MAAK 14

1Li daa kpelim daba ayi ne ku'um malek gaadug maluŋ tienr dabisir la, ne bodobodo line ka ba pu niŋ dabin la maluŋ dabisir. Ka Wina'am maalmaan kpeenmnam ne gbauŋmi'idib ied sueya ye ba sua' gban'e Yesu n kuu o. 2Ka ba yel ye, “Ka'a maluŋ tienr saŋa laa, ka nidib na ti zabid o zug.” 3Yesu daa be Simon one a kukom la yin n be Betani teŋin. Ban daa be anina dit la, ka po'a kena n mor alabasta kugir kolibir ka li pe'el ne naad kpasoondim, ka li ligidi zu'e bedego. Ka o nwa'e kolibir la ka kpa'ae kpaam la niŋ Yesu zugin. 4Ka ninsieba bane be anina la sunf due. Ka ba yel taaba ye, “Bo ka po'a la sa'am kpasoondim la wala? 5Ba naan nyaŋen kuosini li, ka li ligidi gaadin tumtum yuum mum yood, ka nokin ligidi la tisin noŋ dim.” Ka ba zerig po'a la hale. 6Ka Yesu yeli ba ye, “Keli no baanlim. Bo ka ya daamid o? O maali bunsuŋ tis man. 7Noŋ dim bee ya sa'an saŋa wusa. Dinzug saŋkan wusa ka ya bood ya tun'e suŋi ba, bozugo mam ku be ya sa'an saŋa wusaa. 8Ka o niŋ on tun'e si'el, one kpa'ae kpasoondim niŋ m niŋgbina ni ye o deŋim ti'ebi m, ban na ti mum man si'em. 9Asida ka m yeti ya ye, dunia nwa zin'ikan wusa ka ba na ti mool labasuŋ la, ba me na yel po'a la niŋ si'el la, ka li a o tienr yela.” 10Ka Judas Iskariot, one a Yesu nya'andolib piinayi la nid yinni, keŋ Wina'am maalmaan kpeenmnam sa'an ye o zam Yesu. 11Ban daa wum on yel si'ela ka ba sunf ma'ae. Ka ba siak ye ba na tis o ligidi. Ka Judas yu'un ied suekan ka o na zam o. 12Li daa kpelim daba ayi ne ku'um malek gaadug maluŋ tienr dabisir ne bodobodo line ka ba pu niŋ dabin la maluŋ pin'ilug daar. Ka li a ba malima ye so' wusa ku pe'og. Ka Yesu nya'andolib la bu'os o ye, “Fu bood ye ti keŋ yaa ni n ti'eb, ka fu di dabisir nwa diide?” 13Ka Yesu tum o nya'andolib ayi ka yeli ba ye, “Kem teŋ poogin la, ka ya na tu'os dau ka o zeed yuur ne ku'om, doli no. 14Ka keŋ kpen' yikan ka o kpen'ed la, ka yel yidaan la ye, ‘Pa'an la ye, saam doog la be yaani ka mam ne m nya'andolib na di maluŋ la dabisir diibo?’ 15O na pa'ali ya dotita'ar ka ba me sun'ul li tiraan zug. Ka si'el mekama be anina. Ti'ebimi anina guri ti.” 16Ka o nya'andolib la yi keŋ teŋ poogin la n nye ka si'el mekama a wuu Yesu yeli ba si'em la. Ka ba ti'eb maluŋ la ani. 17Zaami ma'ae la, ka Yesu ne o nya'andolib piinayi la kena. 18Ka bane zin'i n dit la, ka Yesu yeli ba ye, “Asida ka m yeti ya ye ya nid yinni one dit ne man kpela na zam man.” 19Ka ba sunya sa'am. Ka ba bu'osid o yinni yinni ye, “Li ane mam?” 20Ka o lebis ye, “Li ane ya nidib piinayi la ni yinni, one nu'ugi tum sia'al man nu'ug laan la. 21Ninsaal Biig na kpi wuu lin da sob Wina'am gbauŋin si'em la. Amaa yel toog be one zam Ninsaal Biig la zugin. Dinzug li naan a su'um ba ya'a pu du'an dau kaŋaa.” 