MAAK 10

1Ka Yesu bas zin'ikan la ka keŋ Juuda so'olimin n lo'oŋ Joodan mo'ar la. Ka nidib bedego lem la'as na. Ka o pa'ani ba wuu on yiti niŋid si'em la. 2Ka Farisee dim sieba kena ye ba kpans o gos, ka bu'os ye, “Li a su'um wada poogin ye dau kad o po'a?” 3Ka o lebisi bu'osi ba ye, “Moses daa tisi ya noor zi'el bo?” 4Ka ba yel ye, “Moses da siak ye, dau kad o po'a ka sob gbauŋ li yela n tis o.” 5Ka Yesu yeli ba ye, “Ya zugu daa kpi'em hale ka ya pu siaki di'e pa'alug la ke ka Moses daa sob nokaŋa tisi ya. 6Amaa saŋkan ka Wina'am daa maal dunia la, o da maali bane dau ne po'a. 7Ka yel ye, ‘Ne'eŋa yela ka dau na bas o ba' ne o ma ka la'as ne o po'a. 8Ka ba leŋ ka' ayii, amaa ka lieb ayinni.’ 9Wina'am la'as si'el la, mit ka ninsaal weligi li.” 10Ka ba kpen' yin ka o nya'andolib la bu'os o on yel si'el la gbin. 11Ka o yeli ba ye, “Dau kane kad o po'a bas ka toom n di po'a, o galumne. 12Ala mene po'a ya'a bas o sid, ka toom n kul dau, o me galumne.” 13Ka ba mor biis kenn Yesu sa'an na ye o zaŋ o nu'ug pa'ali ba zug ka niŋi ba bareka. Ka o nya'andolib la kad nidib la. 14Ka Yesu nye, ka li pu niŋ o malisim. Ka o yeli ba ye, “Keli ka biis la keenn m sa'an na ka da kati baa, bozugo bamanam taab, ka Wina'am so'olim la aa ba din. 15Ameŋa ka m yeti ya ye, one pu di'e Wina'am so'olim la wuu biiga, o ku kpen' li nii.” 16Ka o di'e ba ne o nu'us niŋ o tuon, ka pa'al o nu'us ba zutin n niŋi ba bareka. 17Ka Yesu lem due ken. Ka dau so' zo kenn o sa'an na n igin o tuon, ka bu'os o ye, “Pa'ansuŋo, m na niŋ wala n nye nyovur kane ka' naare?” 18Ka Yesu lebis n bu'os o ye, “Bo ka fu buoni m ninsuŋo? So' kae' a su'um asee Wina'am gullim. 19Fu mi' Wina'am noyelug la ye, ‘Mit ka fu ku nid, mit ka fu sa'am po'a bee dau, mit ka fu zuud, mit ka fu di ziri kaset, mit ka fu zam nidib, siakimi fu ba' ne fu ma noor.’ ” 20Ka dau la yel o ye, “Pa'ana, mam pun dol noyelug la wusa m biilimin sa.” 21Ka Yesu gos o, ka noŋ o, ka yel o ye, “Li kpelim bun yinni. Kem n kuos fu la'ad wusa ka zaŋ ligidi n tis noŋ dim, ka fu na nye kpa'am arazana ni, ka naan kena n dol man.” 22Ka on wum wala la, o sunf daa sa'am ka o lo nindaa, ka keŋ, on mor la'ad bedego la zug. 23Ka Yesu gosi o nya'andolib la gilig ka yeli ba ye, “Li toe hale ne bane mor araza'as n na kpen' Wina'am so'olimin.” 24Ka o tu'am la lidig o nya'andolib la. Ka Yesu lem yeli ba ya'as ye, “M biise, li toe hale ka so' kpen' Wina'am so'olimin. 25Li a na'ana ne yugumi na kpen' kparipiim voonrin n gaad arazak daan na kpen' Wina'am so'olimin.” 26Ka ba ya'am iank hale bedego. Ka ba bu'os taaba ye, “Ka li ya'a a ala, ano'one na tun'e nye faangire?” 27Ka Yesu gosi ba ka lebisi yeli ba ye, “Ninsaal ku tun'e niŋ ala, amaa li pu toe n tis Wina'am. Bozugo Wina'am sa'ane si'el mekama ane na'ana.” 28Ka Piita nan yel o ye, “Gosima, tinam basne si'elnam wusa ka dol uf.” 29Ka Yesu yeli ba ye, “Ameŋa ka m yeti ya ye, so' ya'a bas o yir bee ba'abiis bee o ma bee o ba' bee biis bee pood, man ne m labasuŋ la zug, 30o na di'e buna bedego n paas bama saŋkaŋa nwa. O na di'e yir ne ba'abiis ne manam ne biis ne pood, ka namisug me na paas. Amaa saŋa kane kenna la, o na di'e nyovur kane ka'a naare. 