LUUK 12

1Ka saŋkan la ka nidib maligim la'ase mik hale ka ba nood taaba noba, ka Yesu yeli o nya'andolib la ye, “Gu'usimi ne ya meŋ ne Farisee dim dabin line a zam tuuma la. 2Line wusa ka ba pibil la na ti pibig, ka line wusa me sua' la na ti nie paalo ni. 3Ka lin wusa ka ya pian'a likin la, ba na wumi li nintaŋin, ka lin ka ya nya'am doodin la, ba na ti pian' li bedego nidib wusa ni.” 4“M zuanama, m yeti ya ye, da zoti dabiem ne bane kuud niŋgbin ma'aa ka lee ku nyaŋe niŋ si'el pa'as laa. 5Amaa m na pa'ali ya one ka ya na zo. Li ane Wina'am one na nyaŋe ku, ka li nya'aŋ ka o lem mor paŋ kane na tun'e kpen'esi ya bugum teŋin la. Eenn, asida zomini Wina'am. 6Ba pu kuosid niimbibisa ayi'iŋa ne kobiree? Hale Wina'am pu tamidi yinni yelle. 7Hale ne ya zuobid men, Wina'am mi' ba wusa kalli a si'em. Dinzugo da zoti dabiem; ka Wina'am noŋi ya n gat niis la babiga.” 8“Ka m yeti ya ye, one mekama siak yel nidibin ye man Yesu Kiristo one a Ninsaal Biig la so'e o, m me na niŋ o ala Wina'am maleknam la tuon. 9Ka one mekama ki'isi m nidibin, m me na ki'is o Wina'am maleknam la tuon. 10Ka one mekama po'og mam Ninsaal Biig la, Wina'am na di suguru ne o ka yiis o tuumbe'ed la n bas, amaa one mekama n sa'am Wina'am Siig Suŋ la yu'ur, Wina'am ku yiis o tuumbe'ed la base. 11“Ba ya'a gban'e ya keŋ la'asug doodin ne na'anam tuon la'am ne kpi'emnam tuon na, yanam da ke ka yaname na lebis si'el bee yaname na pian' si'el yela paki yaa. 12Bozugo Wina'am Siig Suŋ na pa'ali ya yaname na pian' si'el saŋkan la.” 13Ka nid yinni one be nidib bedego la sisoogin, yel Yesu ye, “Pa'ana, yelim m bier la, ka o pudug faar la n tisi man m din.” 14Ka Yesu lebis n bu'os o ye, “Ano'on tisi m noor ye m tu'a antu'a ka pudug faar n tisi ya?” 15Ka Yesu yeli ba ye, “Baŋimi, ka gu'usi ya meŋ ne line a fufum wusa, bozugo li ka' ye nid naan mor araza'as bedego la zug ka o na mor nyovure.” 16Ka o siilimi ba siiliŋ nwa ye, “Dau daa be, n a arazak daan. Ka o poog zood maal bedego. 17Ka o ten'es o poten'erin ye, ‘Paalo kae' ka m na su m zood laa. Dinzug m na niŋ wala?’ 18“Ka o yel o meŋ ye, ‘M mi' man na niŋ si'em. M na nwa'e m buya la n me buya line yalim n su m ki la ne m si'elnam la wusa, 19ka yu'un na yeli m meŋ ye, m sunf ma'eya. M na di ka nu bedego, bozugo m mor diib bedego dine na diis m yuma bedego.’ 20“Ka Wina'am yel o ye, ‘Zoluga, yu'uŋ kaŋa nwa m na buol fu siig ka li yi fu ni. Ka ano'on na so'e la'ad bane ka fu maal la? ’ ” 21Ka Yesu lem yel ye, “Ala men ka li na niŋ ne bane bood araza'ase digin ba meŋ yela, ka lee pu mor Wina'am yir araza'ase.” 22Ka Yesu yeli o nya'andolib la ye, “Dinzug ka m yeti ya ye, da ke ka ya beilim yela paki ya ne lin ka ya na di yela, bee fuud lin ka ya na ye' n lusi ya niŋgbina yelle. 23Nyovur yela gat diib, ka niŋgbiŋ yela me gat fuud. 24Ten'esimi gosi niise. Ba pu but bee buna, ka me pu sua'ad diib zin'isi'a bee suud buya nii, ka la'am ne wala, ka Wina'am diisidi ba. Ka tinam pu gat niis la noor piiga ne abuyi bee? 25Ka ano'one be ya soogin ka o nyovur yela pak o ka ne'e na tun'e ke ka o tugisi o nyovur dabisir bi'ela? 26Ka o ya'a ku nyaŋe niŋ bun line pu toe nwa, o ye o niŋ wala ne bane kpi'em la? 27“Ten'esimi tipuum venla la yela, ban nobugid si'em. Ba pu tumma bee wugid fuud n yeeda, amaa m yeti ya ye, hale baa na'ab Solomon na'am la'ad n venl si'em la wusa, li pu venne paae tipuum la yinni mene. 28Yanam bane ka ya yadda niŋir pu zu'e, Wina'am ya'a ket ka mood venl su'uŋa wenne li yene fuvenliŋ ne, ka li be zina ma'aa ka beug ka ba vaa li n los bugumin, o ku gosi ya su'uŋa n gaad ala bee? Ya yadda niŋir pood hale. 29Da iedi line ka ya na di bee line ka ya na nuu, bee more potenda ka li yela