MAAK 4

1Yesu lem pin'il n pa'ani ba ya'as beuŋ noorin. Ka nidib bedego la'as o sa'an na. Ka o kpen' aaruŋin n zin'i beuŋ poogin. Ka nidib la zan'asa be beuŋ noorin. 2Ka o pa'ani ba yela bedego ne siilima. Ka o pa'alug la poogin o yeli ba ye, 3“Kelisimi, kpaad so' daa be n keŋ ye o waal o bunbuuda. 4Ka on waan la, bunbuud sieba lu suer zug. Ka niis kena n di. 5Ka sieba lu zin'ikan ka tan pu zu'e, ka a tampiins zut. Ka tan pu zu'e la zug ka li bul to'oto. 6Ka nintaŋi tulig la ka li ziank. Ka lin ka' nya'a la zug ka li zendig n kpi. 7Ka bunbuud sieba lu gon'os soogin. Ka gon'os la nobug n sianki ba. Ka ba pu wel biilii. 8Ka bunbuud sieba lu teŋsuŋ zug, ka bul n nobug, ka wel biili. Sieba wel piistan'. Sieba wel piisyuobu. Ka sieba wel kobug.” 9Ka Yesu yel ye, “One mor toba on wum.” 10Ka Yesu n ti yi kukpeŋ la, bane gilig o la ne o nya'andolib piinayi la bu'os o siilima la yela. 11Ka o yeli ba ye, “Yanam ane bane di'e Wina'am so'olim yelsua'ada la. Amaa bane be yiiŋ la wumne yela wusa ne siilima. 12Ka lin niŋne ye, ‘Ne gosug, ba na nye, ka ku baŋi. Ne wum, ba na wum, ka ku baŋ li gbin ne. Li ya'a ka' walaa, ba na lebi m sa'an na ka m yiisi ba tuumbe'ed n bas.’ ” 13Ka Yesu yeli ba ye, “Ya pu baŋ siiliŋ kaŋa gbinne? Ka ya na niŋ wala baŋ siilima la wusa? 14Kpaad kane waan bunbuuda la wenne wuu one moon Wina'am labaar la. 15Ka bane be sueren la, wenne wuu nid bane wum labaar la, ka Sutaana ken to'oto na yiis labaar la ba sunya ni bas. 16Ala men bane lu tampiing zugin la, wenne wuu bane wum labaar la ka siaki di'e li to'oto ne sumalisim. 17Amaa ban pu mor nya'a la zug, ba modigidne bi'ela, ka namisug ne mugusug ya'a paae ba labaar la yela, ba nyorigidne n basid. 18Ka sieba bane lu gon'os soogin nwa wenne bane wum labaar la, 19ka dunia boodim poten'er ne araza'as ya'amleog ne la'ad kon'ob kon'ob yela siank pian'ad la, ka li pu wel biilii. 20Amaa bane lu teŋsuŋ zug la, wenne bane wum labaar la, ka siaki li, ka wel biili, sieba wel piistan', sieba piisyuobu, sieba kobuga.” 21Ka Yesu bu'osi ba ye, “So' ya'a nyu'e fitla, o na pibil ne peog bee o na zi'el gadug teŋire? Ba ku zaŋe sun'ul si'el zugoo? 22Bozugo bun kane n sua' wusa na nie. Ka bun kane ka ba pibil, ba na pibig. 23Ninkane na wum, on wum.” 24Ka o yeli ba ye, “Gu'usimi ne yanam wum si'el la, bozugo ne bun line ka fu maki tis nidib la, ala men ka ba na maki lebis uf. Hale ka li gaad ala. 25Bozugo one mor la, ba na lem paas o. Ka one pu mor la, hale one mor si'el la, ba na di'e li.” 26Ka o yeli ba ye, “Wina'am so'olim wenne dau kane bud bunbuuda teŋin. 27Ka kpen' yu'uŋe gbisi yimbeogun due ka bunbuuda la bul ka nobug. Ka o zi' din niŋ si'em si'em. 28Tan la ke ka bunbuuda la duod li meŋ. Li busidne vaand yiiga, ka naan wel, ka biili bi'ig. 29Ka ki la ya'a bi'ig, kpaad la na zaŋ kusiig n kia li, bozugo bunib paaeya.” 30Ka Yesu yeli ba ye, “Bo ka m na zaŋi mak ne Wina'am so'olim, bee siiliŋ bo ka m na siilim? 31Li wen wuu zensi'a biilif, ka li yu'ur buon ye mustard. Li poode gat bunbuuda wusa dine be dunia ni. 32Amaa ba ya'a budi li, li nobugidne gat tiig buudi wusa ka ton' wilbeda. Ka niis na tun'e maal ba teed li ma'asim ni.” 33Yesu daa zaŋ siilima bedego wenne bama, tu'asi tisi ba wuu ban na nyaŋe baŋi li si'em la. 34O pu pa'ali ba si'el si'ela, asee ne siilima poogin gullim. Amaa o nya'andolib la gullim ka o tu'as li gbin n tisi ba. 35Daar kan la zaam ka Yesu yel o nya'andolib la ye, “Keli ka ti lo'oŋe beuŋ la gbeug.” 36Ka o nya'andolib la bas nidib la ka keŋ kpen' aaruŋ kane ka Yesu pun be la, ka ba keŋ. Aarum sieba me da dol. 37Ka sisi'etita'ar da'ad bedego na, ka ku'om la yeeŋid n kpen'ed aaruŋin la. Ka li pe'en ne ku'om. 38Ka Yesu dig aaruŋ la nya'aŋ n kuk zugkogor n gbisid. Ka o nya'andolib la nie o ka bu'os o ye, “Pa'ana, fu pu nye tinam bood ye ti kpi laa?” 39Ka o nie ka tans sisi'em la ka yel ku'opila la ye, “Gu'em, ka a baanlim.” Ka sisi'em la ne ku'opila kpelim gu'e baanlim. 40Ka o bu'osi ba ye, “Bo ka ya zot dabiem? Bo ka ya pu niŋi m yadda?” 41Ka dabiem daa kpen'e ba hale. Ka ba bu'os taaba ye, “Dau kaŋa a wala wala, hale ka sisi'em ne ku'om la'am siakidi o noore?”

will be added

X\