MAAK 16

1Ka Jew dim vu'usum daar gaad, ka Meeri one yi Magdala ne Jemes ma Meeri, ne Salome da' si'elnam dine nyuusid wenne tudaare ne, ye ba keŋ misig Yesu niŋgbiŋ la. 2Ka Alasidaar bekenkeung, ka ban ken yaugin la, 3ka bu'os taaba sueren ye, “Ano'one na bilig kugir la yaug la noorin n tisi ti?” Bozugo kugir la a kugtita'ar. 4Ka ba godig gos ka kugir la pun bilig sa. 5Ka ba kpen' yaugin la, ka nye dasaŋ, ka o ye' fupielig n zin'i datiuŋ. Ka li lidigi ba. 6Ka o yeli ba ye, “Da ke ka li lidigi yaa. M mi' ye ya iedne Yesu one yi Nazaret na la, on ka ba daa kpa' dapuudir zug la. O vu'ug kumin ka ka'a kpee'. Gosim zin'ikan ka ba daa digil o la, o ka'a aninaa. 7Kem ti yel o nya'andolib la ne Piita ye, ‘O na deŋi ya tuon n keŋ Galilee. Ani ka ya na nye o, wuu on daa yeli ya si'em la.’ ” 8Li daa lidigi ba, ka dabiem kpen'e ba. Ka ba zoo yi yaugin la, ka pu yel so' si'ela. 9Yesu daa vu'ug kumin, ka Alasidaar bekenkeung, o nie o meŋ pa'al Meeri one yi Magdala yiiga, on ka o daa kad kikiris ayopoi o ni la. 10Ka o keŋ yel nimbane daa dol Yesu la. Ka ba fabin ka kaasid. 11Ban daa wum ye Yesu vu'ugiya la, ka Meeri one yi Magdala nye o la, ba daa pu siaki lii. 12Lin nya'aŋ ka Yesu tiak o meŋ ka nie pa'al nidib ayi bane ken teŋkpeŋ la. 13Ka ba leb yeli ba taaba sieba. Ka ba pu siaki lii. 14Lin nya'aŋ, ka o nya'andolib piinayinni la daa dit, ka o nie o meŋ pa'ali ba. Ka zab ne ba, ban daa pu niŋ yadda, ka maal zukpi'euŋi pu siak bane daa nye o ka o voe la pian'ad la. 15Ka yeli ba ye, “Kemi dunia zin'ig wusa ka mool labasuŋ la tis nidib wusa. 16Ka on mekama niŋ yadda, ka di'e Wina'am ku'om suub na nye faangir. Amaa on wusa pu niŋ yadda Wina'am na koosi o yela be'ed. 17Bane niŋ yadda na nyaŋe tum tuumnyalim bama. Ba na kat kikiris bas m yu'ur zug, ka na pian'ad pian'azuna. 18Ba na gban'e wiigi bee nu yabid ka li ku niŋi ba si'ela. Ba na noki ba nu'us pa'al ban'adnam zut, ka ba nye laafe.” 19Ka Zugsob Yesu daa tu'asi ba naae la, ka Wina'am zank o keŋ arazana ni. Ka o zin'in o datiuŋ. 20Ka o nya'andolib la keŋ mool labasuŋ la zin'is wusa. Ka Zugsob la tum ne ba, ka ke ka ba tum tuumnyalima ka li pa'al ye ba moolug la a sida.

will be added

X\