LUUK 6

1Vu'usum daar yinni ka Yesu buŋid kipoog ka o nya'andolib gisid ki la nwe'emi n onbid. 2Ka Farisee dim sieba yel ye, “Bo ka ya tum line ka ti wada kis vu'usum daare?” 3Ka Yesu lebisi bu'osi ba ye, “Ya pu karem David ne dap bane da be ne o ka ba ko'om da zabid ka David niŋ si'em laa? 4O da kpen' Wina'am pu'usum doogin n di bodobodo line pu su'um ye nidib dit yoo yoogo, asee Wina'am maalmaan gullim.” 5Ka o yeli ba ye, “Ninsaal Biig la a one so'e vu'usum daar la.” 6Vu'usum daar yinni ya'as ka Yesu kpen' la'asug doogin n pa'an nidib. Ka dau da be anina ka o datiuŋ nu'ug kpi. 7Ka gbauŋmi'idib ne Farisee dim gosid dau la kii ye Yesu na ti'eb nidib vu'usum daar la, bee o ku ti'ebe. Ba da boodne suer kan ka ba na ye o tum taal on sa'am vu'usum daar la. 8Ka Yesu baŋ ba ten'esa ka yel dau nu'ukpiiliŋ la ye, “Duom n zi'en nidib la soogin.” Ka o due zi'en anina. 9Ka Yesu yeli ba ye, “Kel ka m bu'osi ya, suer be ka so' na maal su'um bee be'ed vu'usum daare?” Ka lem bu'os ye, “Li a su'um ka ti tilig nidib be ti ku?” 10Ka o gosi ba wusa gilig ka yel dau la ye, “Tienmi fu nu'ug la.” Ka o tienn ka nu'ug la leb niŋ su'uŋa wuu nu'ug kaŋa la. 11Ka ba sunya pelig hale ka ba gban'ed ban na niŋ o si'em. 12Ka saŋkan la ka Yesu daa yi teŋin n du zuer zug ye o sos Wina'am, ka be ani yu'uŋkan wusa n sosid Wina'am. 13Ka beugo nie la, ka o buol o nya'andolib n gaans ban piiga ne ayi, ka buoni ba ye Tumtumnib. Li gbin ane bane ka o tum la. 14Ba da ane Simon on ka o tis o yu'ur ya'as ye Piita, ne Andrew on a Piita ba'abiig, ne Jemes ne Joon ne Filip ne Bartolomew 15ne Mateo ne Tomas ne Jemes one a Alfeus biig la, ne Simon one ka ba buon ye Zealot, 16ne Judas one a Jemes biig la, ne Judas Iskariot one daa lieb zam sob la. 17Ka Yesu ne o nya'andolibi naan zuer la zug sig na la, nidib bedego la'as o sa'an na ne nidib bedego bane yi Juuda ne Jerusalem ne ateuk noorin line be Taya ne Sidon so'olim. 18Ba kena ye ba kelis o pian'ad la ka o lem ma'ae ba ban'as. Ka ban ka kikiris daamne ba daa nye laafe. 19Ka nidib bedego wusa bood ye ba si'is o, bozugo paŋ yitne o ni tisid ba wusa laafe. 20Ka Yesu godigi o nini n gosi o nya'andolib la ka ye, “Yelsum be ne yaname a noŋdim la, bozugo Wina'am na'am la a ya din la zug. 21Yelsum be ne yanam ban ko'om zabid nannanna. Ya na ti dii siak. Yelsum be ne yanam bane kaasid. Ya na ti la'ad. 22Yelsum be ne yanam ban ka nidib kis ka zan'asi ya ka tu'udi ya wenne ya ane tuumbe'ed dim, Ninsaal Biig la zug. 23“Li ya'a niŋ ala yanam maalimi sumalisim dabiskan, ka wa' ne sumalisim, ya nyood tita'ar n be arazana ni la zug. Ala men ka ba yaanam daa niŋ n tis Wina'am nodi'esidib la. 24‘Woo! Li na toe tis yanam kpan'amnam, yanam pun nye yaname bood si'el la zug. Woo! Li na toe tis yanam bane tig nannanna. Ya na ti ken ne ko'om. 25Woo! Li na toe tis yanam bane la'ad nannanna. Ya sunya na ti sa'am ka ya kaas. 26Woo! Li na toe tis yanam ban ka nidib wusa na pian' ya