1 One tu'as nidib la ne'eŋanam wusa n naae la ka keŋ paae Kapeenum. 2 Ka Room sogia kpeenm be anina n more o tumtum on ka o noŋ ka o ben'ed n bood ku'um. 3 Ka o wum Yesu labaar ka tum Jew dim kpeenm sieba o sa'an n sos o ye o kena n ti'eb o tumtum la. 4 Ka ba kenn Yesu sa'an na n belim o hale n yel ye, “Li nar ka fu suŋ dau kaŋa. 5 Bozugo o noŋi ti buudi ka me' la'asug doog n tisi ti.” 6 Ka Yesu n doli ba wa'ae, n ti li'el yir la, ka sogia kpeenm la tum o zuanam ye ba yel o ye, “Zugsoba, da namisi fu meŋa. M pu nar ka fu keenn m yin naa, 7 dinzug ka m pu ten'es ye mam meŋ nar ka m keenn fu sa'an naa. Kudim pian'am ne noor ma'aa ka m tumtum la nye laafe. 8 Ka man meŋ ane sogia, ka more sogianam kpeenmnam bane so'e man, ka man me so'e sieba. Ka m ya'a yel oŋa ye o kem, o kenne, ka m ya'a yel o ye kem na, ka o kenna. Ka m ya'a yeli m tumtum ye o niŋim ne'eŋa, o niŋidne.” 9 Yesu n wum ne'eŋa la o daa lidig ne ka fendigi n yel nidib bane dol o la ye, “M nam pu nye yadda niŋir daan wenne dau kaŋaa, hale Israel teŋin ne.” 10 Ka bane ka o tum la lebi ba sogia kpeenm la yin n nye ka tumtum la mor laafe. 11 Ka beug nie ya'as ka Yesu keŋ Nain teŋin ka o nya'andolib ne nidib bedego dol o. 12 Ka on paae teŋ la yaŋirin la o nye ka ba zeed ku'um yit na. Dau one kpi la daa ane pokoonr biyimir ka teŋ la nidib bedego be o sa'an. 13 Ka Zugsob nye pokoonr la ka nimbaanlig gban' o ka o yel o ye, “Da kaasida.” 14 Ka Yesu keŋ n si'is soŋduoya la. Ka nidib bane zeed la zi'en ka o ye, “Dasaŋ bila, m yet uf ye, duom.” 15 Ka one kpi la vu'ug due zin'in ka pin'ili pian'ad. Ka o zaŋ o tis o ma. 16 Ka dabiem kpen' so' mekama ka ba zun'e Wina'am ka yel ye, “Wina'am nodi'es tita'ar nie ti sa'an na.” Ka lem ye, “Wina'am kena kaae o nidib.” 17 Ka labakaŋa gilig Juuda teŋgbauŋin ne teens bane kpi'e la wusa. 18 Ka Joon nya'andolib n tu'as Joon ne'eŋanam wusa la, ka o buol o nya'andoliba ayi 19 n tumi ba Zugsob la sa'an ye ba bu'os o ye, “Fune la a on ka ba da ye o na kena laa, bee ti gu'usim so'?” 20 Ka ba paae Yesu sa'an na n yel o ye, “Joon one suud nidib ku'om la tumi ti na ye ti bu'os uf ye, ‘Fune la a on ka ba da ye o na kena laa, bee ti gu'usim so'?’ ” 21 Saŋkan la ka Yesu ti'eb ban'adnam bedego bane mor wiim buudi buudi ne bane ka kikiris doli ba la, ka ke ka zunzoos bedego nini yu'un nyet. 22 Ka o lebis ban ka Joon tum na la ye, “Lem yeli Joon yaname nye si'el ka la'am wum si'el la. Zunzoos nini nyet, ka wabis ken, ka kukoma nyet laafe, ka tobkpida wum ka bane kpi vu'ug kumin, ka labasuŋ la mooli n tis tadimnam. 23 Sumalisim be ne one pu bi'esid ne man yelaa.” 