LUUK 4

1Ka Wina'am Siig Suŋ la pe'el Yesu ka o naam Joodan kodaugin la leb na, ka Wina'am Siig Suŋ mor o keŋ moogin. 2Anina ka Sutaana mak o dabisa piisnaasi. Ka o pu di si'el dabisban nii. Ka lin gaad la ka o ko'om zabid. 3Ka Sutaana la yel o ye, “Fu ya'a a Wina'am Biig fun yelim kuga nwa ka li kilim diib.” 4Ka Yesu lebis o ye, “Li sob Wina'am gbauŋin ye, ‘Ninsaal pu voe diib yela ma'anee.’ ” 5Ka Sutaana la mor o keŋ du zuer zug ka pa'al o dunia so'olim wusa. 6Ka yel o ye, “M na tis uf paŋ kaŋa ne li kpan'am wusa. Ba tis mam ne ka man me na tis on wusa ka m bood. 7Dinzug fu ya'a siaki zun'e man, li wusa na niŋi fu din.” 8Ka Yesu lebis o ye, “Li sob ye, fu zun'em fu Zugsob Wina'am gullim ka tumi n tisid on ma'aa.” 9Ka Sutaana la lem dol o keŋ Jerusalem n du'os o Wina'am pu'usum yir zug, ka yel o ye, “Fu ya'a a Wina'am Biig fun basimi fu meŋ ka naami agol la n lu teŋin; 10ka li sob ye, Wina'am na tumi o maleknam ka ba gur uf. 11Ka ba na mor uf ne ba nu'us ka fu ku tu'ugi fu nobir ne kugire.” 12Ka Yesu lebis ye, “Wina'am gbauŋ yel ye, mit ka fu maki fu Zugsob Wina'am.” 13Ka Sutaana la mak o naae la ka bas o saŋa bi'ela. 14Ka Yesu leb Galilee ne Wina'am Siig Suŋ la paŋ. Ka o labaar gilig teŋ kpemisin wusa. 15Ka o zamisi ba la'asug doodin ka ba wusa pian' o yela su'um. 16Ka Yesu daa keŋ Nazaret ban da ugus o teŋ si'a la. Ka Jew dim vu'usum daar, ka o kpen' la'asug doogin wuu on yiti kpen'ed si'em la, ka due zi'en ye o karem. 17Ka ba tis o gbauŋ kane ka Wina'am nodi'es Azaya da sob la. Ka o lak gbauŋ la, ka nye zin'ig kan ka li sob ye, 18“Zugsob Siig la be m ni, ka gaŋem ye m mool labasuŋ la tis noŋ dim ka tumi m ye m mooli tis bane namisid la, ba yolisim yela, ka nie zunzoos nini, ka yiis bane be namisug poogin la n bas, 19ka mool saŋkan ka Zugsob na zo nidib nimbaanlig ka di'e ba.” 20Ka o kpilim gbauŋ la n lebis n tis one gur gbana la, ka zin'in. Ka nidib ban wusa be la'asug doogin la gosid o kii. 21Ka o pin'il n yeti ba ye, “Zina nwa lin ka ba sob Wina'am gbauŋin ka m karem nwa la niŋ ameŋa.” 22Ka ba pian' taaba o pian'asuma la yela, ka bu'osid ye, “Li ka' Josef biig la nwaa?” 23Ka Yesu yeli ba ye, “M mi' ye ya na siilim siiliŋ kaŋa ye, ‘Tiim daana, ti'ebim fu meŋ.’ ” Ka lem yel ye, “Bun lin ka fu daa niŋ Kapeenum teŋin ka ti wum la, niŋimi li fu meŋ teŋin kpela men.” 24Ka o yel ye, “Ameŋa ka m yeti ya ye, Wina'am nodi'es baa yinni ku nye pian'asuŋ o meŋ teŋine. 25Amaa li a ameŋa ka m yeti ya ye, pokonya bedego da be Israel teŋin Elija saŋa la, ka saa pu ni yuma atan' ne nwadis ayuobu, ka ko'om tita'ar lu teŋin la wusa. 26Amaa Wina'am pu tum Elija ye o keŋ pokoonbama la sa'ane. Ka lee tum o ne pokoonr yinni one be Zarefat teŋin line be Sidon so'olim la. 27Ka kukoma bedego da be Israel teŋin Elisa saŋa la, amaa baa yinni pu nye laafe. Asee Naaman one yi Siriya so'olim la gullim nye laafe.” 28Ka ban wum ala la'asug doogin la, ba wusa susunya daa pelig hale. 29Ka ba kad o teŋ la poogin mor o n keŋ zuer la zug ye ba tebug o bas ka o lu na. 30Amaa ka o kpen buŋ nidib la sisoogin n gaad keŋ. 31Ka Yesu da keŋ Kapeenum teŋ kane be Galilee ni la. Ka vu'usum daar ka o zamisi ba. 32Ka o pa'alug la lidigi ba, o pian'ad la daa mor paŋ la zug. 33Ka dau daa be la'asug doogin la ka kikirig dol o. Ka o tans ne kukor tita'ar 34ye, “Aa! Yesu one a Nazaret nida, fu ba'a bo be ne ti? Fu kena ye fu sa'ami ti nee? M mi' fun a so'. Fu ane Wina'am one a popielim sob la.” 35Ka Yesu yel kikirig la ye, “Kel vuud, ka yi o sa'an!” Ka kikirig la lub o nidib la soogin ka yi o ni na, ka lee pu poa'alim oo. 36Ka ba wusa lidig n yet taaba ye, “Pa'alug kaŋa a bo? Bozugo o mor paŋ ne kpi'euŋ ka tansid kikiris ka ba yit.” 37Ka o labaar gilig teŋ kpemisin wusa. 38Ka Yesu due yi la'asug doogin la n kpen' Simon yir. Ka Simon diem po'a ben'ed ka o niŋ tul. Ka ba pian' o yela n tis Yesu. 39Ka o keŋ zi'en o sa'an ka tans ban'a la, ka li bas o. Ka o due to'oto n maali ba saauŋ 40Ka winig n kpen'ed la ka ba mor ban'adnam ban wiim a gun gun n kenn Yesu sa'an na, ka o pa'ali o nu'us ba yinni yinni zugin n ti'ebi ba. 41Ka kikiris me yi sieba ni bedego na n tansid ye, “Fu ane Wina'am Biig.” Ka Yesu tansi ba ka pu siak ye ba pian'a si'el si'ela ban da baŋ ye o ane Kiristo one a Faangid la zug. 42Ka beug nie la ka Yesu yi teŋ poogin la keŋ zin'ig kane ka so' kae'. Ka nidib la bedego ie o hale ti nye o, ka mood ye o da lem yi ba sa'ane. 43Amaa ka o yeli ba ye, “Asee ka m mool Wina'am labasuŋ la teŋ sieba ni men, ka lin yela ka Wina'am tum man na.” 44Ala ka o moon labasuŋ la Juuda teŋ la'asug doodin.

will be added

X\