LUUK 17

1Ka Yesu yeli o nya'andolib la ye, “Apan'as nidibi kpen'es tuumbe'edin dim na kena, ka li lee na toe hale n tis bane ke ka li kena la. 2Li naani so'on ba ya'a nokin neertita'are loon kollin o niŋgoonr ka zaŋ o lobi bas kolugin, n gati on na keen ka yadda niŋidib bama nwa tum tuumbe'ed. 3Gu'usimini ya meŋ. “Fu ba'abiig ya'a tum be'ed, fun sa'al o, ka o ya'a tiake o tuumbe'ed la, fun keli o taali n bas. 4Ka o ya'a tum uf ne be'ed noora ayopoi daar yinni, ka yiti keŋ ka leb na yel ye, ‘M tum taal, basi m taal m tuumbe'ed la zug,’ asee ka fu kee o taali n bas.” 5Ka Tumtumnib la yel Zugsob la ye, “Kel ka ti yadda niŋir zu'e.” 6Ka Zugsob la yeli ba ye, “Ya yadda niŋir ya'a zu'en n zemin so'od biilif, ya naani tun'e yelin tiig tita'akaŋa nwa ye, ‘Vuenm ne fu nya'a la wusa n keŋ lu mo'arin la sa,’ ka li naani siakini ya noor. 7“Ano'one be ya sa'an na mor tumtum ka o kuod bee guri o konbid ka tumtum la ya'a yiti naan poogin paae na o na yel o ye, kem na ka ti la'am di? 8Ayei, o lee na yel o ne ye, ‘Maalimi m diib ka son' fuug kane a nyain ka mor na n tisi m, ka m ya'a di, ka nuu naae, ka li nya'aŋ, ka fu me kena di ka nu.’ Li ka' alaa? 9O na pu'us tumtum la bareka on yel o ye o tum si'el ka o tum laa bee? 10Li ane ala mene n tisi ya, ya ya'a niŋ line ka ya Zugsob yeli ya ye ya niŋim, yelimi ye, ‘Ti ane tumtum bane pu nar yoode, bozugo li ane ti tuuma la ka ti tum.’ ” 11Ka on da wa'ae Jerusalem la, o daa doli yit Samaria ne Galilee teŋsuk. 12Ka paae teŋkpeŋ si'a ni ka kukoma piiga tu'os o ka zi'e lalle sa 13n kaasidi n yet ye, “Yesu Zugsoba, zomi ti nimbaanlig.” 14Ka on nyee ba la, ka yeli ba ye, “Kemi maalmaanib la sa'an n pa'ali ya meŋ.” Ka ban ken la ka wiim la basi ba, ka ba a nyain. 15Ka ba yinni n nye ka o kukom la bas o la, o fendigne n zun'od Wina'am yu'ur ne kukotita'ar 16n kena igin Yesu tuon n sunri n tisid o bareka pu'usug. O me da ane Samaria nid. 17Ka Yesu yel ye, “Li daa ka'ane ba piiga nyee laafee? Ka awai la be yaani? 18Bo ka one a saan la ma'aa n leb na ye o pu'us Wina'am bareka?” 19Ka o yel o ye, “Duom gaadi fu gaadug, ka fu yadda niŋir n tis uf laafe.” 20Ka Farisee dim bu'os Yesu saŋa kan ka Wina'am na'am la na kena. Ka o lebisi ba ye, “Wina'am na'am la pu kena ne pa'al si'a ka nidib na baŋi. 21Ka so' ku yel ye, ‘Gosima, line nwa kpela bee line be kpe'esa la.’ Baŋimi, ka Wina'am na'am la bene ya soogin.” 22Ka Yesu yeli o nya'andolib la ye, “Dabisa kenna ka ya na bood hale ye ya nye Ninsaal Biig la dabisa la yinni, ka ku nyee lii. 23Ka ba na yeti ya ye, ‘Gosimi kpe'e sa, bee, gosimi kpela.’ Mit ka ya keŋ, bee ya doli ba. 24Wenne saa yiti iank saŋgbauŋin ka li nie nyain si'em la, ala men ka Ninsaal Biig la na an', o lebug dabisir la na. 25Asee ka o lee deŋim namis namisug bedego yiiga hale ka zumaaŋ kaŋa nwa dim ki'is o. 26“Wuu Noa saŋa ka li da niŋ si'em la, ala men ka li na niŋ Ninsaal Biig la ken dabisa la. 27Ba da ditne, ka nuud, ka dit po'ab, ka ke ka po'ab kun sidib, n ti paae dabiskan ka Noa kpen' aaruŋin la, ka nya'al ka ku'om la kena di ba wusa. 28“Li me na ane ala wuu Lot dabisa da a si'em la, ba da ditne, ka nuud, ka da'ad, ka kuosid, ka but, ka meed, 29ka dabiskan ka Lot toom Sodom teŋin la ka bugum ne titan tuulug n naan saazug lu teŋin na ku ba wusa. 30“Ala men ka li na ae Ninsaal Biig nier dabisa la. 31Ka dabis ban ni, kel ka one be mopil zug ka o la'ad be yir poogin, o sob da sig na zaŋi o la'ade keŋe. Ka ala men ya'as, one be o poogin da leb na mene. 32Ten'esimi line niŋ Lot po'a la. 33Ka one mekama ied ye o faaenn o nyovur, bodigidi li ne, ka one bodigidi o nyovur, faandi li. 34M yeti ya ye, yu'uŋkan ni, dap ayi na la'ase gbisid soŋ yinni zug, ka ba na nok yinni ka bas yinni la. 35Ka po'aba ayi na la'am be neerin ka ba na nok yinni ka bas yinni la. 36Dapa ayi na la'am be poogin ka ba na nok yinni ka bas yinni la.” 37Ka nya'andolib la bu'os Yesu ye, “Zugsoba, yaani?” Ka o yeli ba ye, “Zin'ikan wusa ka ni'im pon'osir be la, zin'ikan la ka zuund me na la'as taaba.”

will be added

X\