LUUK 2

1Saŋkan la ka Room na'ab Ogestus daa tis noor ye ba sob nidib wusa yuda. 2Li daa ane yiiga nidib yuda sob saŋkan ka Kuirinius n daa a Siriya gomena la. 3Ka nidib wusa kul ba meŋ teensin ye ba sob ba yuda. 4Ka Josef me yi Nazaret, Galilee so'olim, n keŋ na'ab David teŋ du'adig, line a Betilehem n be Juuda so'olim, bozugo o ane na'ab David yaaŋ. 5On ne o po'a'eliŋ Meeri keŋ ye ba sob ba yuda. Saŋkan la ka Meeri mor poog. 6Ban nam be Betilehem la, ka o du'am dabisir paae. 7Ka o du'a o biribiŋ kpeŋ, ka vil biig la ne fuug n digil o konbid ya'am daka poogin, bozugo fal daa kae' saam yin ka ba na gbeenn. 8Ka teŋ kan ni, konbkemnib daa guri ba konbid yu'uŋ kan. 9Ka Zugsob malek sigi ba sa'an na. Ka Zugsob na'am paŋ nie ba sa'an nyain. 10Ka dabiem kpen'e ba bedego hale. Ka malek la yeli ba ye, “Da zoti dabiem, ka m more labasuŋ ye m yeli ya. Ka li na malis nidib wusa bedego. 11Yu'uŋkaŋa nwa ka po'a du'a faangid la David teŋin, one a Zugsob Kiristo la. 12Ka dine na ke ka ya baŋ biig la, ya na nye o ka ba vil o ne fuug n digil konbid ya'am daka poogin.” 13Ka maleknam bedego kpelim sig na n pa'as yinni la zug. Ka ba yuumne du'osid Wina'am yu'usuŋ 14ye, “Wina'am one be agol la ka laafe be dunia ni ne bane ka Wina'am sunf ma'ae ne ba.” 15Ka maleknam la n leb arazana ni naae la, ka konbkemnib la yel taaba ye, “Keli ka ti keŋ Betilehem n gos linnam ka Zugsob la yeli ti la.” 16Ka ba keŋ to'oto n nye Meeri ne Josef ne bilia la, ka o dig konbid ya'am daka poogin. 17Ka konbkemnib la n nye o la, ba pian' biig la yela, wuu malek la pa'a yeli ba si'em la. 18Ka ban wusa wum konbkemnib la yeli ba si'em la, li lidigi ba ne. 19Ka Meeri tienn yela nwa wusa n ten'esid o suunrin sa. 20Ka konbkemnib la daa lebid ka pian'ad Wina'am yu'ur bedego, bozugo ba wum ka nye malek la pa'a yeli ba si'em la. 21Ka daba anii la saŋa daa paae, ka ba na kpen'es biig la baŋo. Ka ba pud o yu'ur ye Yesu, yu'ur kan la ka malek daa yel ye ba ti pud o, saŋkan ka Meeri daa nam pu tuk o poog la. 22Ka biig la zug zuŋur saŋa daa paae wuu Moses da zi'el la, ka ba mor biig la keŋ Jerusalem ye ba zaŋ o pa'alim Wina'am, 23wen wuu lin sob si'em Wina'am wada la ni ye, “Biribiŋ kpeŋ wusa na ane Zugsob la din.” 24Ba daa keŋne ye ba maal maan n tis Wina'am wen wuu Zugsob wada la n yel si'em la ye ba tis “Sian'adawan ayi, bee na'adawan bibis ayi la.” 25Saŋkan la ka dau daa be Jerusalem, ka o yu'ur buon Simeon. O ane popielim daan ka zot Wina'am. Ka Wina'am Siig Suŋ be ne o. Ka o gu'usid Israel faangid la ken na. 26Ka Siig Suŋ la daa pun yel o ye, o ku kpii, asee o ti nye Zugsob Kiristo la. 27Ka Siig Suŋ la ke