LUUK 21

1Ka o godigi gos ka nye kpan'amnam la more ba piini n suud pu'usum yir ligidi daka ni la, 2ka nye pokoonr noŋ daan ka o kena n su koba ayi'iŋa. 3Ka o ye, “Asida ka m yeti ya ye, pokoonr noŋ daan kaŋa nwa su bedego gaadi ba wusa. 4Ban wusa yiisne bun bedug kan ni ka ba more na n suud. Amaa on one a noŋ daan la, nok o zan'a zan'a n tis ka ke zaalim.” 5Ka sieba pian' pu'usum yir yela ban nok kugsuma n maali li la ka li venl hale la'am ne piini line ka ba tisid la. 6Ka Yesu yeli ba ye, “Dabisir kenna ka bun ban ka ya nyet la, ba ku ke ka kugir yinni kpelim li tiraan zuginee. Ba na lobi ba wusa bas teŋin.” 7Ka ba bu'os ye, “Pa'ana, saŋkan ka li ye li naam? Ka lin n ti ye li naam saŋsi'a la, nyalim bo na ti be ka ti nye?” 8Ka Yesu yel ye, “Gu'usimi ka da ke ka ba ma'a ya ka ya yidige; ka nidib bedego na ti noki m yu'uri kena n yet ye, ‘Mane la,’ bee yet ye, ‘Saŋa la li'eliya.’ Da doli nimbamanam taaba. 9Ka ya ya'a wum tanp yela ne zaba yela, yanam da zoti dabiem, ka asee ka ne'enam naam yiiga, amaa naar la lee ku kpelim doli lii.” 10Ka yeli ba ye, “Teens na zabid ne taaba, ka na'ab so'olim zabid ne na'ab so'olim men, 11ka teens mi'uŋ na be hale galis ka ko'om na lu zin'is bedego ka wibe'ednam line lomisid nidib la na be, ka ya na nye bunnyalima line mor dabiem saazug. 12“Ka ne'eŋanami ti ye li naam la, ba na gban'e ya namisi ya n more ya keŋ la'asug doodin ne sareganamin, ka more ya kenn na'anam ne gomenanam tuon na mam yu'ur zug. 13Saŋa kan ka ya yu'un mor suere ye ya pian' m yela. 14Li ya'a ti a ala, yanam gban'amini ya meŋ ka da ke ka yaname na lebis si'em la paki yaa. 15Ka m na tisi pian'ad ne ya'amsuŋ line ka ya dataas la ku nyaŋe lebisi ya, bee ki'isi yaa. 16Ya saamnam ne manam ne ya ba'abiis ne ya teŋin dim ne ya zuanam na gban'e ya n tis kpi'euŋ dim ka ba na kuu ya sieba, 17ka nidib wusa na kisi ya mam yela. 18Ka ya zuobid baa yinni ku bodige. 19Ka ya modigir la zug ka ya na faaenn ya nyovur. 20“Ya ya'a ti nye ka sogianam giligid Jerusalem, yanam baŋim ka li sa'uŋ li'eliya. 21Keli ka bane be Juuda teŋin zoo du zueya, ka ke ka bane be teŋpoodin la widig ka bas teŋpood la, ka bane be teŋ la teŋkpemis da kena kpen'ee. 22Ka ne'eŋa a tuumbe'ed namisug dabisir la, ye li ke ka line da sob Wina'am gbauŋin la niŋ sida. 23Woo! Li na toe n tis bane mor poos ne bane mor bilies saŋkan la. Namistita'ar na paae teŋkan la ni ka Wina'am sunf na pelig ne nimbama. 24Ka ba na zaŋ zaba su'us n kuu ba, ka buudi bane ka' Jew dim na gban'e ba wuu sarega dim ne n more kenn ba teensin ka poligim Jerusalem n sa'ami li ka ba saŋa nyaan ti paae. 25“Nyalima na be winigin ne nwadigin ne nwadibibisin ka dunia ni ka buudi na nye yelpakir ka li na lidigi ba, ateuk ne ku'opila n na le'ed hale ka maan tukpeedug la zug. 26Ka dabiem na ke ka nidib lidig ne ban na nye yel kane na naam dunia ni la, Wina'am n na dam bunam line mor kpi'euŋ saazugin ka ba toom la zug. 27Saŋkan la ka ba na nye ka Ninsaal Biig la be saŋgbana ni kenna ne o paŋ wusa ne na'am pipilim. 28Ka ne'enam ya'a ti pin'ili naamid, duom zi'en, ka godigi gos agol; ka ya yolisim la pu lallaa.” 29Ka Yesu yeli ba siiliŋ ye, “Gosim kekaŋ ne tiis wusa. 30Ya ya'a ti nye ka ba vaand soog, ya meŋ mi' ye seeung ponri. 31Ala men ya ya'a ti nye ka ne'enam naamid, ya nam baŋim ka Wina'am na'am la ponri. 32“Asida ka m yeti ya ye, ne'enam na naam ka zumaaŋ kaŋa nyaan gaad. 33Saazug ne dunia na gaad ka mam pian'uk la ku gaade. 34“Gu'usimi ne ya meŋ ka ya so' ya'am da pe'el ne di'ema ne danuur ne si'elnam yela line paki ya beilim laa, ka daakan la da ti libigi ya 35wuu baŋi gban'ad si'el si'em laa. Ala men li na ti libig nidib bane be dunia ni la wusa. 36Baŋimi ka kpelim be su'uŋa ne Wina'am sosug ye ya ti nye paŋkan ka ya na ti nyaŋ luak line na ti naam, ka me nyaŋe zi'en Ninsaal Biig la tuon.” 37Ka daar mekama ka o pa'ani ba Wina'am pu'usum yin, ka zaam yiti ma'ae ka o keŋ gbenn so' sa'an zuekan ka ba buon ye Olives zuer la zug. 38Ka bekeeung asuba ka nidib wusa la'ased o sa'an Wina'am pu'usum yin la n kelisidi o pian'ad.

will be added

X\