yela su'uŋa. Ba yaanam daa niŋ ne ala n tis ziri nodi'esidib la.’ 27“Amaa m yeti yanam bane wumi m pian'ad la ye, noŋimi ya bi'emnam, ka tumi su'um tisid bane kisi ya. 28Ka kaanbid su'um n tisid bane kaanb be'ed n tisidi ya. Ka pu'usid Wina'am tisid bane tu'udi ya. 29So' ya'a nwe' fu yier yinni fun kel ka o nwe' line kpelim la men. Ka so' ya'a faaenn fu banaa fun kel ka o zaŋi fu dansik n paas. 30Ka one wusa sos uf si'el fun tisim o. Ka so' ya'a zaŋ line a fu bun fun da di'e ya'ase. 31Niŋim bam wuu fun bood ye ba niŋ uf si'em la.” 32“Ya ya'a noŋ bane noŋi ya ma'aa li su'um a bo? Hale tuumbe'ed dim noŋ bane noŋi ba. 33Ka ya ya'a maal su'um tis bane maal su'um n tisi ya ma'aa, li su'um a bo? Hale tuumbe'ed dim niŋidi ala. 34Ka ya ya'a pe'eŋi tis bane gullim ka ya mi' ye ya na lem di'e li, li su'um a bo? Hale tuumbe'ed dim pe'eŋid tuumbe'ed dim ka di'ed ya'as. 35Amaa noŋimi fu bi'emnam, ka maal su'um n tisi ba. Pe'eŋim tis ka da ten'esid ye fu di'e ya'ase, ka ya nyood na niŋ buntita'ar. Ka ya na a Wina'am one gaad bun wusa la biis. Bozugo o a su'um n tis bane zi' bareka pu'usum hale ne bugusum dim. 36Zom nimbaanlig wuu ya Ba' Wina'am n zot nimbaanlig si'em la.” 37“Da pian'ad ye ya taab maal be'ede, ka ba ku niŋ ala tisi yaa. Da yel ye nidib ka' boode, ka ba ku ye ya ka' boode. Dimi ya taaba suguru, ka ba na niŋ ala n tisi ya. 38Tisim bam ka Wina'am na tisi ya mak suŋ ka li din'isi pe'eli yaam ka ya di'e li ya fuudin. Yaname mak si'em n tisi ya taaba la, ala ka Wina'am me na maki tisi ya.” 39Ka Yesu yeli ba siiliŋ kaŋa ye, “Zunzoŋ na nyaŋe ve' o zunzoŋ tiraan ka ba wusa ku lu bumbokinee? 40Zamis pu gati o pa'ana amaa zamis on wusa naae o zamisug, o na wen wuu o pa'an ne. 41“Bo ka fu nye sauk bil kane be fu zua nifin amaa ka pu nye datita'ar kane be fu meŋ nifin ne? 42Fu na niŋ wala n yeli fu zua ye, kel ka m yiis sauk la fu nifin, amaa ka pu nye datita'ar kane be fu meŋ nifin ne? Zam daana, yiisim datita'ar la fu meŋ nifin yiiga ka naan nyaŋe nye su'uŋa ka yiis sauk bil kane be fu zua nifin la.” 43Tisuŋ kae' n wen wel be'ede. Tibe'ed me kae' n wen wel sumaa. 44Ba baŋid tiis wusa, ne ba wela ni. Gon'os ku wel kekamaa, ka zaaŋ me ku wel ganyaa. 45Ninsuŋ niŋid tuumsuma ka li yitne o popielim ne poten'esuŋ line yit o sunfin. Ka nimbe'ed me tumid tuumbe'ed ka li yi poten'ebe'ed line be o sunfin. Ninsaal noor pian'ad bun lin wusa be o sunfin. 46“Bo ka ya buon man ye, ‘Zugsoba, Zugsoba,’ ka lee pu tum lin ka m yeti ya? 47On wusa kenn m sa'an na ka kelisi m pian'ad ka tumi li, m na pa'ali ya on wen so'. 48O wenne dau one bood ye o mee o yir ka tuu paae tampiing zug n me'. Ka saa ni ka ku'om pe'el kolis n badigi du na geel yikaŋa, ka li pu luu, lin me' su'uŋa la yela. 49Amaa one wum m pian'ad ka pu tumi lii, o wen wuu dau one mee o yir teŋ zug, ka pu tu eenbire. Ka saa ni ka ku'om pe'el kolis n badigi du na geel yir la, ka li lu yimmo n sa'am hale.”

will be added

X\