LUUK 18

1Ka Yesu siilim ba siiliŋ dine na pa'ali ba ye ba sosim Wina'am saŋa wusa, ka da genn basi. 2Ka o yeli ba ye, “Saria kat daa be teŋ si'a, ka pu zot Wina'am ka pu na'asid nidibaa. 3Ka pokoonr be teŋ la ni n keŋ o sa'an n sin'igid o saŋa wusa ye, ‘Suŋim maali m yel la tisi m.’ 4“Ka pokoonr la kenn saŋa bedego na. Ka o pu bood ye o suŋ oo. Amaa ka saria kat la ti yel o poten'erin ye, ‘Baa man pu zot Wina'am, ka pu na'asid nidib la, 5pokoonr kaŋa n sin'igi m si'em la zug m na due suŋ o. Ka li ya'a ka' alaa, o na giilim ka m meŋ ti genn.’ ” 6Ka Zugsob la yel ye, “Ya wum saria kat be'ed la daana n yet si'em laa?” 7Ka bu'osidi ba ye, “Wina'am ku suŋ o nidib bane sosid o yu'uŋ ne nintaŋ, ka di suguru ne baa? O na yuug ka suŋi ya bee? 8M yeti ya ne ye, o na suŋi ya to'oto. Amaa Ninsaal Biig la ya'a ti leb dunia nwa na, o na nye nidib bane naŋ kpelim niŋid yaddaa?” 9Ka o siilim siiliŋ kaŋa n tis nimbane yel ye, ban mi'i ba meŋ poos ka ba a popielnam ka ne'esid bane kpelim la sieba, ye, 10“Dapa ayi'iŋa keŋ Wina'am pu'usum yir ye ba sos Wina'am, ka yinni a Farisee nid ka oŋa la me a lampodi'es. 11Ka Farisee nid la due zi'e ka pin'il sosidi o meŋ yela yet ye, ‘Wina'am, m pu'us uf bareka, ne man pu wen wuu ninsieba bane a zamdim ne poosa ayi dim ne po'asa'uŋ dim, bee ka pu wen wuu lampodi'es kaŋaa. 12Daba ayopoi wusa puugin man lood noor daba ayi, ka tisid Wina'am line mekama ka m kua n nye, yinni, pudugir piiga puugin.’ 13“Amaa lampodi'es la, on zi'ene lalle sa, ka pu siaki godigi o nindaa kpa'a saazugo. O kudum nwe'edne o meŋ ka fabin ne yet ye, ‘Wina'am, zomi m nimbaanlig; ka m ane tuumbe'ed sob.’ ” 14Ka Yesu ye, “M yeti ya ne ye, dau kaŋa nwa kul yin ne popielim, ka Farisee nid la kul neem, bozugo, one mekama du'osi o meŋ ba na sie o, ka one mekama sie o meŋ ba na du'os o.” 15Ninsieba da more ba biise kena ye Yesu noke o nu'us pa'ali ba zutin. Ka o nya'andolib la nye la, ka kad nidib la. 16Ka Yesu buoli ba n yet ye, “Keli ka biis la keenn m sa'an na ka da kadi baa, bozugo Wina'am so'olim la ane bamanam taaba din. 17Asida ka m yeti ya ye, on mekama pu di'e Wina'am na'am la wuu biiga, o ku nyaŋe kpen' li nii.” 18Ka Jew dim kpeenm yinni bu'os ye, “Pa'an su'uŋo, ka m na niŋ wala ka na nye nyovur line ka' naare?” 19Ka Yesu bu'os o ye, “Bo ka fu buoli m ye su'um soba? So'o kae' a su'um, asee Wina'am gullim. 20Fu mi' Wina'am noyelug line ye, ‘Da sa'am po'a, da ku nidaa, da zuuda, da di ziri kaseta, na'asimi fu ba' ne fu ma.’ ” 21Ka o lebis o ye, “Ne'enam wusa mam dolisi ba sueya m biilimin sa ne anwa.” 22Ka Yesu n wumi li la, ka yel o ye, “Yel yinni ma'aa kpelim ka fu pu niŋe. Kuosim fun mor si'el wusa ka zaŋ ligidi la tod noŋ dim ka fu na mor kpan'am arazana ni, ka lem kena doli m.” 23Ka dau la wum ne'eŋa la ka o sunf sa'am, bozugo o da ane kpan'a hale. 24Ka Yesu gos o kii ka yel ye, “Li toe hale ne bane mor kpan'am n na kpen' Wina'am na'amin. 25Li pu toe ne yugumi na kpen' kparipiim voonrine n paae kpan'a na ye o kpen' Wina'am na'aminee.” 26Ka bane wumi li la yel ye, “Ka ano'one na nye faangir yu'use?” 27Ka o yeli ba ye, “Lin ka saalib ku nyaŋ maal la ane na'ana Wina'am sa'an.” 28Ka Piita yel o ye, “Gosima, ti basi ti ya ka dol uf.” 29Ka Yesu lebisi ba ye, “Asida ka m yeti ya ye, one basi o yir, bee o po'a, bee o ba'abiis, bee o ba' ne o ma bee o biis, Wina'am na'am la yela, 30o na di'e ka li gaad bama zumaaŋ kaŋa nwa ni, ka me lem di'e nyovur dine ka' naare, saŋkane ken la na.” 31Ka o doli o nya'andolib piiga ne ayi'iŋa la yi kpeŋi n yeli ba ye, “Kelisimi, ti kenne Jerusalem, ka line mekama ka Wina'am nodi'esidib da sob gbauŋin Ninsaal Biig la yela la na niŋe ameŋa. 32Ka ba na gban' o n tis bane ka' Jew dima, ka ba na la' o, ka yaal o, ka tubis nintoondi n mad o, 33ka na bu' o ka ku o, amaa li daba atan' daar o na vu'ug kumin.” 34Ka ba pu baŋ on yet si'el la gbin ne, o da pian' pian'ad la ka li pu kpen'e ba ya'amine ka ba pu baŋi li gbin ne. 35Ka Yesu n ti ponr Jeriko la ka nye zunzoŋ ka o zin'i suer kukpeŋi n sosid, 36ka on wum nidib la gat la ka bu'os ye, “Boo la?” 37Ka ba yel o ye, “Yesu one a Nazaret nid la gat.” 38Ka o tansid ye, “Yesu, David yaaŋa, zomi m nimbaanlig.” 39Ka nimbane be o tuon la tansid o, n yet o ye, “Kel vuud.” Ka o maligim tansidi agola gola ye, “David yaaŋa, zomi m nimbaanlig.” 40Ka Yesu zi'en ka yeli ba ye ba dol o kenn o sa'an na. Ka on ti li'el Yesu la ka Yesu bu'os o ye, 41“Fu bood ye m niŋ bo n tisi fu?” Ka o lebis o ye, “Zugsoba m boodne ye m nyet.” 42Ka Yesu yel o ye, “Nyem ya'as, ka fu yadda niŋire tis uf laafe.” 43Ka o nini kpelim lak ka o dol Yesu n zun'od Wina'am yu'ur. Ka nidib la wusa nyee li la, ka me tisid Wina'am na'asi.

will be added

X\