MAAK 15

1Ka beug nie la, ka Wina'am maalmaan kpeenmnam la ne teŋ la kpeenmnam ne gbauŋmi'idib ne nimbane daa la'am be la'asug la poogin la, ye ba gban'e noor yinni. Ka ba lo Yesu ne nwiis n mor o keŋ Pilate sa'an. 2Ka Pilate bu'os Yesu ye, “Fune a Jew dim na'ab laa?” Ka o lebis ye, “Fune yel ala.” 3Ka maalmaan kpeenmnam nok yela bedego ziil o. 4Ka Pilate lem bu'os Yesu ya'as ye, “Fu ku lebis si'elaa? Gosim yel bama wusa ka ba ziil fu nwa.” 5La'am ne wala Yesu pu lebis si'ela. Ka li lidig Pilate. 6Ku'um malek gaadug maluŋ tienr saŋa wusa, Pilate daa yiti yiis sarega nid yinni, one ka nidib la bood. 7Saŋkan la nid yinni daa be sarega ni ka o yu'ur buon Barabbas. On ne ninsieba da la'as taaba dam teŋ, ka ku nid, ala zug ka ba gban'e ba. 8Ka nidib bedego due kenn Pilate sa'an n sos o ye, “Niŋim wenne fun yiti niŋid si'em la tisi ti.” 9Ka o bu'osi ba ye, “Ya bood ye m yiis Jew dim na'ab la n tisi ya?” 10Bozugo o baŋ ye li ane nennim zug ka ba gban' o na. 11Amaa maalmaan kpeenmnam ke ka nidib bedego yel Pilate ye, “Yiisim Barabbas n tisi ti, ka ke Yesu.” 12Ka Pilate lem bu'osi ba ya'as ye, “Dinzugo m na niŋ dau kane ka ya buon Jew dim na'ab la wala?” 13Ka ba tans ye, “Kpa'am o n tabil dapuudir zug.” 14Ka Pilate bu'osi ba ye, “O niŋ bo ka li a tuumbe'ede?” Ka ba kpelim tansid n paasid ye, “Kpa'am o n tabil dapuudir zug.” 15Ka Pilate n bood ye o niŋ line na malis nidib la sunya la zug ka o yiis Barabbas n tisi ba. Ka o ke ka ba fieb Yesu, ka tisi ba noor ye ba kpa' o n tabil dapuudir zug. 16Ka sogianam mor Yesu n kpen' gomena la zakin, ka buol sogianam bane kpelim, ka ba wusa la'as. 17Ka ba nok fuzen'ug n yeel o, ka nok gon'os wug na'am zugpibig n pid o. 18Ka ba pin'il n pu'usid o, ka yet ye, “Naa, Jew dim na'aba.” 19Ka ba zaŋ balaar nwe' o zug, ka tubis nintoond mad o, ka igin o tuon. 20Ka bane yaal o naae la, ba pidig fuug kane ka ba noki yeel o la ka lebis o meŋ fuud n yeel o. Ka mor o yi ye ba ti kpa' o n tabil dapuudir zug. 21Dau so' daa be ka o yu'ur buon Simon, o yine Sairene teŋin. Ka o biis daa a Alekizanda ne Rifus la. O daa yi teŋkpeŋ n ken teŋpoogin. On ka ba mugus ye o ze Yesu ku'um dapuudir la. 22Ka ba mor Yesu keŋ zin'ig kane ka ba buon Golgota, li gbin ane zugwauŋ zin'ig. 23Ka ba tis o daam. Ka li gendig ne mir. Ka o zan'as nuub. 24Ka ba kpa' o n tabil dapuudir zug. Ka ba pudug o fuud la, ka bugulum ye ba baŋ one na di'e fusi'a. 25Li daa ane beegun, karef awai saŋa, ka ba kpa' o. 26Dine ka ba sob tabil o ku'um dapuudir zugin la ane, “Jew dim Na'ab." 27Ka ba me kpa' na'ayiis ayi paas o zug. Ka yinni be o datiuŋ. Ka yinni me be o dagobug. 28Ka Wina'am gbauŋ yelug la niŋ ameŋa ye, “Ba gelig o n paas tuumbe'ed dim la.” 29Ka bane gat wusa tu'ud o ka giridi ba zut ka yet ye, “Ahaa, fune yet ye, fu na nwa'e Wina'am pu'usum yir la, ka lem me' li dabsuma atan' poogin la. 30Tiligimi fu meŋ, ka sigi dapuudir la zug na.” 31Ala men ka maalmaan kpeenmnam ne gbauŋmi'idib la me po'og o n yet taaba ye, “O daa tilig sieba, ka ku nyaŋ tilig o meŋa. 32Fu ya'a ane Kiristo la, Israel dim na'ab la, fun sigim dapuudir la zugin na nannanna, ka ti nye ka siak.” Ka bane ka ba la'am kpa' ne o n tabil dapuuda zug la, me tu'u o. 33Ka line ti paae nintaŋ soog la, zin'ig wusa daa sobug, hale ti paae nintaŋ gbeligir. 34Saŋkan ka Yesu tans ne kukotita'ar ye, “Eloi, Eloi lama sabaktani.” Li gbin ane, “M Wina'am, m Wina'am bozug ka fu basi ma?” 35Ka bane zi'e ani la sieba, wum li, ka ye, “Gosimi. O buoni Elija.” 36Dau yinni keŋ zaŋ sooso n los danmi'isugin n niŋ kikan'ar zug ziank n tis o ye, o num, ka yet ye, “Guri ka ke ka ti gos ye Elija na kena n sigis oo.” 37Ka Yesu tans ne kukotita'ar ya'as ka nyaan kpi. 38Ka fuug line beŋ Wina'am pu'usum yin la buak zugin hale ti paae teŋin zin'isa ayi. 39Ka sogia kpeenm one zi'e Yesu tuon la, nye on kpi si'em la, o yel ye, “Li ane ameŋa ye dau nwa sid ane Wina'am Biig.” 40Po'a sieba me daa zi'e lallisa n gosid. Meeri one yi Magdala daa be ba soogin, ne Meeri one a Jemes bil ne Joses ma la, ne Salome. 41Yesu n daa be Galilee la, bane daa dol o ka suŋid o la. Po'ab bedego bane me daa biel o n kenn Jerusalem la me daa be anina. 42Ka zaam daa bood ma'ar la ka li a vu'usum daar ti'ebug la. 43Ka Josef one yi Arimatea teŋin ka a teŋ la tuongatib la nid yinni, ka mor yu'usuŋ ka me daa gur Wina'am na'am ken na la, kpe'eŋ o suunr, ka keŋ Pilate sa'an n sos Yesu niŋgbiŋ la. 44Ka li lidig Pilate one wum ye Yesu pun kpi sa la. Ka o buol sogia kpeenm la, ka bu'os o ye, o sid kpine. 45Ka sogia kpeenm la n yel o ye, o kpiya sa la, ka Pilate bas Josef noor, ka o zaŋ niŋgbiŋ la. 46Ka o da' fupielig, ka sigis niŋgbiŋ la dapuudir zug, ka nok fuug vil o, ka mor o keŋ n mum yaug kane ka ba daa pun tu tampiing sakpidir zug la. Ka bilig kugtita'ar ligil yaug la noor. 47Meeri one yi Magdala, ne Meeri Josef ma daa nye zin'ig kane ka ba mum o la.

will be added

X\