LUUK 13

1Ka saŋkan la ninsieba da be ani ka yel Yesu, Galilee dim yela, bane ka Pilate da ku, ban da maal maan n tis Wina'am ka ba ziim gendig ne maana ziim la. 2Ka o lebisi ba ye, “Ya ten'es ye Galilee dim ban ka ba ku nwa la, da a tuumbe'ed dimi n gat Galilee dim bane kpelim la, ban namis namiskaŋa nwa zugoo? 3Ayei, m yeti ya ye, asee ka ya tiake ya sunya tuumbe'edin, ka ya'a ka' alaa, ya me na bodig. 4Ya me tenri Jerusalem nidib piiga ne ayi'iŋa la yela, bane ka Siloam yir kane me' tugis agol la da lu diinli ba n ku si'em la. Ya ten'es ye ban da ane tuumbe'ed dim n gat bane da kpelim n be Jerusalem laa? 5Ayei, m yeti ya ye, asee ka ya tiake ya sunya tuumbe'edin, ka li ya'a ka' alaa, ya me na sa'am.” 6Ka o yeli ba siiliŋ kaŋa ye, “Dau so' more kekaŋ, o tiis lombo'ogin, ka kena ye o pun'e kekama la ka pu nyee. 7Ka yel lombo'ogur la ye, ‘Gosima, yuma atan' nwana ka m ken ka pu nye kekama kekaŋ nwa nii, hale baa yinni m pu nyee. Nwaami li bas, ka li sa'amidne teŋ zaalim.’ 8“Ka o lebis o ye, ‘Zugsoba, keli li yuum kaŋa ma'aa, ka m na kua li gbinin ka bo bugulim n bas, 9ka yuum ya'a paae ka li wel, li a su'um, ka li ya'a pu lem wel ya'ase, fun on yu'un kuu li.’ ” 10Li da ane vu'usum daar yinni ka Yesu be la'asug doogin n pa'an nidib. 11Ka po'a yinni be anina one ka kikirig dol o ka o pu nye laafe yuma piiga ne anii, ka pond ka ku nyaŋe due o meŋi zi'e sapii. 12Ka Yesu nye po'a la ka buol o ka yel o ye, “Po'aa, fu ban'a la bas uf.” 13Ka noki o nu'use n pa'al po'a la zugin, ka aniŋa yim ka ban'a la bas po'a la ka o kpelim tienn sapi ka zun'od Wina'am yu'ur. 14Ka la'asug doog kpeenm suunr pelig ne Yesu on ti'eb po'a la vu'usum daar la zug. Ka yet nidib la ye, “Daba ayuobu bane be la ane tuuma dabisa, ka tuuma wusa naan pun tum naae. Ba kemi dabis ban na n ti'ebi ba meŋ ka lee da ken vu'usum daar na n ti'ebidi ba meŋa.” 15Ka zugsob la lebisi ba ye, “Zam dimaa! Vu'usum daare, ya yinni yinni pu idigidi ya lolis bee ya bumisi ba doodin kenne nulisidi ba ku'om? 16Ka po'a kaŋa nwa one a Abraham yaaŋ ka Sutaana lo yuma piiga ne anii nwa la, li pu nar ye m idig o vu'usum daare?” 17Ka on yel ne'eŋa nwa la ka li kpen'es bane ki'isid o la nyan, ka nidib la sunya ma'ae ne o tuum nyalima bane ka o niŋ la. 18Ka Yesu bu'os ye, “Wina'am na'am la wen wuu bo? Ka m na zaŋ bo n mak ne li? 19Li wen wuu so'od biili line ka dau budi li o lombon'ogin ka li nobugi kilim tiig. Ka niis kena n tee ba teedi li wila ni.” 20Ka o lem yel ya'as ye, “Bo ka m na zaŋi mak ne Wina'am na'am? 21Li wen wuu po'a mak bodobodo zom tansilabeda atan' n gendig dabin ka li uk si'em la.” 22Yesu n ken Jerusalem la o daa buŋid teŋ titada ne teŋbibisin n pa'an nidib. 23Ka so' bu'os o ye, “Zugsoba, ka nidib bi'ela ma'aa ye ba nye faangir bee?” Ka o lebisi ba ye, 24“Kpe'eŋi ya meŋ ye ya kpen' za'anoor kane pood ni, ka m yeti ya ye, nidib babiga n zigid kpen'eb ka ku nyaŋe. 25Ka saŋa ya'a paae, yisob la na due n keŋ yo yaŋir la, ka ya na kena zi'e yiiŋe kabiridi n yet ye, ‘Zugsoba, yo'ogum ka ti kpen'.’ “Ka o na yel ye, ‘M zi' yaname yi si'el naa.’ 26“Ka ya yu'un na pin'ili n yet ye, ‘Li ka' tinam ne fun daa la'am dit ka nuudaa, ka fu kenne ti teŋin n pa'anaa?’ 27“Amaa o na lem yeli ya ye, ‘M zi' yaname yi zin'isi'a naa, dinzugo toomini m sa'an yanam bane a tuumbe'ed dim la.’ 28“Ka yanam yu'un ti nye ka Abraham ne Isaak ne Jakob ne Wina'am nodi'esidib la ka ba be Wina'am na'amin, ka ba lee kat yaname bas ka ya na kum ka ga'adi ya nyina. 29Ka nidib na yit teens bane be lallisa na kena zin'in di diib Wina'am so'olimin la. 30Gosimiya, bane a yiiga dim la na yuolim, ka bane yuolim la na a yiiga dim.” 31Ka saŋkan la ka Farisee dim sieba kena yel Yesu ye, “Toom kpela, ka Herod boodne ye o ku uf.” 32Ka o lebisi ba ye, “Kemi n yeli ya'am be'ed sob la ye, ‘Gosima, m na kat kikiris yiis nidibin ka lem ti'eb nidib zina nwa ne beug ma'aa, ka daba atan' daar la ka m naae m tuuma la wusa.’ 33Amaa ne wala sa m kudun ku gu'uŋe m ken la zina, ne beug ne daar, bozugo li pu nar ye ba namis Wina'am nodi'esi n kuu o zin'isi'a ka li ya'a ka' Jerusalem nii. 34“Ou Jerusalem dima, Jerusalem dima, ya kuud Wina'am nodi'esidib ka lobid bane ka Wina'am tumi ba ya sa'an la ne kuga. Noorim babiga sa ka m bood ye m la'ase ya gumm wuu nonya'aŋi umi o biise o kpukpama ni si'em la ka ya pu siakida. 35Gosimi ya, m na basi ya yiri n tisi ya ka li lieb daboog, m lem yeti ya ye ya kudun ku lem nyee ma, asee ka ya ti ye, yelsum be ne one kenna ne Zugsob la yu'ur.”

will be added

X\