LUUK 8

1Ne'eŋa nya'aŋ la ka Yesu keŋ teŋ poosin ne teŋkpemisin n moon Wina'am na'am labasuŋ la yela. Ka o nya'andolib piinayi la dol o, 2la'am ne po'ab bane ka o kad kikiris yiis ba ni ka ti'eb ba wiim la. Po'a yinni yu'ur buon Meeri Magdalene, on ka kikirisa ayopoi daa yii o ni la, 3ne Joanna one a Kuza po'a. Kuza a kpeenm kane gosid na'ab Herod la'ad. Ka Susaana ne po'ab bedego me paas bane more ba meŋ la'ad suŋid Yesu ne o nya'andolib la. 4Ka nidib kpelim yit teens kon'ob kon'ob n kenn Yesu sa'an na. Ka ban daa ti la'as bedego na la, ka o siilim ba siiliŋ ye, 5“Dau daa yi ye o waali o bunbuuda. On waan la ka sieba lu suer zug ka nidib noo li ka niis kena di, 6ka sieba lu tampiing zug ka bul ka ma'asim kae' la zug ka li zenrigi kpi. 7Ka bunbuud sieba lu gon'os soogin n due ne gon'os la ka gon'os la sianki ba. 8Ka sieba lu teŋ suŋin due n wel biili bedego.” Ka o tansi yel ye, “One na wum on wum.” 9Ka o nya'andolib la bu'osi o siiliŋ la gbin. 10Ka o yel ye, “Wina'am ke ka ya baŋ Wina'am na'am yelsua'ada la. Amaa bane kpelim la wumi line siilis poogin, ka ba na gos ka ku nyee, ka na wum ka ku baŋi li gbin ne.” 11Siiliŋ la gbin ane anwa. Bunbuuda la ane Wina'am pian'ad la. 12Ka bunbuuda bane lu suer zug la ane bane wum pian'ad la amaa ka Sutaana kena yiisidi li ba sunya ni ka ba ku nyaŋe siak ka tilige. 13Ka bunbuuda bane lu tampiing zug la ane bane wum pian'ad la ka di'e li ne sumalisim, amaa ka li pu kpen'e ba sunya ni su'uŋaa, ka ba siak li bi'ela. Ka makir saŋa ya'a kena ka ba bas. 14Ka bunbuuda bane lu gon'os soogin la ane bane wum pian'ad la, ka dunia yela ne dunia boodim ne araza'as ya'amleog kpen'e ba n sianki ba ka ba pu nyaŋe wel wela. 15Ka bunbuuda bane lu teŋ suŋ ni la ane bane wum pian'ad la ka gban'e li su'uŋa ne ba sunya wusa ka modig n wel wela la. 16“So' pu nyu'ed fitla ka nok si'el pibin na bee sua' li dug leuŋune. O na suunli li si'el zug, ka bane kpen'ed la nye neesim. 17Si'el kae' na sua' ka li ku yinaa, ka si'el kae' na ligil ka ba ku baŋi, bee ba more li yi paalo nii. 18Dinzugo baŋimi yanam wum si'em la su'uŋa. Ka on wusa mor si'el ba na paas o, amaa one ka'a si'ela hale one ten'es ye o mor bi'ela la ba na di'e li o sa'an.” 19Ka Yesu ma ne o pitib kena ka pu nyaŋe paae o sa'ane, nidib la zu'e la zug. 20Ka so' yel o ye, “Fu ma ne fu pitib be samanin n bood uf.” 21Ka o lebisi ba wusa ye, “Bane a m ma ne m pitib la ane bane wum Wina'am pian'ad ka siaki li la.” 22Ka daar yinni, ka Yesu ne o nya'andolib kpen' aaruŋin, ka yeli ba ye, “Keli ka ti lo'oŋ beuŋ la gbeug.” Ka ba due keŋ. 23Ka ban lo'oŋid la, ka gbeenm zeeg Yesu ka o gbisid. Ka sisi'etita'ar due ku'om la zug, ka ku'om kpen'ed aaruŋ la poogin, ka li lieb toog n tisi ba. 24Ka ba keŋ nie Yesu n yel o ye, “Pa'anaa, pa'anaa, ku'om boodi dii ti.” Ka on nie la, o yel sisi'em la ne ku'opila la ye, “Niŋimi foonn.” Ka li kpelim lebi a baanlim. 25Ka o bu'osi ba ye, “Bo ka ya pu niŋ man yadda?” Ka dabiem kpen'e ba. Ka ba lidig n bu'os taaba ye, “Dau kaŋa a bo n pian'ad ne sisi'em ne ku'om ka ba siakid o noore?” 