam la ni n ti kpen' ba ni.” 13Ka o siak ka ba keŋ. Ka kikiris la yi dau la ni ka dol kukurnam la. Ka ba wusa zo sig beuŋin ka ku'om dii ba. 14Dap bane daa gur kukurnam la daa zo keŋ teŋ poogin ne teŋ kpemis n tu'as line maal la wusa. Ka nidib keŋ ye ba gos line niŋ. 15Ban da paae Yesu sa'an la, ba da nye ka dau kane ka kikiris daa dol o la zin'i anina, ka ye fuud ka o ya'am tiake a su'um. Ka dabiem kpen' ba. 16Ka nimbane daa be anina ka nye line niŋ dau la ne kukurnam la tu'asi ba lin niŋ si'em wusa. 17Ka ba yu'un belim Yesu ye o yimi ba teŋin. 18Yesu n daa kpen'ed aaruŋin la, dau kane ka kikiris daa dol o la belim Yesu ye, “Kel ka m dol uf.” 19Ka Yesu pu siake, ka yel o ye, “Kulim, ka yel fu yidim ye, Zugsob zo fu nimbaanlig ka maal uf ka fu lieb su'uŋa.” 20Ka dau la leb, ka keŋ n gilig Dekapolis so'olim n moon Yesu niŋ bun suŋ line galis n tis o la. Ka li daa pak nimbane wusa daa wum ala la. 21Ka Yesu n lem lo'oŋ beuŋ guur ne aaruŋ la, nidib bedego daa la'as n gilig o beuŋ la noorin. 22Ka dau yinni one a la'asug doog kpeenm, ka o yu'ur buon Jairus kena. Ka one nye Yesu la o igin o tuon, 23ka yel o ye, “M po'ayua ben'edne bood ku'um, dinzugo kem na zaŋi fu nu'us si'is o, ka o nye laafe n tilig.” 24Ka Yesu dol o keŋ. Ka nidib bedego dol Yesu n gilig o n mik o. 25Ka po'a so' daa be nidib la soogin n lut sia ka li pu gu'oda hale yuma pii ne ayi. 26O daa nye namisug bedego tiimdim sa'an, hale ka sa'am on mor si'el wusa ka pu nye yolisim, ka li kpelim paasidne. 27Po'a la daa ti wum Yesu yela la, o daa kenn o sa'an na ka nidib galis hale ka po'a la mo n paae Yesu nya'aŋ n si'is o fuug. 28Ka mor poten'er ye, “Hale m ya'a si'is o fuug la, m na nye laafe.” 29On si'is fuug la, ka ziim la kpelim gu'e. Ka o baŋ o niŋgbina ni ye wiim la bas o, ka o nye laafe. 30Ka anina yim Yesu baŋ ye paŋ yii o ni tum si'el ka gi'e n gos nidib la gilig, ka bu'os ye, “Ano'one si'is m fuugo?” 31Ka o nya'andolib la lebis o ye, “Fun nye ka nidib bedego la'as n mik uf anwa, ka fu bu'osid ye, ano'one si'isi fo?” 32Ka Yesu gos n gilig ye o baŋ one niŋ ala. 33Amaa po'a la pun mi' line niŋ o la, o kena n kirid ne dabiem n igin Yesu tuon n tu'as o yelmeŋir la wusa. 34Ka Yesu yel o ye, “M po'ayua, fu yadda niŋir ke ka fu nye laafe. Kulim ne sumalisim, ka mor nimma'asim ka wiim la basiya.” 35Ka on nam kpeŋ pian'ad la, ka nidib yi Jairus one a Jew dim la'asug doog kpeenm la yin na n yel o ye, “Fu po'ayua la kpiya. Dinzugo bo ka fu ke ka pa'an la namisidi kenna ya'ase?” 36Ka Yesu pu kelis ban yel si'el la, ka yel Jew dim la'asug doog kpeenm la ye, “Da zot dabiem, niŋim yadda gullim.” 37Ka Yesu daa pu ke ka so' dol o, asee Piita ne Jemes ne Joon one a Jemes ba'abiig la. 38Ka ban paae Jew dim la'asug doog kpeenm yin la, o nye ka nidib bedego la'ase vuud ka kaasid, ka fabin hale. 39Ka on kpen' la, o yeli ba ye, “Bo so'e ka ya kum ka kaasida? Bipuŋ la pu kpii, amaa o gbisidne.” 40Ka ba la'ad o. Ka o yiis nidib la wusa, ka dol biig la ba' ne o ma ne o nya'andolib atan' la n kpen' bipuŋ la be zin'isi'a la. 41Ka o gban'e biig la nu'ug ka yel o ye, “Talita koum.” Li gbin ane ye, “Bipuŋbila, m yet uf ye, duom.” 42Ka bipuŋbil la kpelim due n keŋ. O da ane yuum piinayi. Ka ba lidig hale bedego. 43Amaa Yesu daa yeli ba ye, ba mit ka ba na yel so', ka yel ye, “Tisim biig la diib ka o di.”

will be added

X\