paki yaa. 30Dunia dim wusa ied ne'enam, ka ya Ba' Wina'am mi' ye ya boodi ba. 31Line gaad wusa, iemini Wina'am na'am so'olim la, ka o na zaŋ bamanami n pa'asi ya. 32“Yanam yadda niŋidiba, da zot dabiem; ka li ane ya Ba' boodim ka o na tisi ya o so'olim la. 33Kuosimini yaname mor si'el wusa, n tod bane a noŋdim, ka iene ligidi buoris bane ku kudug ka aanse n tisi ya meŋ ne kpan'am line be arazana ni ka pu mor sa'uŋ la, ka na'ayiis ku paae zuu, ka yala me ku paae sa'am. 34Bozugo, ya kpan'am n be si'ela, anina ka ya poten'er me be. 35“Ti'ebime n nyu'e ya fitlanam n zi'el, 36wenne dap bane gur ye ba zugsob naan po'adiir di'ema zin'igin kul na n buol ka ba yo'og gam to'oto si'em la. 37Yelsum na be ne tumtumnib bane ka ba zugsob paae na ka ba zi'e gur o la. Asida ka m yeti ya ye, o na ke ka ba zin'in ka o meŋ kena n todi ba diib. 38O ya'a ti kul na hale ka li ane yu'uŋ tisoose bee beugo bood niere, ka nye ka o tumtumnib la kpelim gur o, ba na nye yelsum. 39Ala men, baŋimi ne', ye yidaan ya'a mi'in saŋa kan ka na'ayiig naan zuun o, o naan ti'ebin hale gurin o yir ka ku gbise ka na'ayiig la ku nyaŋe kpen'e zuun oo. 40Yanam meŋ me ti'ebimi ka zi'e su'uŋa, ka Ninsaal Biig la kenne saŋa kane ka so'o so' zi'isige.” 41Ka Piita bu'os o ye, “Zugsoba, fu siilim ne tinam bee so' mekama wusa?” 42Ka Zugsob la lebis ye, “Ka ano'one a yisob tumtum kpeenm ka a ya'am ne sida soba? Li na ane on ka o zugsob na zaŋi o yir ben wusa n gu'ul o ye o tisi tumtumnib la ba diib saŋa kan nar wusa. 43Yelsum na be ne tumtum kpeenm kan ka o zugsob la ya'a kul na nye ka o tum wenne on yel si'em la. 44Asida ka m yeti ya ye, o zugsob la na ke ka o tumtum la lieb kpeenm n guri line wusa ka o so'e la. 45Amaa tumtum kpeenm kan ya'a yeli o sunfin ye, o zugsob ku kul to'o naa, ka pin'ili bu'ud dap ne po'ab bane a tumtumnib n be yin la, ka dit ka nuud hale n ti kool, 46o zugsob la na kul saŋkan ka o zi' ka li na libig o. Ka o zugsob la na saans o hale ka la'as o ne bane pu niŋ yadda la. 47“Ka tumtum kane mi' o zugsob boodim ka pu niŋi dolisi o boodim la ka pu ti'ebe, ba na bu' o hale. 48Amaa tumtum one pu baŋ o zugsob boodim ka lee tum line pu nara ba na bu' o ne bi'ela. One ka ba tis o ka li zu'e, ba me mor poten'er ye o na lebis line zu'e, ka one ka ba gu'ul bedego, ba me na mor poten'er ye o na lebis hale bedego men.” 49“M kena ye m zaŋne bugum lob dunia nwa zugin, ka m bood ye li pun ditin sa. 50Amaa yiiga asee m namis hale ti paae li ben ka nyaan paam sumalisim. 51Ya ten'es ye m more sumalisim kenn dunia ni naa? Ayei, m yeti ya ye, m lee more weligir na. 52Ka nannanna kudum wa'ae sa, yir yinni ni, nidiba anu ya'a be, weligir na be. Ka nidiba atan' na kis nidiba ayi, ka nidiba ayi na kis nidiba atan' la. 53Ka dau na kisi o dakoonr, ka o dakoonr me na kisi o saam. Ka po'a na kisi o po'ayua, ka po'ayua me na kisi o ma. Ka bipo'a na kisi o dayaam, ka o dayaam me na kisi o bipo'a la.” 54Ka Yesu yel nidib la ye, “Ya ya'a nye saŋgbauŋ ya tuon ka li sobugi okidi tu'ae ya, ya yetne ye saa na ni, ka li sid ni. 55Ka ya'a lem nye ka pebisug da'ad ya dagobug baba na ya yetne walusug na kena, ka li sid niŋ ala. 56Zam dima! Ya maki dunia ne saŋgbauŋ, ka mi' li saa beilim ne li ka'alim saŋa, ka lee niŋ wala n zi' nannanna nwa yela?” 57“Bo ka ya meŋ ku tun'e baŋ ye ne'eŋa nwa dol suere? 58So' ya'a mor antu'a ne uf ka ya dol taaba n wa'ae koto ni, kpe'eŋimi fu meŋ ka ya koos yel la sueren, ka li ya'a ka' ala ka li paae saria kat la sa'an on me na tolis uf n tis poluŋ ka on me mor uf n keŋ kpar sarega ni. 59Asida ka m yet uf ye, fu ku nyaŋe yi naa, asee ka fu yo fu sam la wusa hale ka kobir ku kpelim, ka fu naan nye suer.”

will be added

X\