LUUK 9

1Yesu daa buol o nya'andolib piina ayi la la'as, ka tisi ba paŋ ne kpi'euŋ ye ba nyaŋe kad kikiris ka ma'ae ban'as, 2ka tumi ba ye ba mool Wina'am na'am ka ti'eb ban'adnam. 3Ka yeli ba ye, “Da zaŋ si'eli keŋe ya ken la zugo. Da zaŋ dansaar bee kolug, bee diib, bee ligidi hale baa fuuda ayii. 4Zin'ikan wusa ka ba di'e ya, yanam zin'inim yikan ni n ti paae yanam na ti yi teŋ kan ni. 5Ka zin'ikan wusa ka nidib pu di'e yaa, yanam yim teŋ kan ni ka kpa'asi ya noba titan bas anina. Ka dine na pa'ali ba ye ba pu tum tuumsuma.” 6Ka nya'andolib la yi keŋ teŋkpemis wusa ni n moon labasuŋ la ka ti'ebid ban'adnam. 7Na'ab Herod daa wum line wusa niŋid la, ka li pak o hale bedego, bozugo ninsieba daa yel o ye Joon one daa suud nidib ku'om la vu'ug kumin. 8Ka sieba ye Elija kena, ka sieba ye Wina'am nodi'es kudug yinni vu'ug kumin. 9Ka Herod yel ye, “Man daa fi'ig Joon zug, ka oŋa a ano'on ka m wumi o yela nwa?” Ka o kpe'eŋid ye o nye Yesu. 10Ka tumtumnib la leb na ka tu'as Yesu ban tum si'el wusa. Ka o dol ban ma'aa yii keŋ teŋ si'a ka li buon Besaida. 11Ka nidib la n baŋ la ka dol o. Ka o di'e ba ka pian' Wina'am yela n tisi ba ka ti'eb ban'adnam. 12Ka winig n bood kpen'eb la ka nya'andolib piina ayi la keenn o sa'an na n yel o ye, “Kel ka nidib la keŋ teŋbibisin ne teŋkpemisin bane kpi'e ba sa'an la n nye diib ne gbeensa; ka zin'ikaŋa nwa ka'a si'ela.” 13Amaa ka Yesu yeli ba ye, “Yanam meŋ tisimi ba si'el ka ba di.” Ka ba lebis ye, “Tinam mor si'el wusa la ane bodobodo bibisa anu ne zimi ayi, asee ka ti keŋ da' diib na n tis nimbama wusa.” 14Dap kal daa ane wuu tusa anu. Ka Yesu yel nya'andolib la ye, “Keli ka nidib la zin'in, zin'ig zin'ig, piisnu nu.” 15Ka ba ke ka ba zin'in ala. 16Ka Yesu zaŋ bodobodo gbila anu ne zimi ayi la ka godigi gos saazug n pu'us Wina'am bareka, ka gben'es bodobodo la tis o nya'andolib la ka ba tot nidib la. 17Ka ba wusa di tig ka nya'andolib la vaae line kpelim la ka li pe'el peed piiga na ayi. 18Daar yinni ka Yesu ma'aa sosid Wina'am ka o nya'andolib la be o sa'an, ka o bu'osi ba ye, “Nidib yet ye m a ano'one?” 19Ka ba lebis ye, “Sieba ye fu ane Joon one suud nidib ku'om la ka sieba ye, fu ane Elija, ka sieba ye fu ane Wina'am nodi'es kudug yinni one vu'ug kumin na.” 20Ka o bu'osi ba ye, “Ka yanam yel ye man a ano'one?” Ka Piita lebis ye, “Fu ane Kiristo on ka Wina'am gaŋ la.” 21Ka Yesu sa'ali ba su'uŋa ye ba da yel so'o, 22ka ye, “Li nar ye Ninsaal Biig la namis bedego ka teŋgbauŋ kpeenmnam ne maalmaan kpeenmnam ne gbauŋmi'idib n zan'as o, ka ku o, ka daba atan' daar ka o vu'ug kumin.” 23Ka o yeli ba wusa ye, “So' ya'a ye o dol man, asee o ki'is o meŋ yela ka zaŋ o ku'um dapuudir daar wusa dol man. 24Ninkane wusa bood ye o gu' o nyovur on daana na ko'oŋi li, amaa ninkane ko'oŋi o nyovur man zug o na gu' li. 25Li nyood a bo ka nid di'e dunia wusa ka o meŋ bodige? 26On mekama zo man ne m pa'alug nyan, Ninsaal Biig la me na zo o nyan o ya'a ti kena ne o na'am paŋ ne maleksuma la. 27M yeti ya ne sida ye, ya sieba be kpela n ku kpii asee ba ti nye Wina'am na'am la.” 28Ka daba anii nya'aŋ la ka Yesu zaŋ Piita ne Jemes ne Joon n du zuer zug ye o sos Wina'am. 29On nam sosid Wina'am la ka o nindaa tiak ka o fuud peligi nyeen. 