MAAK 12

1Ka Yesu pa'ali ba ne siilima, ye, “Dau daa be n maal lombon'og ka se tiis ka me pogu'ud doog. O daa maal garuŋ ye ba yiti tu'al tikan ka ba buon ye veen la wela yiisi li ku'om la. Ka bas n tis pogu'udib la ka nwie. 2Ka veen wela bi'igir saŋa paae ka o tum tumtum ye o keŋ pogu'udib la sa'an ye ba pudug wela la n tis o, o din na. 3Ka ba gban' o bu' ka o lebi kul zaalim. 4Ka o lem tum nid yinni ba sa'an na. Ka ba nwe' o zug hale ka diis o nyan. 5Ka o lem tum nid yinni ya'as. Ka ba ku on. Ala men ka o tum nidib bedego, ka ba bu' sieba ka ku sieba. 6“Nid ayinni daa kpelim, ka one daa a o meŋ binoŋir. O daa tum o pogu'udib la sa'an ka yel ye, ‘On aa m biig la, ba na na'as o.’ 7“Amaa pogu'udib nwa yel taaba ye, ‘Oŋa so'e faar la. Keli ka ti ku o, ka faar la liebi ti din.’ ” 8Ka ba gban' o ku, n yiis o poogin la n bas. 9“Dinzugo lombon'og nwa daana yu'un na niŋ wala? O na kena ku pogu'udib la, ka di'e lombon'og la tiak n tis sieba. 10Ya pu karem zin'ikan ka ba sob Wina'am gbauŋ poogin si'em la? ‘Kugkan ka tanmeed zan'as la lieb lodigin kugsuŋ. 11Ka Zugsob la maal nyalim kan ka ti nyet nwa.’ ” 12Ka ba daa bood ye ba gban' Yesu. Amaa ka zot nidib bedego la dabiem, bozugo ba mi' ye o siilimne ban siiliŋ kaŋa. Ka ba bas o ka keŋ. 13Ka ba tum Farisee dim ne na'ab Herod nidib ye ba zam Yesu o pian'ad poogin. 14Ka ba kena yel o ye, “Pa'ana, ti mi' ye fu ane yelmeŋir sob, ka pu zot nidib la ninii. Ka pu gaansid nidiba, ka pa'an nidib ameŋa meŋa Wina'am suer a si'em. Li dol suer ye ti yo lampo n tis na'ab Kaisa bee li pu dol suere? 15Ti yoom bee ti da yo?” Ka Yesu baŋ ba zam tuuma la, ka bu'osi ba ye, “Bo niŋ ka ya makidi ma? Mor la'af na ka m gos.” 16Ka ba mor la'af la na n tis o. Ka Yesu bu'osi ba ye, “Ano'on foto ne ano'on yu'uri sobi tabil li ni?” Ka ba lebis ye, “Li ane na'ab Kaisa.” 17Ka Yesu yeli ba ye, “Tisimi na'ab Kaisa line a o din ka me tis Wina'am line a Wina'am din.” Ka Yesu pian'ad la lidigi ba. 18Ka Sadusii dim bane yet ye ku'um ku vu'ug la, kenn Yesu sa'an na, ka bu'os o bu'osug ye, 19“Pa'ana, Moses da sob n yeli ti ye, nid ba'abiig ya'a kpi ka bas o po'a, ka po'a la pu du'a biiga, on dim po'a la n du'a biis n tis o ba'abiig la. 20Ba'abiis ayopoi n daa be. Ka kpeenm sa'an la di po'a ka kpi. Ka biig kae'. 