LUUK 24

1Ka Alasidaar line a bakoi la pin'ilug daar la, bekenkeung asuba ni, ka ba isigi keŋ yaugin la ka more ba bun nyubusa line ka ba ti'eb la. 2Ban paae la ba nye ka kugir la biligi dig losi'a sa ka bas yaug la, 3ka ba kpen' poogin n gos ka pu nye Yesu niŋgbiŋ la. 4Ka lin nam paki ba la yim, ba nyene ka nidiba ayi zi'e kpi'e ba ka ye fuud ka li nyeen hale. 5Ka dabiem gban'e po'ab la hale, ka ba zaŋi ba zuti kpa' teŋ. Ka dap la bu'osi ba ye, “Bo ka ya ied one voe la bane kpi la zin'igne? 6O ka' kpela. O vu'ug kumin. Tenri on daa nam be Galilee ka yeli ya si'em la ye, 7‘Ba na gban'e Ninsaal Biig la ne n tis tuumbe'ed dim, ka ba kpa' o dapuudir zug, ka li daba atan' daar la, o na vu'ug kumin.’ ” 8Ka ba tienn o pian'uk la, 9ka naam yaugin la lebidi kun ka zaŋ line naam la wusa n yeli o nya'andolib piiga ne yinni la ne nidib bane kpelim la wusa. 10Li da ane Meeri Magdalene ne Joanna ne Jemes ma Meeri ne po'a sieba la da la'am zaŋ ne'eŋa n yel Tumtumnib la. 11Ka ba ten'es ye po'ab la yeli ba si'el la ka' sida ka pu siake. 12Ka Piita due zoo keŋ yaugin la kuni gosi nye kasiŋ la ma'aa, ka o lebi kul n ten'esid line naam la gbin. 13Daakan la ka Yesu nidib ayi daa ken teŋ kan ka li yu'ur buon Emaus la. Li ane wuu maila ayopoi ne Jerusalem. 14Ka ba pian'ad ne taaba bun lin wusa n maal la. 15Ka ban nam kpelim pian'ad ka tu'asid ne taaba la, ka Yesu meŋ li'eli ba, ka ba la'am ken. 16Ka li ligil ba ya'am, ka ba pu baŋ oo. 17Ka o bu'osi ba ye, “Bo sonsig ka ya sonsid ne taaba?” Ka ba zi'e baanlim ne susa'aŋ. 18Ka nid yinni on yu'ur buon Kleopas la, bu'os o ye, “Fun gullim a saan n kenn Jerusalem na, ka pu baŋ bun lin maal dabisa nwa la bee?” 19Ka o bu'osi ba ye, “Bo maali?” Ka ba yel o ye, “Li ane Yesu one yi Nazaret na la, one daa a Wina'am nodi'es la, ka tum tuum nyalima, ka pian'ad ne paŋ, Wina'am ne nidib sa'an la yela. 20Ka ti maalmaan kpeenmnam ne na'anam daa ke ka ba kad o saria, ka koos ye asee ba kpa' o n tabil dapuudir zug n ku o. 21Ka ti daa mor poten'er ye one na faaenn Israel dim la. Amaa li ane daba atan' zina, ka yelkaŋa nwa maal. 22Ka po'a sieba ban be ti sa'an la, ke ka ti lidig hale. Ba isig n keŋ yaugin la, 23ka pu nye niŋgbiŋ laa, ka leb na n yel ye, ba nye maleknam bane yeli ba ye, o vu'ugiya. 24Ka ti ninsieba me keŋ yaugin la, ka nye ka li ane wuu po'ab la yel si'em la. Ka ba me pu nye oo.” 25Ka Yesu yeli ba ye, “Zon ne ya'am poodum dima, bo ka ya pu niŋ Wina'am nodi'esidib la n da yel si'el la wusa yadda! 