1 Ka ba kena paae Befage ne Betani, teens bane be Olives zuerin ka pu lal ne Jerusalem. Ka Yesu tum o nya'andolib ayi 2 ka yeli ba ye, “Kemi teŋ kane be tuon la, ka ya ya'a paae ya na nye buŋsia'asiŋ ka ba loo zi'el ka so' nam pu ban' oo. Yidigim o na. 3 Ka so' ya'a bu'osi ya ye, ‘Bo yela ka ya yidigid oo?’ Yanam yelim o ye, ‘Zugsob la bood o, amaa o na lebis o na.’ ” 4 Ka ba keŋ n ti nye ka ba lo li so' za'anoorin, suer kukpeŋ. Ka ban yidigidi o la, 5 nidib daa zi'e anina, ka bu'osi ba ye, “Wala ka ya yidigid buŋ la?” 6 Ka ba lebis wuu Yesu yeli ba si'em la. Ka ba ke ka ba mor o keŋ. 7 Ka ba more paae Yesu sa'an, ka noki ba fuud pa'al buŋ la zug. Ka Yesu ban'a o. 8 Ka nidib bedego yadigi ba fuud suer zug. Ka sieba keŋ poogin ans tiis vaand n yadig sueren. 9 Ka nimbane be tuon ne nya'aŋ daa tansid yet ye, “Hosaana! Wina'am yelsum bene one kenne ne Zugsob la yu'ur. 10 Wina'am yelsum be ti yaab David so'olim ne one kenna ne Zugsob la yu'ur. Hosaana! Na'am tita'ar ane Wina'am one be arazana ni la din.” 11 Ka Yesu paae Jerusalem n kpen' Wina'am pu'usum yin n giligi gos si'el wusa. Ka lin daa a zaam la zug, ka on ne o nya'andolib piinayi la yi keŋ Betani. 12 Ka yimbeogun, ka ba yi Betani lebid Jerusalem, ka Yesu ko'om zabid. 13 Ka o nye kekaŋ ka li zi'e lalle. Ka vaand ligili li ma'ae siaa. Ka o keŋ ye o gos ye li wel kekama, ka paae nyene vaand ma'aa, lin daa ka' kekama saŋa la zug. 14 Ka o yel tiig la ye, “So' ku lem di fu wela ya'ase.” Ka o nya'andolib la wumi li. 15 Ka ban paae Jerusalem la, ka Yesu kpen' Wina'am pu'usum yin, n kad nimbane be anina n da'ad ka kuosid la, ka lebugid teebulnam bane ka ba daa mor n tia'ad ligidi li zugin la n pibil, ne kogus bane ka ba more zin'i kuosid dawana la. 16 O daa pu siak ye so' len gaad n kpen' yin la ne la'ade, 17 ka yu'un pa'an nidib la ye, “Li pu sob Wina'am gbauŋin ye, ‘M yir na ane ninsaalib wusa pu'usum yire’? Amaa yanam noki li maal faaung dim suak yir.” 18 Ka Wina'am maalmaan kpeenmnam ne gbauŋmi'idib wum ala la, ka pin'ili ied sueya ye ba kuu o, amaa ka zot o dabiem, bozugo o pa'alug la daa lidig nidib bedego. 19 Ka zaam ti ma'ae, ka Yesu ne o nya'andolib yi teŋ kan la ni. 20 Ka bekenkeung ka ba ken sueren ka nye kekaŋ la ka li kpi ne li nya'a. 21 Ka Piita tienn ka yel Yesu ye, “Pa'ana, gosim, tikan ka fu sa po noor niŋ la kpiya.” 22 Ka Yesu yeli ba ye, “Niŋimi Wina'am yadda. 23 Ka asida ka m yeti ya ye, so' ya'a yel zuekaŋa ye, li vuenm ka keŋ bas li meŋ beuŋin, ka siak o sunfin ye on yel si'el la na niŋ, ka pu bi'ese, li sid na niŋ. 24 Lina zug ka m yeti ya ye, ya ya'a pu'usid ka sosid si'el, yanam niŋim Wina'am yadda ye ya di'e li, ka ya sid na di'e. 25 Ya ya'a zi'e pu'usid, ka so' daa pun tum tuumbe'ed tisi ya, ka ya sunf due, keli li bas, ka ya saam Wina'am one be arazana ni me na kee ya tuumbe'ed n bas.” 27 Ka ba lem paae Jerusalem. Ka Yesu ken Wina'am pu'usum yin, ka Wina'am maalmaan kpeenmnam ne gbauŋmi'idib ne kpeenmnam keenn o sa'an na 28 ka bu'os o ye, “Ano'on paŋ ka fu more tum tuum bama? Ka ano'one tis uf suer ye fu tum tuum bama?” 29 Ka Yesu lebisi ba ye, “M na bu'osi ya bu'osug yinni, ka ya ya'a lebisi li, m me na yeli ya paŋkan ka m more tum la. 30 Ano'one daa tis Joon paŋ ka o daa suud nidib ku'om la? Li ane Wina'am bee ninsaaliba? Gandigimini ma.” 31 Ka ba nwa'asid taaba ye, “Ti ya'a ye, ‘Li yine Wina'am sa'an’ o na ye, ‘Ka bozug ka ya da pu siak o?’ 32 Ti me ya'a yel ye, ‘Li yine ninsaalib sa'an na,’ li na daam nidib la sunya.” (Ba daa zotne nidib la dabiem, bozugo ba wusa daa mi' ye Joon da a Wina'am nodi'es.) 33 Ka ba gu'uŋe lebis Yesu ye, “Ti zi'.” Ka Yesu yeli ba ye, “Mam me ku yeli ya paŋ kan ka m more tumid tuum bamaa.”