24 Ban ka Joon tum na la, leb la, ka Yesu pin'il n bu'os nidib Joon yela ye, “Ya daa yii keŋ moogin la n bood ye ya nye bo? Ya nye moog kan ka pebisug da'ad ka li del bee? 25 Bo ka ya daa yi ye ya nye? Ya nye dau ka o ye' na'am fuude? Nidib bane yeed na'am fuud ka ba la'ad wusa a su'um bene na'ayin. 26 Yelimini ma, ya daa yi ye ya nye ne Wina'am nodi'es bee? Asida ka m yeti ya ye, ya daa nye one gat nodi'es. 27 Ka Joon a one ka li sobi o yela ye, ‘Wina'am yel ye, “Oŋa a m tumtum ka m tum o ye o deŋimi fu tuon maal suer.” ’ ” 28 Ka Yesu yel ye, “Po'abi du'a sieba wusa pu gaadi Joon ne, amaa one kpelim kpaanr Wina'am na'amin la gat Joon.” 29 Ka nidib la wusa ne lampodi'esidib la n wum ne'eŋa la ka zun'e Wina'am. Ba ane bane ka Joon daa pun su ba ku'om. 30 Amaa Farisee dim la ne gbauŋmi'idib zan'as line ka Wina'am bood ye o mooli n tisi ba la. Ba ane bane pu siak ka Joon suu ba ku'om la. 31 Ka Yesu bu'os ye, “Dinzugo bo ka m na nok mak ne zumaaŋkaŋa nwa nidiba. Ba wen wuu bo? 32 Ba wen wuu biis n di'em da'an ka yel taaba ye, ‘Ti zaŋ wiigi pieb ka ya pu wa'ada. Ka ti da'a kuur ka ya pu kaasida.’ 33 Joon one suud nidib ku'om la daa kena n lo noor ka pu nuud daam ka ba yel ye, kikirig dol o. 34 Ka Ninsaal Biig la kena n dit ka nuud ka ba yel ye, gosim dau kaŋa a dindiis ne danuud, ka a lampodi'esidib ne tuumbe'ed dim zua. 35 Bane dol ya'am suer la pa'al ye ba mor ya'am.” 36 Farisee dim nid yinni daa buol Yesu ye, o kenn o yin na, ka ba di. Ka o keŋ yin la n zin'in ye o di. 37 Ka teŋ la dim po'a so', one a tuumbe'ed sob, wum ye Yesu be Farisee nid la yin n dit diib, ka kena, n mor tudaare ka li be kolibveniŋin, ka li nyuug malis. 38 Ka o kena n zi'e n kpi'e Yesu noba baba n kum. Ka o ninto'om yi n mad Yesu noba. Ka po'a la duus Yesu noba la ne o zuobid, ka muak o noba, ka suenn ba ne tudaare la. 39 Ka Farisee nid one buol Yesu la n nye li la, o yel o poogin ye, “Dau kaŋa ya'a ane Wina'am nodi'es, o naan baŋin po'a kane si'is o la a so', bozugo po'a nwa ane tuumbe'ed sob.” 40 Ka Yesu yel dau la ye, “Simon, m mor si'el ye m yel uf.” Ka o lebis n bu'os ye, “Pa'ana, li a bo?” 41 Ka Yesu yel o ye, “Dau da be, ka mor o samditib ayi. Ka arakon' sam a ligidi yolug kobusnu. Ka arakon' la me mor piisnu. 42 Ka bane da pu nyaŋ yo la zug, o bas ligidi la n tisi ba. Babayi la, ano'on na noŋ ligidi daan la bedego?” 43 Ka Simon lebis o ye, “M ten'es ye, one ka o sam zu'e la.” Ka Yesu yel o ye, “Fu lebisug la a sida.” 44 Ka o gi'e n gos po'a la, ka bu'os Simon ye, “Fu nye po'a nwaa?” Ka yel o ye, “Man kpen' fu yin na la, fu pu tisi m ku'om ye m pie m nobaa. Amaa po'a la pie m noba ne o ninto'om, ka duusi ba ne o zuobid. 45 Fu pu na'asi m, n muak m noore. Amaa man n kpen' na la, po'a la pu bas man noba muakire. 46 Fu pu tisi m kpaam ye m suenn m zugoo, amaa o suenn man noba ne tudaare. 47 Dinzugo m yet uf ye, Wina'am yiis o tuumbe'ed bane zu'e la n bas, ka o noŋilim line zu'e la pa'ani li. Amaa on ka Wina'am yiis o tuumbe'ed bi'ela n bas la, o noŋilim ane bi'ela men.” 48 Ka Yesu yel po'a la ye, “Fu tuumbe'ed la yiya ka bas uf.” 49 Ka bane daa dit ne o la, pian'ad ne taaba n bu'osid ye, “Ano'on nwa n yiisid nidib tuumbe'ed n basida?” 50 Ka Yesu yel po'a la ye, “Fu yadda niŋir la faann uf. Kem ne sumalisim.”