22Ka ban daa dit la, ka Yesu nok bodobodo ka pu'us Wina'am bareka ka gben'es n tis o nya'andolib la, ka yeli ba ye, “Di'em nwa di, ka li ane m meŋ niŋgbiŋ.” 23Ka nok nwam, ka pu'us Wina'am bareka, ka tisi ba, ka ba wusa nuu li. 24Ka o yeli ba ye, “Nwa ane m ziim kane a nonaar ziim line na yi nidib bedego zug. 25Asida ka m yeti ya ye, m ku lem nu daam nwa ya'ase, asee daar kan ka li na a bun paal Wina'am so'olim ni ka m na lem nuu li.” 26Ka ba yuum yuuma n zun'od Wina'am, ka yi keŋ Olives zuerin. 27Ka Yesu yeli ba ye, “Ya wusa na zo ka bas m. Ka li sob Wina'am gbauŋin ye, ‘Wina'am na ku konbkem la, ka konbid la widig.’ 28Ka m ya'a ti vu'ug kumin, m na deŋi ya tuon keŋ Galilee.” 29Ka Piita yel o ye, “Hale baa ba wusa ya'a zo ka bas uf, man ku bas fuu.” 30Ka Yesu lebis ye, “Asida ka m yet uf ye, yu'uŋ kaŋa, fu na ki'is man noor atan' ka noraug naan kaas noor ayi.” 31Ka Piita lebis o ye, “Li ya'a pun ane ye m kpi ne fo, m ku maligim ki'is fo.” Ka ba wusa me yel ala. 32Ka ba daa paae zin'i si'a ka li yu'ur buon Gesemane. Ka Yesu yel o nya'andolib la ye, “Zin'inimi kpe' ka m sos Wina'am.” 33Ka o dol Piita ne Jemes ne Joon n keŋ. Ka o sunf sa'am bedego. 34Ka o yeli ba ye, “M sunf sa'am hale, ka li wenne m kpi ne. Din la kpelimi kpe' ka gu'us.” 35Ka o keŋ tuon bi'ela, ka igin teŋin sos Wina'am ye, “Yel kaŋa ya'a na nyaŋen gaad ka bas m, fun ke ka li gaad.” 36Ka yel ye, “M Ba' si'el wusa ane na'ana ne fun. Yiisim namisug kaŋa n bas ka kee man. Amaa li ka'a ne man boodim, dinzug kel ka fun boodim gullim niŋ.” 37Ka o leb ti nye ka nya'andolib atan' la gbisid, ka o bu'os Piita ye, “Simon, fu gbisidne? Fu ku nyaŋe nei ka li yuug bi'ela?” 38Ka yeli ba ye “Nei ka sos Wina'am, ka makir da nyaŋe yaa. Siig la boodim be, amaa niŋgbiŋ la ka'a paŋa.” 39Ka o len leb ye o sos Wina'am, ka yel wuu on pa'a pian'a si'em la. 40Ka o len leb na nye ka o nya'andolib la gbis, ka gbenn um more ba hale. Ka ba zi' ban na lebis o si'el la. 41Ka o keŋ ka len leb noor atan' daan na, ka bu'osi ba ye, “Ya kpelim vu'usid ka gbisidaa? Li saŋa paae na. Ba zam Ninsaal Biig la ka zaŋ o niŋ tuumbe'ed dim nu'usin. 42Duomi ka ti keŋ. Gosimi, one zam man la nwa.” 43On daa nam kpelim pian'ad la, ka Judas one a o nya'andolib piinayi la ni yinni paae na. Ka nidib bedego dol o mor su'uraad ne balaya. Ban ka Wina'am maalmaan kpeenmnam ne gbauŋmi'idib ne kpeenmnam tum la. 44Ka one na zam o la pa'a pun pa'ali ba ye, “On ka m muak o noor la, one la. Gban'am o ka mor o n keŋ baanlim.” 