1 Lina ane Yesu Kiristo one a Wina'am Biig la labasuŋ. 2 Li pin'il wuu Wina'am nodi'es Azaya n da sob si'em la. “Wina'am yel ye, ‘Gosima, m na tumi m tumtum ka o deŋi fu tuon n maal suesuŋ fu zug.’ 3 So' be moogin moon ne kukor tita'ar yet ye, ‘Maalimi suer su'uŋa gur Zugsob la. Keli ka suer a sapi n tis o.’ ” 4 Joon one daa suud nidib ku'om la da be moogin n moon n tisid nidib ye, “Basimi ya tuumbe'ed ka di'e ku'om suub, ka Wina'am na yiis ya tuumbe'ed n bas.” 5 Ka nidib bedego yi Juuda so'olim ne Jerusalem teŋin n keŋ Joon sa'an ka peligi ba poog yel o ba tuumbe'ed. Ka Joon suu ba ku'om Joodan mo'arin. 6 Joon daa yene fuud line a yugum konbid ka nok gbauŋ n lo o sia, ka o diib a na'azomnam ne siind. 7 Ka o mooni tisid nidib ye, “Ninkane dol mam nya'aŋ la, ane nintita'ar n gaad mam. M pu nar ne man na sebini o tuoni yidig o ta'ada nwiise. 8 Mam suudi ya ne ku'om, amaa ninkane kenna la na suu ya ne Wina'am Siig Suŋ.” 9 Lin nya'aŋ ka Yesu yi Nazaret line be Galilee so'olim la kena. Ka Joon suu o Joodan mo'arin. 10 Ka on daa dut ku'omin la, ka nye ka arazana za'anoor yo'og, ka Wina'am Siig Suŋ sigid o zugin na wenne dawan ne, 11 ka o wum kukor ka li yi arazana ni na n yel ye, “Fu ane mam binoŋir ka m sunf ma'ae fu yela.” 12 To'oto yim ka Wina'am Siig Suŋ ke ka Yesu keŋ moogin. 13 Ka o be ani n paae dabisa piisnaasi. Ka Sutaana kena n mak o. Moogin bunkonbid da be ani. Ka maleknam la'am kena n suŋ o. 14 Ban da yo Joon sarega ni la, li nya'aŋ ka Yesu keŋ Galilee 15 n moon Wina'am labasuŋ tisid nidib ka yel ye, “Li saŋa paae na. Wina'am so'olim kenna. Basimini ya tuumbe'ed ka siak labasuŋ la.” 16 Ka Yesu n daa dol Galilee beuŋ noorin la, o nye ziŋgban'adib ayi, Simon ne o pitu Andrew, ka ba gban'ad zimi; ka li ane ba tuuma. 17 Ka o yeli ba ye, “Doli ne m ka man na pa'ali ya suer ka ya ke ka nidib dol man wuu ziŋgban'adib n gban'ad zimi si'em la.” 18 Ka ba kpelim basi ba zimi la'ad la, ka dol o. 19 Ka o keŋ bi'ela, ka nye nidib ayi, bane a Zebedee biis Jemes ne Joon. Ka ba be aaruŋin maani ba zimi la'ad. 20 Ka o buoli ba, ka ba basi ba saam Zebedee ne o tumtumnib aaruŋin la, ka dol o. 21 Ka ba paae Kapeenum teŋin. Ka Jew dim vu'usum daar ka Yesu kpen' Jew dim la'asug doogin n pa'al nidib. 22 O daa pa'an nidib la ne kpi'euŋ, ka li ka' wuu gbauŋmi'idib pa'an si'em laa. Ka pa'alug la da lidig nidib la. 23 Ka dau daa be la'asug doogin la ka kikirig dol o. 24 Ka o tans ye, “Yesu one yi Nazaret na, fu ba'a bo be ti ni? Fu kena ye fu sa'ami tii? M mi' fun a so'. Fu ane Wina'am one a su'um nyain la din.” 25 Ka Yesu tans kikirig la ye, “Kel vuud, ka yi o sa'an.” 26 Ka kikirig la ke ka dau la lu kpisiŋkpi'ir, ka o kaas ne kukotita'ar ka nyaan yi dau la sa'an. 27 Ka li lidig ba wusa, ka ba bu'osid taaba ye, “Bo a ne'? Li ane pa'alug paal bee? Dau kaŋa mor kpi'euŋ pian'adi tisid kikiris ka ba siak o noor.” 28 Lina kene ka Galilee so'olim wusa nidib wum Yesu yela to'oto. 29 Ka ban yi Jew dim la'asug doogin la n kpen' Simon ne Andrew yin la, ka Jemes ne Joon me la'am doli ba. 30 Ka Simon diem po'a mor nwe'edug ka digi. Ka ba yel Yesu o yela. 31 Ka o keŋ gban' o nu'ug due o zi'el. Ka nwe'edug la bas po'a la, ka o maali ba saauŋ. 32 Ka winig ti sobid ka nidib mor ban'adnam bedego ne bane ka kikiris doli ba n kenn Yesu sa'an na. 33 Ka teŋ la nidib bedego la'as samanin. 34 Ka Yesu ti'eb nidib bedego bane mor wiim kon'ob kon'ob la, ka kad kikiris bedego yiis. Yesu pu siak ka kikiris la yel si'ela, bozugo ba pun mi' on a so'. 35 Ka Yesu da due ka beog nam pu yuoe niere ka o yi teŋ poogin n keŋ moogin n ti sos Wina'am. 36 Ka Simon ne o zuanam n yi ied o, 37 ka ban nye o la, ka yel o ye, “Nidib wusa ied uf ne.” 38 Ka Yesu yeli ba ye, “Keli ka ti keŋ teens bane kpi'e la ka m me mool labasuŋ la anina, ka linzug ka m kena.” 39 Ka o keŋ gilig Galilee so'olim wusa ka moon labasuŋ la Jew dim la'asug doogin ka kat kikiris n yiisid. 40 Ka kukom kenn Yesu sa'an na n igin sos o ye, “Li ya'a a fu boodim fun ke ka m nye laafe ka lieb nyain.” 41 Ka Yesu zo o nimbaanlig ka si'is o, ka yel ye, “M bood ala, liebin nyain.” 42 Ka o wiim la kpelim bas o. Ka o niŋgbiŋ lebi a nyain. 43 - 44 Ka Yesu sa'al o ne kpi'euŋ ye, “Mit ka fu yel so' li yela. Amaa kem noki fu meŋ n pa'al Wina'am maalmaan la, ka maal maan n tis Wina'am wuu Moses daa zi'el si'em la fu laafe nyeeb la zug. Ka li na pa'al nidib wusa ye fu mor laafe nannanna.” Ka Yesu naan bas o ka o keŋ. 45 Amaa on yi la, o pin'il n moon paalo ni. Ka li tiig zin'ig wusa. Dinzug ka Yesu da pu siaki nie o meŋ teŋ poosine, ka kpelim teŋ kpemisin. Ka nidib yi zin'is wusa kenn o sa'an na.