21Ka o nye'er la zaŋ pokoonr la, ka me kpi. Ka biig kae'. Ka one paas atan' la me niŋ ala. 22Ka ba bayopoi la wusa di po'a la yinni yinni, ka kpi ka pu du'a biiga. Ka po'a la me yu'un kpi. 23Nannanna, ku'um ya'a ti vu'ugi, ano'on na a po'a nwa sida? Bozugo ba bayopoi wusa di po'a la.” 24Ka Yesu lebis n yeli ba ye, “Nwa ka'ane yidigire? Ya zi' Wina'am gbauŋ yel si'em bee Wina'am paŋi a si'em laa? 25Ku'um vu'ugir daar la, dap pu dit po'aba, ka po'ab me pu kun sidiba. Bozugo ba wusa na wenne maleknam bane be arazana ni n a si'em la. 26M na yeli ya kum vu'ugir yela. Ya nam pu karem Moses sob si'em laa? Saŋkan ka o nye ka bugum due tituudin ka Wina'am yel o ye, ‘Mane a Abraham Wina'am ne Isaak Wina'am ne Jakob Wina'am.’ 27Wina'am ka'ane ku'um Wina'am, amaa o ane nimbane voe la Wina'am. Ya yidigiya bedego.” 28Ka gbauŋmi'idib la nid yinni n wum bane nwa'asid noŋgbanwa'ar, ka o baŋ ye Yesu lebis Sadusii dim ne ya'am pian'ad la, ka o me li'el o n bu'os o ye, “Wina'am noyelug wusa lin sa'an n gaad wusa?” 29Ka Yesu lebis n yel o ye, “Line a yelkpan gaad wusa ane ye, ‘Israel dima, kelisimi. Ti Zugsob Wina'am ane Zugsob yinni. 30Ka fu na noŋ fu Wina'am one aa fu Zugsob ne fu suunr wusa, ne fu siig wusa, ne fu ya'am wusa, ne fu paŋ wusa.’ 31Ka line paas ayi la, ane ala men ye, ‘Fu na noŋ fu kpi'a wenne fu meŋ ne.’ Noor yelug lem kae' n gaad bama ya'ase.” 32Ka gbauŋmi'id la yel o ye, “Pa'ana, li ane ameŋa ka fu yel ala. Wina'am ane yinni. Ka so' lem kae' n paas o zugo. 33Fu ya'a noŋ o ne fu suunr wusa ne fu ya'am wusa, ne fu paŋ wusa, ka noŋi fu kpi'a wenne fu meŋ, lina gaad maana wusa.” 34Ka Yesu n nye ka o lebis ne ya'am la, ka yel o ye, “Fu pu lal ne Wina'am so'olim.” So'o pu mor sukpi'em na lem bu'os Yesu bu'osugo. 35Ka Yesu n daa ti pa'an nidib Wina'am pu'usum yin la, ka o bu'osi ba ye, “Wala ka gbauŋmi'idib yel ye, Kiristo ane David yaaŋa? 36David meŋ yel ne Wina'am Siig Suŋ paŋ ye, ‘Ti Zugsob yel man Zugsob ye, “Zin'inim m datiuŋ, hale ka m ti maal fu bi'emnam la, ka ba be fu noba teŋir.” ’ 37David meŋ ya'a buol o ye, ‘Zugsob’ wala ka o na niŋ David yaaŋa?” Ka nidib bedego kelisid o pian'ad ne sumalisim. 38Ka o pa'alug la poogin la o yel nidib la ye, “Gu'usimini ya meŋ ne gbauŋmi'idib la bane bood ye ba goond ne fubeda n di'ed nidib pu'usum da'an la. 39Ba boodne na'am zin'is la'asug doodin ne di'ema ni, 40ka faand pokonya ya, ka ma' pu'usid pu'uswa'a tisid Wina'am. Ba na kadi ba saria ka ba nye koosbe'ed hale.” 41Ka Yesu zin'i kpi'ene Wina'am pu'usum yir ligidi daka, ka gosid nidib ka ba niŋid ligidi. Ka arazak dim niŋid ligidi bedego. 42Ka pokoonr noŋ daan kena niŋ ligidi fiinn line a o zan'a zan'. 43Ka Yesu buol o nya'andolib la, ka yeli ba ye, “Asida ka m yeti ya ye, pokoonr kaŋa niŋ ligidi bedego n gaadi nidib la wusa. 44Bozugo arazak dim yiisi ba ligidi sieba niŋ, ka ke bedego. Ka on, one a noŋ daan la, nok o zan'a zan' n tis ka ke zaalim.”

will be added

X\