26Li pu nar ye Kiristo namis ne buna nwa wusa, ka naan yu'un di o na'am laa?” 27Ka o pin'il n pa'ani ba o meŋ yela, wuu Moses ne Wina'am nodi'esidib wusa n da sob Wina'am gbauŋ poogin si'em la. 28Ka ban daa ti li'el teŋ kan ka ba wa'ae la, o daa maal wuu o bood ye o gaadne. 29Ka ba sos o ye, “Doli ti n ken n gbenn, bozugo zaam ma'ene ka yu'uŋ bood sob.” Ka o siak, ka doli ba. 30Ka ban daa zin'in ye ba di la, o daa zaŋ bodobodo n pu'us Wina'am bareka, ka gben'es n tisi ba. 31Ka ba ya'am yu'un nie, ka ba baŋ on a so'. Ka o kpen melim ba tuon. 32Ka ba bu'os taaba ye, “On pa'a pian'ad ne ti ka tu'asid line be Wina'am gbauŋ la sueren la, li pu niŋ ti sunya malisim halee?” 33Ka ba due saŋkan la n leb Jerusalem n nye o nya'andolib piiga ne yinni ne bane bee ba sa'an la, ka ba pun la'as taaba sa, 34ka yet ye, “Ameŋa, Zugsob la vu'ugiya, ka nie o meŋ n pa'al Simon.” 35Ka ba nidib ayi me tu'asi ba bun line maal sueren la ne on gben'es bodobodo la si'em, ka ba baŋ o la. 36Ka ban nam be anina pian'ad ne'eŋa la, ka Yesu meŋ zi'eni ba soogin ka yeli ba ye, “Sumalisim be ne ya” 37Ka ba yirig hale ka li lidigi ba ka ba ten'es ye, ba nyene silinsiug. 38Ka o yeli ba ye, “Bo ka li paki ya ka ya more bi'esug potenda ya sunya ni? 39Gosimini m nu'us ne m nobpanpana, li ane m meŋi la. Babilimini m n goseya, silinsiug mor niŋgbiŋ ne konbaa wuu yaname nyee m ka m a si'em laa?” 40Ka on pian' ne'eŋa naae la ka noki o nu'us ne o nobpanpana pa'ale ba. 41Ka ban nam bi'esid bun nyalima line ka ba nye ka li lidigi ba ka me ma'ae ba sunya la zug, ka o bu'osi ba ye, “Ya mor si'eli na dii?” 42Ka ba zaŋ ziŋdugida n tis o, 43ka o noki li n onbi ba nini ni. 44Ka o yeli ba ye, “Pian'abama nwa a m pian'uk ka m daa pian'a tisi ya mam daa nam be ne ya la ye, lin wusa sobi m yela, ka li be Moses wada gbana ni ne Wina'am nodi'esidib gbana ni ne yuuma gbana ni la niŋ sida.” 45Ka o ke ka ba potenda yo'og ye ba baŋ line be Wina'am gbauŋin la gbin, 46n yeli ba ye, “Ala ka li sob ye, Kiristo la na namis ka daba atan' daar ka o vu'ug kumin. 47Ka ye o yu'urin ka moonmoonib na mool n tis buudi wusa ye ba tiak ba tuumbe'edin ka Wina'am na yiisi li bas, ye ka lin na pin'ilne Jerusalem. 48Ka yanam nye ne'enam ka na yeli li. 49Ka gosima, m na tumi m Ba' zi'el noor so' yela la n tisi ya, amaa bei teŋpoogin la n ti paae saŋa kan ka ya na pe'el ne one be saazug la paŋ.” 50Ka o doli ba laligi paae wuu Betani, ka uki o nu'us agola ka tisi ba yelsum. 51Ka on tisi ba yelsum la ka kpelim dut arazana ni ka basi ba. 52Ka ba leb Jerusalem ne sumalisim bedego, 53ka kpelim be Wina'am pu'usum yir la daar wusa n tisid Wina'am bareka pu'usug.

will be added

X\