26Ka ba paae Gerasene teŋgbauŋin line kpi'e Galilee so'olim la. 27Ka Yesu yi aaruŋ poogin la. Ka teŋ la nid yinni tu'os o, on ka kikiris dol o. O pu yeed fuugo, hale ka li yuug, ka o me pu gbeend yin ne, ka bene yaad zin'igin. 28- 29Noor bedego ka kikirig la yiti gban' o. Ka ba gur o, ka lo o noba ne o nu'us wusa ne bana. Ka o kens bana la. Ka kikirig la kad o kpen'es moogin. Ka Yesu yel kikirig la ye, “Yim ka bas dau la.” Ka dau la nye Yesu la, ka igin o tuon n tansid ne kukotita'ar n bu'osid ye, “Yesu, Wina'am one ka'a tiraan la biiga, bo be man ne fun sisoogine? M sosid uf ye fu da daami ma.” 30Ka Yesu bu'os o ye, “Fu yu'ure?” Ka o lebis ye, “M yu'uri buon Legion.” (Li gbin a ye, bedego.) O yel ala bozugo kikiris bedego dol o. 31Ka kikiris la sos Yesu ye, o da kadi ba ka ba keŋ bumbok zuluŋ la nii. 32Ka kukurnam bedego be zuer zugin n onbid mood. Ka kikiris la sos Yesu ye o tisi ba noor, ka ba kpen' kukurnam la ni. Ka o siak tisi ba. Ka kikiris la bas dau la ka keŋ kpen' kukurnamin la. 33Ka kukurnam la wusa zo sig beuŋ poogin, ka ku'om dii ba. 34Ka bane guru ba la nye bun line maal la, ba zo keŋ teŋ poogin ne teŋ kpemis n pian'ad line maal la wusa. 35Ka nidib keŋ ye ba gos bun line n pa'a maal la, ka kenn Yesu sa'an na n nye dau kane ka kikiris yi ka bas o la. Ka o ye' fuud n zin'i Yesu tuon ka yu'un mor ya'am su'uŋa. Ka dabiem kpen'e ba. 36Ka bane nye la tu'asi ba, Yesu n niŋ si'em ka ti'eb dau kane ka kikiris pa'a dol o la. 37Ka Gerasene teŋ gbauŋ nidib la wusa sos Yesu ye, o yimi ba teŋin, bozugo dabiem bedego kpen'e ba. Ka Yesu kpen' aaruŋ ye o leb kul. 38Ka dau kane ka kikiris la yi ka bas o la, sos Yesu noor ye o dol o. Ka Yesu zan'as ka yel o ye, 39“Lem kul fu meŋ yin n pa'al bun lin wusa ka Wina'am maal tis uf la.” Ka o keŋ teŋ poogin wusa n moon Yesu n niŋ si'el bedego tis o la. 40Ka Yesu lem lo'oŋ beuŋ la guur ayinni la, ka nidib bedego pun la'as zi'e gur o. 41Ka dau yinni one a la'asug doog kpeenm ka o yu'ur buon Jairus kena igin Yesu tuon n sos o ye, o kem o yin na; 42ka o po'ayua yimir one a yuma piina ayi bood ku'um. Yesu n dol o wa'ae la, ka nidib bedego dol ka mik o. 43Ka po'a so' daa be anina n ben'ed ka ziim yuod o ni yuma piina ayi, ka o sa'am on mor si'el wusa tiim dim sa'an, amaa so' pu nyaŋe ti'eb oo. 44Ka o kena n paae Yesu nya'aŋ n si'is o fuug noor ka o ziim la yuob gu'e. 45Ka Yesu bu'os ye, “Ano'one si'is ma?” Ka so' wusa ki'is. Ka Piita yel ye, “Zugsoba, nidib la wusa la'ase giligi uf mik si'em nwaa.” 46Ka Yesu yel ye, “So' si'is m, bozugo paŋi n yi m sa'an la zug ka m baŋ.” 47Po'a la baŋ ye o ku nyaŋe su'a ne Yesu la ka o kena ne kikirug n lu vabin o tuon, ka pian' ka nidib bane be anina wusa wum dinzug ka o si'is Yesu, ne on paam laafe vuguri la yela. 48Ka Yesu yel o ye, “M po'ayua, fu yadda niŋir ke ka fu nye laafe. Kem ne sumalisim.” 49Ka on nam kpelim pian'ad la ka nid yi la'asug doog kpeenm la yin na, n yel Jairus ye, “Fu po'ayua la kpiya. Dinzug da lem daam pa'an la ya'ase.” 50Ka Yesu wum ka yel Jairus ye, “Da zo' dabiem, amaa niŋim ne yadda gullim ka fu po'ayua la na paam laafe.” 51Ka Yesu keŋ paae yin la ka pu ke ka so' dol o kpen' yin laa, asee Piita ne Jemes ne Joon ne biig la saam ne o ma. 52Ka one wusa be yin la kum ka fabin biig la yela. Ka Yesu yeli ba ye, “Da kaasida, ka biig la gbisidne ka o pu kpii.” 53Ka ba la' o, ban mi' ye biig la kpine la zug. 54Ka Yesu gban'e biig la nu'ug ka buol o ye, “Biiga duom.” 55Ka o nyovur leb na, ka o due to'oto. Ka o yeli ba ye, “Tisim biig la si'el ka o di.” 56Ka o ba' ne o ma daa lidig hale, amaa ka Yesu yeli ba ye ba da yel so' line maali.

will be added

X\