LUUK 14

1Li da ane vu'usum daar yinni ka Yesu keŋ ye o di ne Jew dim kpeenmnam yinni one a Farisee nid, ka ba gosid o. 2Ka ba nye ka dau so' be anina ka o niŋgbin mod. 3Ka Yesu pian'ad ne wada pa'anib ne Farisee dim la ka bu'os ye, “Li dol suer ye ba ti'eb nidib vu'usum daar bee li pu dol suere?” 4Ka ba lebi fon' a baanlim. Ka o ti'eb dau la ka ke ka o keŋ kul. 5Ka o bu'osi ba ye, “Ano'one be ya ni ka o buŋ bee o lolug na lu bulugin vu'usum daar ka o ku zo to'oto n keŋ yaae o?” 6Ka ba mak ye ba lebis o gu'uŋ. 7Ka on nye ka sieba gaŋ ninsoma zin'isa n zin'in la, ka o yel nidib bane dit la siiliŋ ye, 8“So' ya'a more po'adiir di'ema ka buol uf, fun da paae n kpelim zin'inid ninsoma zin'isa nii, ka daasi'eree o me buol so' ka o gat fun. 9Ka on kane buoli ya wusa la na kena yel ye, ‘Duom ka nya'al zin'ikaŋa.’ Saŋkan la ka fu yu'un due ne nyan n keŋ zin'in tadimnam zin'igin la. 10Amaa so' ya'a buol uf, kem zin'in nya'aŋ ka one buol uf la ya'a kena nye uf, ka yel ye, ‘M zua, zin'inim tuon.’ Anina ka fu yu'un na nye zun'or ne na'asi, nimbane ka fu la'am zin'i la tuon. 11On mekama ye o du'osi o meŋ ba na sie o, ka on mekama sie o meŋ, ba na du'os o.” 12Ka Yesu yel one buol o diibin la ye, “Fu ya'a maal nintaŋ diib be yu'uŋ diib, da buoni fu zuanam bee fu ba'abiis bee fu nidib bee fu kpan'a taab bane a fu kpi'ese, bozugo ba me na ti maal ala daar si'a ka me buoli ya n lebisi li sam. 13Amaa ya ya'a maal di'ema, buolimi noŋ dim ne ponda ne wabis ne zunzoos, 14ka ya na nye yelsum, bozugo ba ku nyaŋe yoo li sam nee. Ya sam yoob ane yelsida kum vu'ugir daar la.” 15Ka ban la'ase zin'i diibin ne Yesu la, ba wum on yel si'el la, ka nid yinni yel o ye, “Yelsum bene one na di diib Wina'am so'olimin la.” 16Ka o lebis o ye, “Dau da be saŋsi'a ka maal diib bedego ka yel nidib bedego ye ba kena di. 17Ka diib la diib saŋa paae ka o tumi o tumtum la ye o kem nimban ka o yel la ye, ‘Kemi na ka m ti'eb diib guri ya.’ 18“Ka li wenne ba niŋne noor yinni ne, n yet lin paki ba si'em n sosid suer. Ka yiiga sob la yel o ye, ‘M da'ane kariyauŋ ka sosid suer ye m keŋ gosi lin a si'em.’ 19“Ka yinni yel o ye, ‘M da'ane na'akuoda piiga ka bood ye m maki ba kuobo gos, dinzugo tisi m suer ka m keŋ.’ 20“Ka nya'al ka oŋa la me ye, ‘M nye ne po'asaan, lin ka m ku nyaŋe kenaa.’ 21“Ka tumtum la lebi n nok ne'eŋa n tu'asi o zugsob la. Line a o sunf pelig ya hale ka o yeli o tumtum la ye, ‘Yim to'oto keŋ teŋ poodin sueya ni ne pal yalima ni n dol noŋ dim ne ponda ne zunzoos ne wabis na.’ 22“Ka tumtum la yel ye, ‘M zugsoba, fun ye m niŋim si'em la m niŋeya, amaa ba pu zu'e n sia'alee.’ 23“Ka zugsob la yeli o tumtum la ye, ‘Yim keŋ poodin sueya ni ne sueraadin n kpe'eŋi fu meŋ ka nidib la sia'al. 24Ka asida ka m yeti ya ye, nimbane ka m deŋim yeli ba ka ba zan'as la, ba so'o so' kudun ku lem di m diib laa.’ ” 25Ka on ken la ka nidib bedego dol o ka o gi'e yeli ba ye, 26“So'o ya'a ye o doli man ka pu zan'as o meŋ saam ne o ma ne o po'a ne o ba'abiis ne o tanpa, hale ka pu zan'as o meŋ nyovur yelle, o ku nyaŋe liebi m nya'andol la. 27Ka on mekama pu zee o meŋ kum dapuudir la, ka doli ma, o ku nyaŋe liebi m nya'andol la.” 28“Ka ano'one bee ya soogin n bood ye o mee o yir line me' tugus agol ka ku deŋim zin'in yiiga n gelig o sami na a si'em ka baŋ ye o na nyaŋe mee li naae bee o ku nyaŋe? 29Li ya'a ka'a alaa, o ya'a eenb eenbir ka pu nyaŋe naae lii, ban wusa nyee li la na la'a o 30n yet ye, ‘Dau kaŋa pin'il ne n mee o yiri gu'uŋ naar.’ 31“Bee na'ab kan be yaa ni n wa'ae ye o zab ne o na'ab tiraan, ka pu deŋim gban'e yiiga ye o na zaŋ nidib tusa piiga n keŋ zab ne on kane mor nidib tusa pisi la? 32Ka o ya'a baŋ ka o ku nyaŋe, o deŋidne tum nu'ug ka ba nan lal hale la n bo laafe suer. 33Li ane ala men, ya so' ku nyaŋe liebi m nya'andol la, asee ka o bas lin wusa ka o mor.” 34“Yaarum a su'um, amaa li mimilim ya'a naae, li mimilim la ye li lem niŋ wala leb na ya'ase? 35Ka li kudun pu nar ne teŋa ka me ku kilim bugulum, ba lobigidne n basid. “Ka one mor toba ka na wum, on wum.”

will be added

X\