30Ka dapa ayi nie o sa'an vuguri na n pian'ad ne o. Ba daa ane Moses ne Elija 31bane nie nyeen hale n pian'ad ne Yesu on na kpi Jerusalem wuu Wina'am da yel si'em la. 32Ka Piita ne o taaba la gbisid, ka due n nye Yesu nyeen si'em ne nidiba ayi bane la'am zi'e o sa'an la. 33Ka nidib ayi la n daa bood ken la Piita yel Yesu ye, “M Zugsoba, li a su'um ye ti kpelim kpela. Kel ka ti ti' suga atan', fun din yinni, Moses din yinni, Elija men din yinni.” O daa kudun pian'ane ka zi' on yet si'ela. 34On nam pian'ad la ka saŋgbauŋ kena n lusi ba ne ma'asim. Ka dabiem gban'e nya'andolib la saŋgbauŋ la lusi ba la zug. 35Ka kukor yi saŋgbauŋ la ni na n yel ye, “Oŋa a m Biig, on ka m gaŋ. Kelisimi ne o.” 36Kukor la pian'a naae la ka ba nye ka Yesu gullim zi'e. Ka ba sin saŋkan la ka pu yel so' baa bi'ela ban nye si'el saŋgbana ni laa. 37Ka beugo daa nie ka ba sig zuer la zug na la, nidib bedego daa tu'os Yesu. 38Ka dau so' kpen tans nidib la soogin n yel ye, “Pa'ana m belim uf ne, gosimi m biyimir zaŋ zaŋ on ka m du'a. 39Ka kikirig gban'ad o ka o kpelim kaasid ka ket ka o lut kpisiŋkpi'ir, ka nintoond yit o noorin. Ka kudun pu siak ye li yi ka bas o 40Ka m belimi fu nya'andolib ye ba kadi li n yiis ka ba pu nyaŋe.” 41Ka Yesu lebis ye, “Abba! Yanam a bonam nidibi kudun pu mor yadda ka me pun zi' lin nar ye ya tum. Abu la ka m ye m modig ne ya?” Ka Yesu yel dau la ye, “Mor biig la na.” 42Ka biig la kenna la, ka kikirig la lub o ka o nwi'e. Ka Yesu tans kikirig la ye, “Basim biig la.” Ka kikirig la bas o ka o paam laafe, ka Yesu zaŋ o n lebisi tisi o saam. 43Ka Wina'am paŋ tita'ar tuuma la lidigi ba wusa. Nidib la wusa daa nam kpelim lidig ne Yesu niŋid si'el la, ka o yel o nya'andolib la ye, 44“Keli ka pian'abama kpen'e ya toba ni ka da tameyaa. Ba na zaŋ Ninsaal Biig n niŋ ninsaalib nu'usin.” 45Amaa ka pian'ad la gbin ligili ba sa'an, ka ba pu baŋi li gbin ne. Ka dabiem more ba ne ban na bu'os o. 46Ka ba nwa'asid taaba kpi'euŋ yela. 47Ka Yesu baŋ line be ba sunya ni ka nok biig n zi'el o sa'an, 48ka ye, “One wusa di'e bikaŋa m yu'ur zug di'ene man, ka one me di'e man di'ene one tum man la na, bozugo one wusa a biigi ya sa'an la aa ya kpeenm.” 49Ka Joon yel ye, “Zugsoba, ti nye dau ka o kat kikiris yiisid fu yu'ur zug, ka on ka' tinam nid yinni la zug ka ti yel o ye o basim.” 50Ka Yesu lebis ye, “Da katin oo, ka on mekama pu kisi ti ane ti nid.” 51Dabisa la daa li'elne ban na zaŋ Yesu keŋ agol la, ka o gban'e ye asee ka o keŋ Jerusalem. O daa tum nidib o tuon. 52Ka ba keŋ kpen' Samaria teŋbilin ye ba ti'eb gur o. 53Ka nidib bane daa be anina la pu di'e oo, on ken Jerusalem la zug. 54Ka o nya'andolib Jemes ne Joon baŋ ne'eŋa la ba bu'os o ye, “Zugsoba, fu bood ye ti buol bugum, ka li yi agol na n dii baa?” 55Ka Yesu fendig n sa'ali ba ye ba kel, 56ka ba toom teŋ. 57Ka ban ken suer zug la ka dau so' yel Yesu ye, “Man na dol uf n ken fun na ken zin'isi'a wusa.” 58Ka Yesu lebis ye, “Teŋin bumis more ba vont, ka niis more teed, amaa Ninsaal Biig la pu mor zin'ikan ka o na digine vu'use.” 59Ka o yel dau so' me ye, “Dolim.” Amaa ka dau la yel o ye, “Kel ka m keŋ mumi m saam yiiga.” 60Ka Yesu lebis o ye, “Kel ka bane kpi mumi ba meŋ ku'um. Amaa fun kem mool Wina'am na'am labaar la.” 61Ka dau yinni yel ye, “Zugsoba, m na dol uf, amaa kel ka m keŋ keesi m yidim.” 62Ka Yesu lebis o ye, “One wusa gban'e na'akuoda kuunr ye o kua ka gosid nya'aŋ, o pu su'um ye o tum Wina'am so'olim tuumaa.”

will be added

X\