LUUK 22

1Maluŋ kane buon ye kum malek gaadug ka ba onbid bodobodo kane ka dabin pu gendig la da ponre. 2Ka maalmaan kpeenmnam ne gbauŋmi'idib la makid ban na nye suesi'a n kuu Yesu ka lee zot nidib la dabiem. 3Ka Sutaana kpen' Judas one ka ba buon ye Iskariot la ka a Yesu nya'andolib la yinni sunfin. 4Ka o keŋ maalmaan kpeenmnamin ne kpi'emnam bane gur Wina'am pu'usum yir la sa'an, n yeli ba on na niŋ si'em zam Yesu ka ba gban' o. 5Ka ba sunya ma'ae hale ka ba ye ba na tis o ligidi. 6Ka o siak ka bo ya'a saŋa kan ka nidib la kae' la ye o zam Yesu. 7Ka maluŋ la dabisir paae, dabiskan ka ba na ku malek gaadug pe'og la, 8ka o tum Piita ne Joon n yeli ba ye, “Kem ti'ebi maluŋ la diib n digil ka ti kena di.” 9Ka ba bu'os o ye, “Yaani ka ti na keŋ ti'ebi li n digile?” 10Ka Yesu yeli ba ye, “Gosimi ya, yaname kpen'ed teŋpoogin la, ya na nye dau ka o zeed yuur ne ku'om, yanam on dol o kpen' on kpen'ed yisi'a la, 11ka yel yisob la ye, ‘Pa'an la bu'osid ye, saam dokan ka o na di maluŋ la diib ne o nya'andolib la be yaani?’ 12Ka o na pa'ali ya yir ka ba mee li tugis agol. Ti'ebimi anina n guri ti.” 13Ka ba keŋ, ka on yeli ba si'em la, li sid niŋi ala, ka ba ti'eb maluŋ la yela. 14Ka li saŋa paae la ka Yesu zin'in ne o Tumtumnib la, 15ka yeli ba ye, “M pun bood hale ye man ne yanam di malek gaadug dikaŋa ka m nyaan namis. 16Ka m yeti ya ye, m ku lem dii li ya'ase, asee ka li niŋ sida Wina'am so'olimin la.” 17Ka o zaŋ nwam, ka on tis Wina'am bareka pu'usum naae la o yel ye, “Zaŋimi ne'eŋa n pudugi n tisi taaba; 18ka m yeti ya ye nannanna kulim waae sa, m ku lem nu tiwela daam n ti paae Wina'am so'olim la ken saŋa.” 19Ka o nok bodobodo, ka on tis Wina'am bareka pu'usum naae la, ka gben'esi li n tisi ba n yet ye, “Ne'eŋa aa m niŋgbiŋ lin ka m zaŋi tisi ya. Niŋimi ne'eŋa ka tenri m yela.” 20Ka ala men ban di diib la naae la, o zaŋ nwam la n yel ye, “Nwam kaŋa nwa daam la ane m ziim line maal nonaar paal ka na yi ya yela la. 21Amaa gosimi ka one ye o zam man la nu'ug ne mam nu'ug la'am be diibin kpela. 22Ka Ninsaal Biig la na kpi wuu Wina'am pun deŋim gban'e si'em la, ka one na zam o la, li na toe hale tis o.” 23Ka ba yu'un pin'ili bu'osid taaba one na niŋ lina? 24Ka noŋgban nwa'ar due ba soogin hale, one na a ba ninvosuŋ yela. 25Ka o yeli ba ye, “Dunia kaŋa na'anam pa'an nidibi ba paŋ, ka kpi'euŋ dim la ke ka nidib buoni ba ye, ‘Nidib la zuanam.’ 26Da ke ka li ane ala ya nii, amaa keli ka ya kpi'euŋ dim lee liebi wuu bunbil ka ya kpeenm lieb one tumi tisidi ya. 27Ka ano'one a kpi'euŋ soba, one zin'i dit diib bee one tumi tisid o? Li ka'a bi'esugo, li ane one zin'i dit la. Amaa mam be ya soogin nwaa n wen wuu one tumi tisidi ya. 28“Yaname a bane modig ka la'am be ne m saŋa kan ka m be makir poogin la. 29M Ba' Wina'am tisi m so'olim suer la, ala men ka m tisidi ya so'olim suer. 30Ya na dit ka nuud ne man, ka zin'in na'am gbana zutin n kat Israel dim buudi piiga ne ayi la saria.” 31Ka Yesu yel ye, “Simon, Simon, gu'usim ka Sutaana sosid suer ye o dami ya gaans wuu ki ne, 32amaa m sos Wina'am tisid uf ye fu yadda niŋir da gu'uŋe. Ka fu ya'a ti tiake lem doli m ya'ase, fun on kpe'eŋi fu ba'abiis la.” 33Ka Piita lebis yel o ye, “Zugsoba, mam ti'ebne ye m dol uf, hale baa ba ya'a kpen'esidi uf sarega bee kuub zin'igin gba.” 34Ka o yel ye, “Piita, m yet uf ne ye, yu'uŋa nwa noraug ku kaase ka fu na ki'is noora atan' ye fu zi'i ma.” 35Ka o bu'osi ba ye, “Mam tumi ya ka ya pu mor buoris ne kon ka pu pit ta'ada la, si'el po'ogi yaa?” Ka ba lebis ye, “Ayei.” 36Ka o yeli ba ye, “Amaa nannanna, kel ka one mor buorig zaŋi li ka one me mor kolug me zaŋi li. Ka ke ka one ka'a zaba su'ug la kuosi o kparib n da'. 