MAAK 2

1Ka dabisa bi'ela nya'aŋ ka Yesu leb Kapeenum. Ka ba wum o labaar ye o be yin la. 2Ka nidib bedego la'as na n galis, hale ka paalo kae' ka nidib na kpen' ya'asa, ka za'anoor la muk. Ka o pa'ali ba Wina'am labasuŋ la. 3Ka nidib anaasi ze dau so' one ben' hale ti pon'olim n kenn o sa'an na. 4Ka nidib la la'ase zu'e ka ba ku tun'e paae Yesu sa'an na la zug, ka ba du dokan ka Yesu daa be la n maal voonr ka sigis ban'ad la digil o tuon. O daa digne debir zug. 5Ka Yesu nye ban niŋ o yadda si'em la, ka yel ban'ad la ye, “M dapaala, m yiisi fu tuumbe'ed la bas.” 6Ka gbauŋmi'idib sieba, bane pa'an nidib Wina'am noor yelug la, zi'e ani n ten'esidi ba sunya ni ye, 7“Bo ka dau kaŋa pian'ad ala n sa'amid Wina'am yu'ure? Ano'on na tun'e n yiis tuumbe'ed n basi, ka li ya'a ka'ane Wina'am gullimne?” 8Ka Yesu baŋ o poten'erin sa ye ba ten'esid ala, ka yeli ba ye, “Bo ka ya ten'esid ala? 9Line a na'ana ye m yel n tis pon'or la? Man na yel ye, ‘Fu tuumbe'ed yim ka bas uf,’ bee man na yel ye, ‘Duom ka zaŋ fu debire keŋe?’ 10Ala ka ya na baŋ ye Ninsaal Biig mor paŋ dunia nwa ni ye o yiis tuumbe'ed n bas.” Ka o yel pon'or la ye, 11“Duom n zaŋi fu debir la n kul.” 12Ka pon'or la kpelim due n zaŋ o debir n gaad ba tuon n yi. Lina nwa lidigi ba wusa, ka ba du'os Wina'am yu'ur su'uŋa n yet ye, “Ti nan zi' nye nwa.” 13Ka Yesu lem keŋ Galilee beuŋ noorin ya'as. Ka nidib bedego la'as o sa'an na. Ka o pa'ali ba anina. 14Ka one gat la, o nye Alfeus biribiŋ Levi, ka o zin'i lampo doogin la. Ka Yesu yel o ye, “Duom na doli m.” Ka o due n dol o. 15Ka Yesu zin'i Levi yin n dit, ka lampodi'esidib ne tuumbe'ed dim bedego la'am dit ne Yesu ne o nya'andolib, bozugo ba bedego yiti dol o. 16Ka gbauŋmi'idib ne Farisee dim n nye Yesu ka o dit ne lampodi'esidib ne tuumbe'ed dim la, ka ba bu'os o nya'andolib la ye, “Bo ka o dit ne lampodi'esidib ne tuumbe'ed dima?” 17Ka Yesu n wum li la, ka yeli ba ye, “Bane mor laafe la pu bood ti'ebugo. Amaa bane ben'ed n bood ti'ebug. M pu kena ye m buol tuumsuma dima, amaa bane a tuumbe'ed dim la.” 18Ka Joon nya'andolib ne Farisee dim da lood noor. Ka nidib kena n bu'os Yesu ye, “Bo ka Joon nya'andolib ne Farisee dim nya'andolib lood noor, ka fun nya'andolib pu lood noore?” 19Ka Yesu lebis n bu'osi ba ye, “Po'apaal sid zuanam na tun'e lo noor, ka po'apaal sid la kpelim be ba sa'anee? Ayei. Po'apaal sid la kpelim n be ba sa'an la, ba ku tun'e lood noore. 20Saŋa na ti paae, ka nidib na kena n yiis po'apaal sid la ba sa'an, ka din saŋa ka ba yu'uŋ na lo noor. 21“Nid ku zaŋ pien paalig n lig fukudugo. O ya'a niŋ ala, pien paalig la na ke ka fukudug la aaenn n gaad kudum la. 22Nid ku zaŋ dapaalig n su waa kuduginee. O ya'a niŋ ala, dapaalig la na ke ka waa la tans, ka daam ne waa la wusa sa'am. Amaa li su'um ye dapaal n sune waa paaligin.” 23Ka Jew dim vu'usum daar yinni, ka Yesu daa buŋid pood soogin. Ka ban ken la, o nya'andolib pin'il n gisid ki. 24Ka Farisee dim bu'os o ye, “Gosima, bo ka ba maan line kis vu'usum daare?” 25Ka Yesu lebis n bu'osi ba ye, “Yanam pu karem David ne o nidibi daa niŋ si'em ko'om daa more ba ka li paki ba laa? 26O da kpen' Wina'am doogin saŋkan ka Abiata a Wina'am maalmaan kpeenm la, ka onb Wina'am doogin bodobodo line pu su'um ye nidib onbid yoog yoogo, asee Wina'am maalmaanib gullim. Hale ka o tis nimbane be o sa'an la men.” 27Ka Yesu yeli ba ye, “Wina'am maal vu'usum daar ne ninsaalib zug, ka ka' ye o maal ninsaalib ne vu'usum daar zugo. 28Ala zug, Ninsaal Biig la a Zugsob ka la'am so'e vu'usum daar la.”

will be added

X\