LUUK 23

1Ka nidib la wusa mor o kenn Pilate tuon na 2n yet on niŋ si'em ye, “Ti nye dau kaŋa ne ka o pa'ane nidib la ne suer line ka' su'um, ka kati ti ye ti da yood lampo n tisi na'ab Kaisa, ka ye, on a Kiristo ka one a na'ab la.” 3Ka Pilate bu'os o ye, “Fune a Jew dim na'ab laa?” Ka o lebis ye, “Fune yeli ala.” 4Ka Pilate yel maalmaanib ne nidib la ye, “M pu nye gba'asi'a dau nwa nii.” 5Ka ba kpelim mudigid ye, “O pa'an nidib Juuda teŋin wusa ye o ke ka teŋ dam, ka li pin'il Galilee n ti paae kpela na.” 6Ka Pilate wumi li ka bu'os ye, “Dau kaŋa ane Galilee nidaa?” 7Ka Pilate n wum ye o bene na'ab Herod so'olimin la, ka ke ka ba mor o keŋ tis na'ab Herod; ka saŋkan la ka o da be Jerusalem. 8Ka Herod n nye Yesu la, ka o sunf ma'ae hale bozugo o wumi o yela ka li yuug ka o mor poten'er ye o ya'a nyee Yesu o na tum tuumnyaluŋ si'a. 9Ka Herod bu'os o bu'osa bedego amaa o pu lebise. 10Ka maalmaanib ne gbauŋmi'idib due zi'en o tuon ka pian'ad ne kpi'euŋ ye o tum be'ed. 11Ka Herod ne o sogianam la' o ka tum o tuum yalis, ka bo fuvenliŋi n yeel o n mor o lebis Pilate sa'an. 12Ka daakan la ka Herod ne Pilate lem maal taaba zuod, ka ne'eŋa da nam pu niŋ la ba da ane dataas ne taaba. 13Ka Pilate buol maalmaan kpeenmnam ne teŋin kpeenmnam ne nidib gbiliga 14n yeli ba ye, “Ya mor dau kaŋa na tisi m, ka yel ye o sa'am nidib la on pa'ale ba line ka' suer la zug. Ka m mak o ya soogin kpela nii gos ka yaname pian'a o yela si'em la wusa m pu nye gba'are o sa'ane. 15Ka Herod me pu nye o gba'asi'a ka lem lebis o n tisi ti na. Dau nwa pu tum taal kane ka ba na ku o. 16M na ke ka ba bu' o su'uŋa ka bas o ka o keŋ.” 17Ka ku'um malek gaadug maluŋ di'ema saŋa, asee ka Pilate yiis sarega dim yinni bas. 18Ka ba wusa kpelim tansid hale ye, “Kuumi dau kaŋa ka yiisi Barabbas n tisi ti.” 19Barabbas da zabid ne teŋ la gomena ka me ku nid ka ba kpen'es o sarega. 20Ka Pilate lem pian'a ba ya'as ka mor poten'er ye o bas Yesu. 21Ka ba kpelim zan'as ka tansid buŋ buŋ ye, “Kpa'am o dapuudir zug n ku, kpa'am o.” 22Ka o lem bu'osi ba n paasi abuta'aŋa ye, “Dau kaŋa tum taal bo? M pu nye gba'arkan ka o tum ka li siak kuubo. M na ke ka ba bu' o su'uŋa ka zaŋ o bas.” 23Ka ba kpelim mudigid tansid agola gola ye ba kpa'am o. Ka Pilate gu'uŋi siak. 24Ka Pilate koos ye ba niŋim o ban bood ye ba niŋ o si'em. 25Ka o yiis dau kane daam gomena ka ku nid la sarega ni n zaŋ o bas, on ka nidib ye ba zaŋ o bas la, ka nok Yesu n tisi ba ye ba niŋimi ba ya'am boodim. 26Ka ban gban' o more ken la, ba tu'os dau so' ka o yu'ur buon Simon ka o a Sairene nid ka yi teŋpoogin la na, ka ba mugus o ka o ze dapuudir la n dol Yesu nya'aŋ. 27Ka nidib bedego dol o, ka po'ab la'am gendigi n kaasid ka kum o yela. 28Ka Yesu fendigi ba baba ka yeli ba ye, “Jerusalem po'aba, da kummi tisidi mane, amaa lee kummi tis ne ya meŋ ne ya biis. 29Gu'usimi ka dabisa la kenna ka ba na yel ye, ‘Yelsum be ne bane a kundu'ada, ne bane bin'isa ka biis ku mu'a.’ 30Ka nidib na pin'ili yu'un yet zueya ne zuebibis ye, ‘Lum diinli ti ka su'a ti.’ ” 31Ka o siilim ye, “Ba ya'a niŋ nwannam n tis daug line voe la, ba na niŋ line kudug wala?” 32Ka ba mor tuumbe'ed dima ayi'iŋa ye ba la'am ku o ne ba. 33Ka ban paae zin'ikan ka ba buon ye, “Zugwauŋ la,” ba kpa' Yesu n tabil dapuudir zug anina ne tuumbe'ed dim la, ka yinni bee o datiuŋ ka yinni bee o dagobug. 34Ka Yesu yel ye, “M Ba'a, yiisimi ba tuumbe'ed bas ka ba zi' ban niŋid si'ela.” Ka ba vaae o fuud la ka maal bugulum bugulum n zaŋ o fuud la pudug taaba. 35Ka nidib bane zi'e kpi'e la gosid o, ka kpeenmnam la la'a o n yet ye, “O faaenn sieba, o faanmi o meŋ, o ya'a sid ane Kiristo one ka Wina'am gaŋ la.” 36Ka sogianam la me la'a o, ka zaŋ danmi'isug tis o 37n yet ye, “Fu ya'a ane Jew dim na'ab fun faanmi fu meŋ.” 38Ka ba sob sobir n tabili o zug baba ye, “OŊA NWA A JEW DIM NA'AB LA.” 39Ka tuumbe'ed dim bane ka ba kpa'a kpi'el Yesu la yinni n tu'ud o yet ye, “Ka'a fune a Kiristo laa? 40Faanmi fu meŋ ne tinam.” Ka oŋa la tans o tiraan la n yet ye, “Fu pu zot Wina'am, tiname wusa la'am bene ku'umkan ni laa? 41Li ya'a a yelsida puuginee, tinam namisug la ane sam yi'er, ka dau kaŋa kudum pu tum tuumbe'esi'aa.” 42Ka yel Yesu ye, “Fu na'am ya'a ti nie, fun on tenri m yela.” 43Ka Yesu yel o ye, “Asida ka m yet uf ye, zina nwa fu na be ne m arazana ni.” 44Li da ane wuu nintaŋ soog ka teŋ la wusa lieb lik biridi n ti paae zaamnoor karefa atan', 45hale ka nintaŋ nam pu nie. Ka fugobug line beŋ gon Wina'am pu'usum doog la aaenn buak zin'isa ayi. 46Ka Yesu tansi agola gola n yet ye, “M Ba'a, fu nu'usin ka m niŋi m siig.” Ka on yel ne'eŋa naae la ka kpelim bas o meŋ. 47Ka Room sogia kpeenm la nye line naam la wusa, o zun'e Wina'am yu'ur, ka ye, “Asida, dau nwa pu tum tuumbe'esi'aa.” 48Ka nidib la wusa bane la'as ye ba gos line na niŋ la, nye line naam la, ka lebidi kun ka li paki ba ka ba mor susa'aŋ bedego. 49Ka o nimmi'idib la wusa ne po'a sieba bane dol o Galilee la na n zi'e kukpeŋ ka gosid line naam la. 50Dau da be ka o yu'ur buon Josef. O da ane Arimatea teŋ nid, ka a Jew dim koto la nid yinni, ka a ninsuŋ ne popielim daan hale, 51ka pu doli ba tuuma ne ba gban'are, ka gurine Wina'am na'am la. 52Ka dau kaŋa keŋ Pilate sa'an n sos Yesu niŋgbiŋ la, 53ka noki o niŋgbiŋ la sigis na n bobigi li ne kasiŋ n su'a o yaug kane a tampiing ka ba tu ka me nam pu mum nid anina laa. 54Li da ane Arazumdaar zaam ka vu'usum daar la na pin'il. 55Ka po'a bane dol Yesu yi Galilee la na dol Josef n keŋ nye yaug la ne ban digil Yesu niŋgbiŋ la si'em, 56ka lebi kuli ti'eb bo bun nyubus suma ne tudaare. Ka vu'usum daar la ka ba vu'us wuu wada la zi'el si'em la.

will be added

X\