31Nidib bedego bane deŋ tuon na leb nya'aŋ ka bane be nya'aŋ na gaad tuon.” 32Ban daa be sueren n ken Jerusalem ka Yesu bee ba tuon la, ka li pak o nya'andolib la. Ka dabiem daa kpen'e nimbane daa doli ba la. Ka Yesu lem buol o nya'andolib piinayi la n leb kukpeŋ ka tu'asi ba line na niŋ o, 33ye, “Ti wa'ane Jerusalem. Ani ka ba na nok Ninsaal Biig la n tis Wina'am maalmaan kpeenmnam ne gbauŋmi'idib. Ka na pian' koos o yela ye o nare kum, ka na nok o tis bane ka' Jew dim la. 34Ka ba na la' o ka tubis nintoond mad o, ka fieb o, hale ka ku o. Amaa o na vu'ug kumin daba atan' daar.” 35Ka Zebedee biis Jemes ne Joon keŋ li'el Yesu sa'an n yel o ye, “Pa'ana ti bood ye ti ya'a sos uf si'el fun maali li n tisi ti.” 36Ka o bu'osi ba ye, “Bo bun ka ya bood ye m maal n tisi ya?” 37Ka ba lebis n yel o ye, “Fu ya'a ti di'e fu so'olim na'am la, ka zin'i fu na'am gbauŋ zug, siakim ka ti yinni zin'in fu datiuŋ, ka ti yinni zin'in fu dagobug.” 38Ka Yesu lebis n yeli ba ye, “Ya pu baŋ yanam sosid si'ela. Ya na tun'e nu bun nuuda line a tilas ye m nu laa, bee ku'om suub kane a tilas ye m su la? Bee ya na tun'e kpi ku'um kane zi'el ye asee m kpi laa?” 39Ka ba yel o ye, “Ti na tun'e niŋ ala.” Ka Yesu lebis n yeli ba ye, “Ameŋa, ya na tun'e nu bun nuuda kan ka m na nu la ka su ku'om kan ka m na su la, ka kpi ku'um kan ka m na kpi la. 40Amaa m lee pu mor suer ye m ke ka so' zin'ini m datiuŋ bee m dagobuga. Zin'iban maalne n digil bane na ti nye li la.” 41Ka o nya'andolib piiga la wum din la, ba gen'e ne Jemes ne Joon. 42Ka Yesu buoli ba n yeli ba ye, “Ya mi' ye dunia nwa na'anam diti ba na'am ka so'e ba nidib ne paŋ ka teŋ la nintitada me mugusid nidib la ka tum bane bood si'el la? 43Amaa li ka'a ala ne yanama. Ka niŋkan n be ya sisoogin n bood ye o lieb nintita'ar la, li su'um ye o siak n lieb ya tumtum. 44Ka one bood ye o niŋ kpeenm ya sisoogin la, li su'um ye o siak n lieb ya wusa tumtum. 45Bozugo Ninsaal Biig la men pu kena ye nidib tum n tis oo, amaa ye o lee tum n tis nidib, ka zaŋ o nyovur n yo ba sam, ye nidib bedego nye yolisim.” 46Ka ba paae Jeriko teŋin. Ka Yesu ne o nya'andolib ne nidib bedego n yit teŋin la. Ka zunzoŋ zin'i sueren n sosid. On yu'ur buon Bartimeus, one a Timeus biribiŋ. 47Ka on wum ye li ane Yesu one yi Nazaret la, ka o pin'il n tansid ye, “Yesu, David yaaŋa, zom m nimbaanlig.” 48Ka nidib bedego la tans o ye, “Kel vuud.” Ka o maligim tans ne paŋ ye, “David yaaŋa, zom m nimbaanlig.” 49Ka Yesu zi'en ka yel ye, “Buolim o na.” Ka ba buol o ka yel o ye, “Mor sumalisim, ka due ka o buon uf.” 50Ka o due pidig o fuug n bas, ka iank to'oto n keŋ Yesu sa'an. 51Ka Yesu bu'os o ye, “Fu bood ye m niŋ bo n tisi fo?” Ka zunzoŋ la yel o ye, “M Zugsoba, kel ka m nyet.” 52Ka Yesu yel o ye, “Kem kul ka fu nye laafe, fun niŋ m yadda la zug.” Ka zunzoŋ la nini kpelim lak. Ka o dol Yesu.

will be added

X\