LUUK 3

1Ka na'ab Tiberius daa dit Room na'am la yuma piiga ne anu saŋa la, Pontus Pilate daa ane Juuda gomena. Ka Herod a Galilee na'ab. Ka o ba'abiig Filip, me a Ituria ne Trakonitis na'ab. Ka Lisanius a Abilene na'ab. 2Ka Annas ne Kaifas a Wina'am maalmaan kpeenmnam. Saŋkan la ka Joon, Zekaria biig la, daa be moogin, ka di'e Wina'am pian'ad, 3n keŋ teens bane be Joodan mo'ar ben wusa, moon ye, “Tiakimi ne ya sunya ka di'e Wina'am ku'om suub, ka Wina'am tisi ya suguru ka yiisi ya tuumbe'ed n bas.” 4Ka Wina'am nodi'es Azaya da sob gbauŋin ye, “So' moon moogin n tansid ye, ‘Maalimi suer su'uŋa n ti'ebi gur Zugsob la. Keli ka suer a su'um n tis o, 5ka pe'el bombu'a la wusa, ka birig zueya wusa, ka maal suegoluŋ ka li due sapi ka pin' suer bombu'a ka li niŋ su'uŋa. 6Ka ninsaalib wusa na nye Wina'am Faangir.’ ” 7Ka nidib bedego la'as n kenne o sa'an na ye o suu ba ne ku'om. Ka o yeli ba ye, “Yanam bane wenne wiigi nwa, ano'on yeli ya ye ya zom yi Wina'am supeen line kenna la ni? 8Tumi tuuma bane pa'an ye ya tiake ya sunya, ka da ten'esid n tisi ya meŋ ye, Abraham ane ya yaaba. Ka m yeti ya ye, Wina'am tun'e zaŋ kuga nwa maal yaas n tis Abraham. 9Nannanna lieŋ be tiis gbina ni, ka tikan wusa n pu wel welsuma la, ba na nwa'e li n lob bugumin.” 10Ka nidib la bedego bu'os o ye, “Ti na niŋ wala?” 11Ka Joon lebisi ba ye, “One mor fuud ayi, on pudugum tis one kae' la. Ka one mor diib on me niŋim ala.” 12Ka lampodi'esidib me kena ye o suu ba ne Wina'am ku'om, ka bu'os o ye, “Pa'ana, ti na niŋ wala?” 13Ka o lebisi ba ye, “Da di'e ligidi dine gaad ban yeli ya si'em la.” 14Ka sogianam me bu'os o ye, “Ka tinama, ti na niŋ wala?” Ka o yeli ba ye, “Da di'e so' bun ne paŋa, bee gban'e nidib zaalim zaalim, ka di'e si'ela. Keli ka ya yood la siakiya.” 15Ka nidib bane da gur Kiristo one a Faangid ken na la, pin'ile ten'esidi ba sunya ni ye Joon pa'ati ane Kiristo la. 16Ka Joon lebisi ba ye, “M suudi ya ne Wina'am ku'om, amaa so' be mor paŋ gat man, one kenna ka m pu nar ye m pidig o ta'adaa. O na suu ya ne Wina'am Siig Suŋ ne bugum. 17O zanl nwam kane yelegid ki o nu'usin, ka na yeleg o ki line be zieŋin la n vaae su buorin ka nyu'e udug ne bugum line pu kpiigida.” 18Pian'ad bedego nwa ka Joon da zaŋ n sa'al nidib on da moon Wina'am labasuŋ la. 19Amaa Joon pian' zerig na'ab Herod, on dii o meŋ pitu po'a one yu'ur buon Herodias ka tum tuumbe'ed sieba bedego la zug. 20Herod n daa gban'e Joon n kpen'es sarega ni la, daa maligim pa'as o tuumbe'ed la. 21Joon n da su nidib wusa ne ku'om la, o daa su Yesu men. Ka Yesu n daa pu'usid Wina'am la, ka arazana yo'og, 22ka Wina'am Siig Suŋ la sig o zugin na, ka ba nye o ka o wenne dawan ne. Ka kukor yi arazana na ye, “Fune a man meŋ bikan ka m noŋ hale, ka m sunf malis ne uf.” 23Ka Yesu n da pin'il o tuuma la, o da ane yuma piistan', ka nidib da ten'es ye o ane Josef biig. Josef saam da ane Heli, 24ka Heli saam da ane Matat, ka Matat saam da ane Levi, ka Levi saam da ane Melki, ka Melki saam da ane Janai, ka Janai saam da ane Josef, 25ka Josef saam da ane Matatias, ka Matatias saam da ane Amos, ka Amos saam da ane Nahum, ka Nahum saam da ane Esli, ka Esli saam da ane Nagai, 26ka Nagai saam da ane Maat, ka Maat saam da ane Matatias, ka Matatias saam da ane Semein, ka Semein saam da ane Josek, ka Josek saam da ane Joda, 27ka Joda saam da ane Joanan, ka Joanan saam da ane Resa, ka Resa saam da ane Zerubabel. Ka Zerubabel saam da ane Sealtiel, ka Sealtiel saam da ane Neri, 28ka Neri saam da ane Melki, ka Melki saam da ane Addi, ka Addi saam da ane Kosam, ka Kosam saam da ane Elmadam, ka Elmadam saam da ane Er, 29ka Er saam da ane Josua, ka Josua saam da ane Elieza, ka Elieza saam da ane Jorim, ka Jorim saam da ane Matat, ka Matat saam da ane Levi, 30ka Levi saam da ane Simeon, ka Simeon saam da ane Juda, ka Juda saam da ane Josef, ka Josef saam da ane Jonam, ka Jonam saam da ane Eliakim, 31ka Eliakim saam da ane Melea, ka Melea saam da ane Mena, ka Mena saam da ane Matata, ka Matata saam da ane Natan, ka Natan saam da ane David. 32Ka David saam da ane Jese, ka Jese saam da ane Obed, ka Obed saam da ane Boaz, ka Boaz saam da ane Sala, ka Sala saam da ane Nahson, 33ka Nahson saam da ane Aminadab, ka Aminadab saam da ane Admin, ka Admin saam da ane Arni, ka Arni saam da ane Hezron, ka Hezron saam da ane Perez, ka Perez saam da ane Juda, 34ka Juda saam da ane Jakob, ka Jakob saam da ane Isaak, ka Isaak saam da ane Abraham. Ka Abraham saam da ane Terah, ka Terah saam da ane Nahor, 35ka Nahor saam da ane Serug, ka Serug saam da ane Reu, ka Reu saam da ane Peleg, ka Peleg saam da ane Eber, ka Eber saam da ane Sela, 36ka Sela saam da ane Keinan, ka Keinan saam da ane Arfaksad, ka Arfaksad saam da ane Sem, ka Sem saam da ane Noa, ka Noa saam da ane Lamek, 37ka Lamek saam da ane Metusela, ka Metusela saam da ane Enok, ka Enok saam da ane Jared, ka Jared saam da ane Mahalaleel, ka Mahalaleel saam da ane Keinan, 38ka Keinan saam da ane Enos, ka Enos saam da ane Set, ka Set saam da ane Adam, ka Adam saam da ane Wina'am.

will be added

X\