LUUK 20

1Daar yinni ka Yesu be Wina'am pu'usum yin n pa'an nidib ka moon labasuŋ la n tisidi ba la, ka maalmaan kpeenmnam ne gbauŋmi'idib ne kpeenmnam sieba 2kena n yel o ye, “Yelimi ti fun nye paŋ kaŋa zin'isi'a. Ka ano'one tis uf ka fu more niŋid ne'enam la?” 3Ka o lebisi ba ye, “Mam me na bu'osi ya bu'osug yinni. Yelimini m. 4Ka Joon ku'om suub la da yine Wina'am sa'an na bee saalib sa'ane?” 5Ka ba pin'ile nwe'ed taaba suora n yet ye, “Ti ya'a ye li yine Wina'am sa'an na, o na yeli ti ye, ka bo ka ti pu siaki? 6Ka ti me ya'a ye li yine saalibin na, nidib la wusa na lobi ti ne kuga, bozugo nidib la siak ye Joon da ane Wina'am nodi'es.” 7Ka ba gu'uŋ ka lebis o ye, “Ti zi' lin yi zin'isi'a naa.” 8Ka Yesu me yeli ba ye, “Mam me ku yeli ya mam nye paŋ kan ka m more tum ne'enam la yi zin'isi'a naa.” 9Ka Yesu yeli ba siiliŋ kaŋa ye, “Dau so' da maali o lombon'ogo n se' tiis. Ka nwienn keŋ teŋ lalug sa n yuug ka noki o lombon'og la n niŋ pogu'udib nu'usin. 10Ka bunib saŋa paae ka o tum tumtum ye o keŋ pogu'udib la sa'an n di'e o din na. Ka ba bu' o n lebis o ne nu'uzaalis. 11Ka o lem tum yinni ba sa'an na ka ba bu' o be'ed be'ede n kad o bas ne nu'uzaalis men. 12Ka o sin ka maligim tum yinni n pa'asi atan', ka ba poa'alim o ka yiis o lombon'ogin la n bas. 13“Ka lombon'og sob la yel ye, ‘M yu'un na niŋ wala? M ya'a na zaŋne m meŋ biigi n tum ka li ya'a a one ba na na'as o.’ 14“Ka pogu'udib la nye o meŋ biig la, ba yel ye, ‘Eheenn! Oŋa so'e faar la, keli ka ti kuu o ka faar la liebi ti din.’ 15Ka ba gban' o n ve'egi yi lombon'ogin la n kuu o.” Ka Yesu bu'osi ba ye, “Ya ten'es ka lombon'og la sob na niŋ nimbama wala? 16O na kena n ku nidib la ka toom nimpaala n ke ka ba gur lombon'og la.” Ka nidib la wumi ala la, ka ye, “Ne'eŋa ku naam ba'a bi'elaa.” 17Ka Yesu gosi ba ka yel ye, “Ka ne'eŋa gbin a bo ka ba sob Wina'am gbauŋin la, ye, ‘Kugkan ka tanmeedib ne'es la lieb lodigin kugsuŋo.’ 18Ka one pansigi lu kugkan zug na benim benim, ka li ya'a lu diinl so' zug, li na medig o.” 19Ka gbauŋmi'idib ne maalmaan kpeenmnam baŋ ye o siilim siiliŋ kaŋa ne ban la ka bood ye ba gban' o saŋkan, amaa ka zot nidib la dabiem. 20Ka ba maligim bo ya'a n bo nimbi'es bane ma' ye ba ane sida dimi tumi ba ye ba maal ya'am ne ya'am gban' o ne o pian'adin, ka mor o keŋ niŋ gomena nu'usin. 21Line a ban bu'os o ye, “Pa'ana, ti mi' ye, fu pian'ad ka pa'ane line dol suer ka pu mor baragaŋaa, ka pa'ane Wina'am yela ne sida. 22Li dol suer ye ti yo lampo n tis na'ab Kaisa bee li pu dol suere?” 23Ka o baŋi ba zam la ka yeli ba ye, 24“Mor la'af yinni na.” Ka ba mor na. Ka o bu'osi ba ye, “Ano'on foto ne ano'on yu'ure n sobi tabili li ni?” 25Ka ba lebis ye, “Li ane na'ab la din.” Ka Yesu yeli ba ye, “Tisimi na'ab Kaisa line aa o din ka me tisi Wina'am line aa o din.” 26Ka ban ye ba zam o ka gban' o nidibin la, ka mak o gu'uŋ ne on pian' si'em la, ka on lebisi ba si'em la paki ba ka ba lebi a baanlim. 27Ka Sadusii dim bane ye ku'um vu'ugir kae' la sieba kenn o sa'an na 28n bu'os o ye, “Pa'ana, Moses da sob wada gbauŋin digili ti ye, ‘So' ba'abiig ya'a kpi ka mor po'a ka o ka'a biise, on dim o pokoonr la n du'a biise n tis one kpi la.’ 29Gosima, ba'abiisa ayopoi da be, ka yiigsob la di po'a ka o nam pu du'a ka o kpi, 30ka one tia'al la me di pokoonr la ka kpi men. 31Ka one paas atan' la me niŋ ala. Ka ba di pokoonr la yinni yinni n kaligi ba wusa ka me kpii ba bayopoi la wusa ka ba so' sa'an pu du'a biiga. 32Ka li nya'aŋ la ka po'a la me kpi. 33Ba bayopoi la wusa di po'a la, ka ku'um vu'ugir daar ya'a paae ano'on na so'e po'a la?” 34Ka Yesu lebisi ba ye, “Zumaaŋ kaŋa dim sieba dit po'ab ka kun sidib, 35amaa bane ka Wina'am gban'e ka ba nar ye ba kpen' dunia kane ken la na ne ku'um vu'ugirin la, pu dit po'ab bee kun sidiba. 36Ba ku nyaŋe lem kpii, bozugo ban ne maleknam zemne ka a Wina'am biis ka a nimbane vu'ug kumin. 37Ka Moses pa'ali li nyain nyain ye, bane kpi la na vu'ug kumin, ne zin'ikan ka li sob tituug bugum diib yela la, ka o buol Zugsob la ye ‘Abraham Wina'am ne Isaak Wina'am ne Jakob Wina'am la.’ 38Dinzugo Zugsob la ane Wina'am one gur bane voe ka niŋ o yadda, bozugo o sa'an ka nidib wusa mor nyovur.” 39Ka gbauŋmi'idib la sieba lebis o ye, “Pa'ana, fu pian' su'uŋa.” 40Ba yu'un da zot ne ban na lem bu'os o si'el ya'as. 41Ka Yesu yeli ba ye, “Wala ka ba yel ye, Kiristo ane David yaaŋa? 42Ka David pun deŋim yel Wina'am yuuma gbauŋin ye, ‘Zugsob la yeli m Zugsob ye, “Zin'inimi m datiuŋ, 43hale ka m ti maal fu bi'emnam la, ka ba be fu noba teŋir.” ’ 44Ka David meŋ sadigim buol o ye, ‘Zugsoba’ la, li niŋ wala ka o a David yaaŋa?” 45Ka nidib la wusa toba ni ka o yeli o nya'andolib la ye, 46“Gu'usimi ya meŋ ne gbauŋmi'idib bane bood ye ba giligid ne fubeda, ka bood ye nidib pu'usi ba da'an, ne zin'isuma la'asug doodin, ne zin'ibane a na'asi zin'is di'ema zin'isin, 47ka faand pokonya ya ka ma' sosid Wina'am ne pian'atoog. Ba na nye koosbe'ed bedego.”

will be added

X\