LUUK 19

1Ka Yesu da ti yi Jeriko teŋin. 2Ka dau so' be anina, ka o yu'ur buon Zakeyus. O da ane lampodi'es kpeenm, ka mor ligidi bedego. 3O daa bood ye o baŋ Yesu n a so', amaa ka ku nyaŋee, bozugo nidib la galisne, ka o me a niŋgiŋ. 4Dinzug ka o zo gaad tuon n keŋ du tiig ye o nye Yesu, bozugo o na ti yi zin'ikan. 5Ka Yesu n ti paae zin'ikan la, ka o gos agola, ka nye o ka ye, “Zakeyus, sigim to'oto na, bozugo m ye m gbenne fu yin zina.” 6Ka o sig to'oto na, ka di'e o ne sumalisim. 7Ka ban nye li la, ba pin'ili nya'amidi nyon n tisid taaba ye, “O keŋ ye o sig tuumbe'ed la sob yin.” 8Ka Zakeyus zi'en, ka yel ye, “M Zugsoba, m na zaŋi m arazak pusuk n tis noŋdim. Ka m ya'a zamne so' si'el, m na lebis n tis o zin'isa anaasi.” 9Ka Yesu yel o ye, “Faangir la kpen' yikaŋa zina, bozugo Zakeyus me ane Abraham yaaŋ. 10Ka Ninsaal Biig la kena ye o ia bane bodig la, n faann ba.” 11Ka ban daa nan kpen kelisid la, ka Yesu siilimi ba siiliŋ. O da pu lal ne Jerusalem ka nidib la ten'esid ye Wina'am so'olim na nie saŋkan la. 12Dinzug ka o yel ye, “Na'abiig daa be, ka keŋ teŋ lalle ye o di na'am n leb na. 13Ka on nam pu keŋ la, ka o buol o tumtumnib piiga n tisi ba salima la'af yinni yinni, n yeli ba ye, ‘Nokim ligidi la n tolim, ka m keŋ ka leb na.’ 14“Amaa o so'olim nidib kis o, ka on gaad la ka ba tum tumtumnib ye ba yel o ye, ‘Ti pu bood ye dau kaŋa a ti na'aba.’ 15“Ka on di na'am la, ka leb kul na ka ke ka ba buol tumtumnib ban ka o daa tis ligidi la, ka ba kena, ka o bu'osi ba ye o baŋ nid wusa tolim nye nyood si'em. 16“Ka one kenn yiiga la yel o ye, ‘M Zugsoba, fu la'af la nyood du'alne bu piiga.’ 17“Ka o yel o ye, ‘Tumtumsuŋ nwa! Fu maal yelmeŋir ne bunbi'ela, dinzugo fu na so'e teens piiga.’ 18“Ka one paas ayi la me kena n yel ye, ‘M Zugsoba, fu la'af la nyood du'alne abu nu.’ 19“Ka o yel o men ye, ‘Fun na so'e teens anu.’ 20“Ka one paas me kena n yel ye, ‘M Zugsoba, fu la'af la nwa, lin ka m vilig ne pien n sua' la, 21bozugo m zot uf ne, fune a kpi'euŋ sob la zug. Fu nokidne bun lin ka fu pu digile, ka bun lin ka fu pu bude.’ 22“Ka o yel o ye, ‘Tumtumbe'ug nwa, fu noor pian'ad la gban' uf. Fu baŋ ye m ane kpi'euŋ sob, ka nokid bun lin ka m pu digile, ka bun lin ka m pu bude? 23Bo yela ka fu pu zaŋ m ligidi la n niŋ banki ni, ka man leb na la m naan ku di'en m ligidi ne nyoode?’ 24“Ka o yel bane zi'e anina la ye, ‘Di'em o la'af yinni la n tis one mor ligidi piiga la.’ 25“Ka ba yel o ye, ‘Zugsoba, on pun mor ligidi piiga sa.’ 26“Ka o lebisi ba ye, ‘On mekama mor la, ba na lem tis o. Ka one pu mor la, hale on mor si'el la ba na di'e li. 27Amaa m bi'emnam bane pu bood ye m so'e ba la, more ba na kuu ba m tuon.’ ” 28Ka Yesu n daa pa'al nidib la naae la, o daa gaad tuon n ken Jerusalem. 29Ka on daa paad Betfage ne Betani, teens bane kpi'e Olives zuer la, o daa tum o nya'andolib ayi 30ye, “Kem teŋ kane be suer kukpeŋ la. Ya ya'a paae, ya na nye buŋsia'asiŋ, ka ba lo zi'el, on zug ka so' nam pu ban'a. Yidigim o mor o na. 31Ka so' ya'a bu'osi ya ye wala ka ya yidigid o, yanam lebisim ye, Zugsob la bood o.” 32Ka bane ka o tum la, paae nye wuu on yeli ba si'em la. 33Ka ban yidigid buŋsia'asiŋ la, li daan bu'osi ba ye, “Bo ka ya yidigid buŋ la?” 34Ka ba lebisi ba ye, “Zugsob la bood o.” 35Ka ba mor o kenn Yesu sa'an na, ka zaŋ ba fuud n pa'al buŋ la zug n ban'al Yesu. 36Ka on ken la, ba yadigi ba fuud suer la zug. 37Ka on daa li'el Olives zuer sigsirin la, o nya'andolib la wusa daa pin'il n maan sumalisim n du'osi ba kukoya n pian'ad Wina'am yu'ur ne o tuumtitada ban ka ba nye la zug, 38n yet ye, “Yelsum be ne na'ab kane kenna ne Zugsob Wina'am yu'ur la. Sumalisim be arazana ni, ka Wina'am yu'ur suŋ la nye du'osug.” 39Ka Farisee dim sieba be nidib sisoogin anina, ka yel o ye, “Pa'ana, tansimi fu nya'andolib la, ka ba bas vuud.” 40Ka o lebisi ba ye, “M yeti ya ye, bama ya'a ke vuud, kuga gba' na pian'a man.” 41Ka on daa li'el, ka nye Jerusalem teŋ la, o daa kumne teŋ la zug, 42n yeti ba ye, “Ya ya'a mi'ine zina nwa, dine na tisi ya laafe, li naan aan su'um! Amaa li sua'ane, ka ya nini ku nyee li. 43Bozugo li saŋa na kena, ka ya bi'emnam na ti tu n maal zaŋguom n giligi ya teŋ, ka ya nidib ku tun'e yii. 44Ba na kuu ya, la'am ne nimbane ka ba gilig la, ka ku ke ka tandian'an baa yinni sun'ul li tiraan zugo, bozugo, ya pu baŋ faangir la ken la saŋa.” 45Ka Yesu kpen' Wina'am pu'usum yin la n pin'il n kat bane kuosid kuosim la n yiisid, 46ka yeti ba ye, “Li sobne Wina'am gbauŋin ye, Wina'am ye, ‘M yir na ane pu'usum yir.’ Amaa yanam zaŋi li n maal na'ayiis yir.” 47Ka daar wusa ka o be Wina'am pu'usum yin la n pa'an nidib. Ka Wina'am maalmaan kpeenmnam la ne gbauŋmi'idib la ne teŋ la kpeenmnam daa ied sueya ye ba ku o. 48Amaa ba da gu'uŋne, bozugo nidib la wusa daa kelisid o pian'ad la su'uŋa.

will be added

X\