ka o keŋ Wina'am pu'usum yin la, daakan ka Yesu ba' ne o ma daa mor o keŋ ye ba maal Wina'am wada maan la. 28Ka Simeon di'e biig la o nu'usin ka pu'us Wina'am n yet ye, 29“Nannanna basim suer ka fu tumtum kpi ne sumalisim wuu fun daa zi'el noor si'em la, 30bozugo m nini nye faangid kan ka fu tum na la, 31on ka fu ti'eb dunia dim wusa zug la, 32one ke ka li nie nyain n tis buudi wusa, ka na ke ka Israel dim yu'ur du.” 33Ka Simeon tu'as biig la yela. Ka li lidig biig la ba' ne o ma. 34Ka Simeon kaanb ba nosuŋ ka yel Meeri, biig la ma, ye, “Gosima, Wina'am gaŋ bikaŋa ye o ke ka Israel dim bedego lu, ka bedego me du. One a zanbin ka Wina'am tis na, ka nidib bedego na ti zan'as o, 35ka dina na nie paalo ni line sua' ba potenda ni. Ka fu na paam susa'aŋ hale.” 36Saŋkan la men, ka Wina'am nodi'es po'ak me daa be ka o yu'ur buon Anna. Ka o ba' yu'ur buon Panuel, one a Aser doog nid. On daa a po'asadir la ka o kul sid paae yuma ayopoi ka o sid la kpi. 37Ka o sid la kpi la, ka o kpelim pokoonr hale kudug n ti paae o du'am yuma piisnii ne anaasi. O daa bene Wina'am pu'usum yin saŋa wusa ka pian'ad Wina'am yela nintaŋ ne yu'uŋ wusa, ka pu basida, ka lood noor n sosid Wina'am. 38Saŋkan la ka o kena ye o pu'us Wina'am bareka, ka tu'asid biig la yela n tisid ban wusa gu'usid saŋkan ka Wina'am na lem di'e Jerusalem teŋ n lebisi tisi ba la. 39Ka ban naae si'el mekama wusa wuu Zugsob n zi'el si'em la, ka Josef ne Meeri leb kul Nazaret teŋin line be Galilee so'olim la. 40Ka biig la nobug n mor paŋ ne ya'am, ka Wina'am yelsum be o zug. 41Yuum yuum ka Yesu ba' ne o ma, ken Jerusalem maluŋ tienr la saŋa. 42Ka Yesu n daa a yuma piiga ne ayi la, ka ba ken maluŋ la wuu ban yiti niŋid si'em la. 43Ka maluŋ la dabisa naae la, ka ba lebid n kun. Ka Yesu kpelim Jerusalem teŋin ka o ba' ne o ma daa pu baŋ ye o kpelim yaa. 44Ba daa ten'es ye o dolne ba teŋ dim la, ka keŋ dabis mum ken. Ka ban ie o ba du'adib ne ba zuanam sa'an ka pu nye o la, 45ba daa leb Jerusalem n ied o. 46Daba atan' daar ka ba nye o Wina'am pu'usum yin la, ka o zin'i ne pa'anib la n kelisid ka bu'osidi ba bu'osa. 47Ka ban wusa daa wum la, daa ten'esid hale o baŋir ne o ya'am lebisa la zug. 48Ka li lidig o ba' ne o ma ban nye o la. Ka o ma bu'os o ye, “M biiga, bo ka fu niŋi ti wala? Man ne fu ba' ie uf hale ne susa'aŋ.” 49Ka o lebisi ba ye, “Bo ka ya iedi ma? Ya zi' ye li su'um ye m be m Ba' yin nee?” 50Ka ba pu baŋ o pian'ad la gbin ne. 51Ka Yesu doli ba kul Nazaret teŋin, ka siaki ba noor. Ka o ma sua' yelbama wusa o suunrin. 52Ka Yesu nobug ka mor ya'am ka Wina'am ne nidib kaanbsuŋ be o zugin.

will be added

X\