MAAK 3

1Ka Yesu leb Jew dim la'asug doogin la, ka dau be anina, ka o nu'ug kpi. 2Ka ninsieba n bood yela ye ba ziil Yesu la ka gosid o kii ye o na ti'eb ban'ad la vu'usum daar bee o ku ti'eb o. 3Ka Yesu yel dau kane ka o nu'ug kpi la ye, “Yim tuon na” 4Ka Yesu bu'os nidib la ye, “Li a su'um ti wada poogin ye ti suŋ nidib ka tum tuumsuma vu'usum daar la, bee ti ku nidib ka tum tuumbe'ede?” Ka ba sin. 5Ka o gos nidib la gilig ka o sunf due. Ka on nye ka ba a zugkpi'euŋ dim la, ka li ke ka o sunf sa'am. Ka o yel dau la ye, “Tienmi fu nu'ug la.” Ka o tienn. Ka li niŋ su'uŋa wuu nu'ug kaŋa la ne. 6Ka Farisee dim yi ka gban'e noor yinni ne Herod nidib la, ban na niŋ si'em n ku Yesu. 7Ka Yesu ne o nya'andolib yi keŋ Galilee beuŋin. Ka nidib bedego dol o. Nidib la da wum Yesu n tum tuum sieba ka yi Galilee ne Juuda 8ne Jerusalem ne Idumea ne Joodan mo'ar nya'aŋ ne teens bane kpi'e Taya ne Sidon n kenn Yesu sa'an na, 9ka ba yu'un la'ase zu'e bedego. Ka Yesu yel o nya'andolib la ye ba ti'ebim aaruŋ n gur o, ka nidib la da ti mik oo. 10O daa ti'eb ban'adnam bedego, ka sieba tusid taaba n bood ye ba paae si'is o. 11Ka nimbane ka kikiris doli ba ya'a nye o, ba lutne igini o tuon ka tans ye, “Fu ane Wina'am Biig.” 12Ka o yel kikiris la ye, ba mit ka ba na ke ka ba baŋ on a so'. 13Ka Yesu da keŋ zueya baba ka buol nimbane ka o bood, ka ba kena. 14Ka o gaŋ nidib piinayi ka buoli ba ye o Tumtumnib, ka o na tumi ba ka ba moon labasuŋ la, 15ka ba na mor kpi'euŋ na kat kikiris n yiisid. 16Ba yuda da a Simon on ka Yesu pud o yu'ur ye Piita, 17ne Zebedee biis Jemes ne Joon, ka o pudi ba yu'ur ye Boaneges. Li gbin ane nimbane wenne satansug ne, 18ne Andrew ne Filip ne Bartolomew ne Mateo ne Tomas ne Alfeus biig Jemes, ne Tadus, ne Simon one ka ba buon Zeelot ka li gbin a one zabid Jew dim yela la, 19ne Judas Iskariot one da zam Yesu la. 20Ka Yesu kul. Ka nidib la lem la'as bedego. Ka Yesu ne o nya'andolib la pu nye ya'a na dii. 21Ka nidib yel ye, “O geemne,” ka Yesu yidim wum ka keŋ ye ba gban' o. 22Ka gbauŋmi'idib sieba bane yi Jerusalem teŋ poogin kena yel ye, “Beelzebul dol o.” Ka sieba ye, “Li ane kikiris na'ab one tis o paŋ kan ka o more kad kikiris n yiisid la.” 23Ka Yesu buol nidib la la'as ka bu'osi ba ye, “Sutaana na nyaŋe kad Sutaana?” Ka yeli ba ne siilis ye, 24“Teŋ yinni ya'a pudug taaba ye ba zab, teŋ kan ku yuuge. 25Yir yinni dim ya'a zabid ne taaba yi kaŋa na nwa'. 26Ka Sutaananam ya'a mor weligir ne taaba, ba so'olim ku yuuge ka sa'am wusa. 27So' kae' na nyaŋe kpen' paŋ daan yin n vaae o la'ade, ya'a ka'a o deŋi lo paŋ daan la n digil ka nan vaae la'ad laa. 28Asida ka m yeti ya ye, Wina'am na nyaŋe tis ninsaal tuumbe'ed wusa suguru la'am ne o tu'ud wusa. 29Amaa so' ya'a tu'u Wina'am Siig Suŋ la, o daana ku paam suguru. O maal tuumbe'ed kane ka' suguru.” 30Ban yel ye kikirig dol o la zug ka o yel ala. 31Ka Yesu ma ne o pitib paae na ka zi'en samanin n tum buol o. 32Ka nidib bedego zin'i gilig o. Ka ba yel o ye, “Fu ma ne fu pitib be samanin ka buon uf.” 33Ka Yesu bu'osi ba ye, “Ano'one a m ma, ka ano'onam aa m pitiba?” 34Ka gosi nimbane zin'i la gilig, ka yeli ba ye, “Bama aa m ma ne m pitib. 35Ninkane tum Wina'am boodim, on a m pitu ne m taunn ne m ma.”

will be added

X\