45Ka Judas paae na ka kpen keŋ Yesu sa'an n yel o ye, “Pa'ana” ka muak o noor 46Ka ba gban' o ne paŋ. 47Ka nimbane daa zi'e kpi'e o la yinni fue o su'uraug kia' Wina'am maalmaan kpeenm tumtum yinni tobir fi'ig. 48Ka Yesu bu'osi ba ye, “Ya ken ne su'uraad ne balaya ye ya gban' man wen wuu one a na'ayiiga? 49Ka daar wusa m daa be ne ya, Wina'am pu'usum yin n pa'ani ya, ka ya daa pu gban'e ma. Lin da sob Wina'am gbauŋin si'em la, na niŋ ameŋa.” 50Ka o nya'andolib la wusa zo ka bas o. 51Ka dasaŋ so' ye fuug yinni ma'aa n dol o. Ka ba daa ye ba gban' o. 52Ka o bas o fuug la, ka zo biel. 53Ka ba mor Yesu keŋ Wina'am maalmaan kpeenm la yin. Ka Wina'am maalmaan kpeenmnam ne kpeenmnam ne gbauŋmi'idib zan'asa la'as na. 54Ka Piita be nya'aŋ dol n ti paae Wina'am maalmaan kpeenm la yin ka kpen' zakin, ka zin'i ne tumtumnib bane gur Yesu la n uosid bugum. 55Ka maalmaan kpeenmnam ne nimbane yiti gban'ed noor Jew dim yela la wusa ied nidib bane na ma' ye Yesu tum tuumbe'ed, ka nye suer kuu o, amaa ba pu nye o tuumbe'ede. 56Ka ziri kasetib bedego ma' tis Yesu. Ka ban ma' si'el la pu dol taabaa. 57Ka ninsieba due n ma' ye, 58“Ti wum ka o ye, ‘M na nwa' Wina'am pu'usum yikan ka ninsaal me' la bas, ka mee li daba atan' poogin. Ka li ku a ninsaal meebo.’ ” 59Hale ban meŋ yel si'el la pu dol taabaa. 60Ka Wina'am maalmaan kpeenm due zi'en ba tuon ka bu'os Yesu ye, “Fu pu mor lebisug na yel bane yeti fu yela si'em laa?” 61Ka o sin ka pu lebis si'ela. Ka kpeenm la lem bu'os o ye, “Fune a Kiristo, Wina'am one ka ba du'osid o yu'ur la Biig laa?” 62Ka Yesu lebis ye, “Eenn mane la.” Ka ye, “Ya na nye Ninsaal Biig la ka o zin'i Wina'am one so'e paŋ la datiuŋ, ka yi saŋgbana zug na.” 63Ka kpeenm la aaenn o meŋ fuug ka yel ye, “Ti lem bood kasetib bo ya'ase? 64Ya wum on tu' Wina'am si'em laa.” Ka bu'osi ba ye, “Ya gban'e li wala?” Ka ba wusa gban'e ye o nar ne ku'um. 65Ka ba sieba tubis nintoond n mad o ka ligil o nindaa ka nwe' o ka yel o ye, “Yelim one nwe' uf la.” Ka tumtumnib bane gur o la di'e o, ka bu' o. 66Piita daa nam be zakin ka Wina'am maalmaan kpeenm tumtum po'ak kena 67nye o ka o uosid bugum, ka gos o kii, ka yel o ye, “Fu me daa be ne Yesu one yi Nazaret na la.” 68Ka Piita ki'is ye, “M zi' o, ka me pu gban'e fu pian'ad la gbin ne.” Ka Piita yi zi'en za'anoorin. Ka noraug kaas. 69Ka bipuŋ la len nye o, ka yel bane zi'e ani la ye, “Dau kaŋa ane Yesu nid yinni.” 70Ka Piita lem ki'is. Ka li pu yuuge, ka nimbane zi'e la yel Piita ye, “Sida fu ane ba nid yinni. Fu me yine Galilee na.” 71Ka Piita yel ye, “M pone ye m zi' dau kane ka ya pian'adi o yela nwaa.” 72Yim, ka noraug lem kaas noor ayi daan. Ka Piita tienn Yesu daa yel o si'el la ye, “Fu na ki'is ye fu mi' man noor atan' ka noraug naan kaas noor ayi.” Ka modigi gu'uŋ, ka kaas.

will be added

X\