LUUK 5

1Yesu daa zi'ene n kpi'e Gennesaret beuŋ noorin, ka nidib muk o, ye ba wum Wina'am pian'ad. 2Ka o nye aaruma ayi ka ba zi'e kpi'e beuŋ la ka ziŋgban'adib yi ba poogin n piesidi ba la'ad line ka ba more gban'ed zimi. 3Ka o kpen' aaruŋ yinni ni line a Simon din ka yel o ye, “Da'ami li ka li keŋ bi'ela.” Ka o niŋ ala. Ka Yesu zin'in aaruŋ la poogin n pa'an nidib la. 4Ka on pa'ali ba naae la ka yel Simon ye “Da'am aaruŋ la n keŋ ku'ozuluŋin ka sigis fu la'ad line gban'ed zimi la.” 5Ka o lebis ye, “Zugsoba, ti namisne yu'uŋin sa ka pu gban'e si'ela, amaa fu yelug la zug m na sigisi m la'ad line gban'ed zimi la.” 6Ka ba niŋ ala ka gban'e zimi bedego hale ka ba la'ad la bood aansug. 7Ka ba amisi buol ba taaba aaruŋ yinni la ni ye ba kena suŋi ba. Ka ba kena suŋ ba, ka ba pe'el aaruma ayi la wusa ne zimi hale ka ba bood siimug. 8Simon Piita n nye ne'eŋa la, ka o igin Yesu tuon n yel o ye, “Zugsoba, yimi m sa'an, ka man ane tuumbe'ed sob.” 9Bozugo on ne o taaba la daa nye zimi la gban'abi a si'em la ka li lidigi ba. 10Ala men ka li daa lidig Zebedee biis Jemes ne Joon ban daa a Simon tumtum taaba la. Ka Yesu yel Simon ye, “Da zot dabiem, ka nannanna wa'ae sa fu na la'ased nidib wenne fun daa gban'ad zimi si'em la.” 11Ka ba mor aaruma la n du'os guur, ka bas si'el wusa ka dol Yesu. 12Ka Yesu daa be teŋ si'a ni ka dau so' daa a kukom n kenn anina. Ka on nye Yesu la, o lu vabin teŋin n pu'us o, ka yel o ye, “M Zugsoba, fu ya'a bood, fu maali m ka m nye laafe nyain.” 13Ka Yesu tien o nu'ug n si'is o ka ye, “M bood, nyem laafe nyain.” Ka wiim la bas o aniŋa yim. 14Ka Yesu yel o ye, “Mit ka fu yel so', amaa kem noki fu meŋi n pa'al Wina'am maalmaan, ka maal maan n tis Wina'am wuu Moses da sob ye ba niŋ si'em la, ka li pa'al nidib ye fu yu'un mor laafe.” 15Amaa Yesu labaar la daa lem yadig bedego ka nidib bedego kena ye ba kelis o pian'ad ka o ti'ebi ba wiim la. 16Amaa o yiti ken zin'ikan ka nidib kae' la n sosid Wina'am. 17Ka daar yinni ka o pa'an nidib ka Farisee dim ne wada pa'anib bane be Galilee ne Juuda ne Jerusalem keenn o sa'an na. Ka Zugsob paŋ daa be o ni ka o ti'eb ban'adnam. 18Ka dap sieba kena n zeed dau ka o a pon'or ka o digi o digisig zug n kpe'eŋid ye ba mor o kpen' yin la n digil o Yesu tuon. 19Ka nidib la muk la zug ka ba pu nyaŋe nye paalo mor o kpen'ee, ka zee o n du mopil la zugin n kibig voonr n sigis o ne o digisig la nidib la soogin n digil o Yesu tuon. 20Ka Yesu nye bane zee pon'or la niŋ o yadda si'em la, ka yel pon'or la ye, “M zua, fu tuumbe'ed yiya ka bas uf.” 21Ka wada pa'anib la ne Farisee dim pin'ili n bu'osid taaba ye, “Ano'one nwa pian'adi sa'amid Wina'am yu'ure? Ano'one na nyaŋe n yiis tuumbe'ed n basi, ka ka'ane Wina'am gullimne” 22Amaa Yesu baŋ ban ten'esid si'el la ka bu'osi ba ye, “Bo ka ya ten'esid ne'eŋanama? 23Bo a na'ana ne man naan yelin ka li niŋine? M yiisi fu tuumbe'ed n bas la bee duom keŋe? 24M yu'un na pa'ali ya ye Ninsaal Biig mor paŋ dunia ni n na yiis tuumbe'ed n bas.” Ka o yel pon'or la ye, “Duom ka noke fu digisig la n kul.” 25Aniŋa yim ka pon'or la due ba wusa tuon, n nok o digisig kan ka o digin la kun ka zun'od Wina'am. 26Ka ba wusa lidig ka dabiem kpen'e ba ka ba zun'od Wina'am n yet ye, “Ti nye yel nyalima zina.” 27Ne'eŋa nya'aŋ ka Yesu yi ka nye lampodi'es ka o yu'ur buon Levi ka o zin'i lampo di'esug doogin. Ka Yesu yel o ye, “Dol man.” 28Ka o due ka bas si'el wusa ka dol o. 29Ka Levi maal diib o yin n tis Yesu ka on ne lampodi'esidib ne nidib bedego zin'i dit. 30Ka Farisee dim sieba ne ba wada pa'anib nyone tisid Yesu nya'andolib la ye, “Bo ka ya dit ka la'am nuud ne lampodi'esidib ne tuumbe'ed dima?” 31Ka Yesu lebis ye, “Nimbane mor laafe pu bood du'ataa. Asee bane ben'ed ma'aa bood. 32M pu kena ye m buol popielim dima, amaa m kena ye m buol tuumbe'ed dim ka ba tiak.” 33Ka sieba yel o ye, “Joon nya'andolib lood noor saŋa wusa ka pu'usid Wina'am la'am ne Farisee dim nya'andolib, amaa fun nya'andolib ditne ka nuud.” 34Ka o lebis ye, “Ya ten'es ye bane keŋ po'adiir di'ema na tun'e lo noor ka po'a saan la sid naan be ba ni bee? 35Amaa saŋa na kena ka ba na zaŋ po'a daan la yiisi ba sa'an. Ka li saŋa ka ba me na lo noor.” 36Ka Yesu yeli ba siiliŋ ye, “So' pu zaŋid fupaali n ligid fukudugo. O ya'a niŋ ala o na sa'am fupaalig la. Ka pien paal la ku di'e ne fukudug laa. 37So' men pu lied danpaal waa kudug nii. O ya'a niŋ ala danpaal la na ke ka waa la tans, ka daam la me kpa'e ka waa la sa'am. 38Danpaal liedne wapaalis ni. 39So' pu nuud daam kane bi'ig ka lem bood pubi'ire. O na yel ye, dakane bi'ig la a su'uŋa.”

will be added

X\