37Ka m yeti ya ne'eŋa ye, line sob Wina'am gbauŋin ye, ‘Ba la'am kaal o pe'es tuumbe'ed dimin la’ ane man yela ka li me sid na niŋ asida. Ka line da sobi m yela la saŋa pun paae.” 38Ka ba yel ye, “Zugsoba, gosima zaba su'us ayi'iŋa nwa.” Ka o yeli ba ye, “Li sia'aleya.” 39Ka o yi doogin la n toom wuu on yiti niŋid si'em la n ken Olives zuer zug ka o nya'andolib dol o. 40Ka o paae zin'igin la ka yeli ba ye, “Sosimi Wina'am ka ya da kpen' maksi'a nii.” 41Ka o vurigi ba sa'an bi'ela n igin n sosid Wina'am ye, 42“M Ba'a, li ya'a ane fu boodim, nokim nwam kaŋa line a namisug la m sa'an sa. Amaa ka'ane ye m sunf boodim, amaa kel ka fu boodim maal.” 43Ka Wina'am malek yi arazana ni na n kpe'eŋid o. 44Ka o be anina namisid ka maligim sosid hale ka onsir yu'un wen wuu ziim tu'adi lut teŋ kora, kora. 45Ka on due o Wina'am sosugin la n lebi o nya'andolibin la, o paae ka ba gbisidne ba susa'aŋ zug, 46ka o bu'osi ba ye, “Bo ka ya gbisida? Niemi n sosi Wina'am ka ya da kpen' makirine.” 47Ka on daa nam be anina pian'ad la, ka nidib bedego kpelim kena ka o nya'andolib yinni one yu'ur buon Judas la be ba tuon. Ka o deŋim mir Yesu sa'an n pu'us o. 48Ka Yesu yel o ye, “Judas, fu ye fu zam Ninsaal Biig la ne pu'usugo?” 49Ka o nya'andolib bane la'am zi'e ne o ka nye line naamid la yel ye, “Zugsoba, ti zaŋi ti su'us la zab bee?” 50Ka yinni kia maalmaan kpeenm yamug datiuŋ tobiri fi'ig. 51Ka Yesu yel ye, “Ayei, da lem niŋ ne' ya'ase.” Ka si'is dau la tobir ka li lebi tug. 52Ka Yesu yel maalmaan kpeenm ne Wina'am pu'usum yir kpi'emnam ne kpeenmnam sieba bane ye ba gban' o la ye, “Ya ken ne su'uraad ne balaya ye ya gban' m wuu m ane na'ayiig bee? 53Mam daa yiti be ne ya daar mekama pu'usum yin la, ya pu gban'e ma. Amaa saŋa kane ka Sutaana one so'e lik paŋ be la ka ya mor ya'a.” 54Ka ba gban'e Yesu n mor o keŋ maalmaan kpeenm yin, ka Piita be nya'aŋi labisidi dol bi'el bi'el lale sa. 55Ka ba nyu'e bugum zak la teŋsuk ka la'ase zin'i ka Piita me zin'i ne ba. 56Ka Piita la'am zin'i ne ba ka bugum la nie ka po'asad bil yinni one a tumtum nye o ka yel ye, “Dau kaŋa me dol Yesu.” 57Ka Piita ki'is nyain n yet ye, “Po'aa, man kulim zi' o.” 58Ka li lem niŋ bi'ela ya'as ka ninso' nye o ka yel ye, “Fu me ane ba yinni.” Ka Piita yel ye, “Dauu, mam ka'a ba yinnii.” 59Ka li lem niŋ bi'ela pe'es ya'as ka yinni lem mudigid yet ye, “Bi'esug ka'asige ka dau kaŋa yiti la'am be ne o, bozugo o ane Galilee nid.” 60Ka Piita yel ye, “Dauu, mam pu baŋ fun pian'ad si'el la gbin ne.” Ka on nam kpelim be anina pian'ad la ka noraug kpelim kaas. 61Ka Zugsob la gi'e gos Piita. Ka Piita ten'es Zugsob la pian'uk la, on pa'a yel o si'em ye, “Noraug ku ti kaas zina nwaa, ka fu na ki'isi m noora atan'.” 62Ka o yi yiiŋe n kaas hale. 63Ka dap bane gur Yesu la la' o ka bu' o, 64ka zaŋ fuugu viligi o nindaa ka yiti nwe' o ka yel o ye, “Kel ka Wina'am yel uf one nwe' uf la.” 65Ka tu'o hale n yaal yaal. 66Ka beog nie ka maalmaan kpeenmnam ne gbauŋmi'idib ne kpeenmnam wusa la'as na ka ba mor Yesu keŋi ba koto ni, ka yel o ye, 67“Yelimi ti, fun a Kiristo laa?” Ka o yeli ba ye, “M ya'a yeli ya, ya ku siake, 68ka m ya'a bu'osi ya, ya me ku lebise. 69Amaa nannanna nwa kulim wa'ae sa, Ninsaal Biig la na zin'in Wina'am one a paŋtita'ar sob la datiuŋ.” 70Ka ba wusa bu'os o ye, “Fu sid ane Wina'am Biigaa?” Ka o lebisi ba ye, “Yaname yel ye mane la.” 71Ka ba yel ye, “Ti lem bood kasetib ye ti niŋ bo? Ti meŋ wumi li o meŋ noorin.”

will be added

X\