LUUK 11

1Yesu daa sosid Wina'am zin'isi'a, ka on ti naae la, o nya'andolib la yinni yel o ye, “Zugsoba, pa'alimi tiname na sos Wina'am si'em wenne Joon ne pa'al o nya'andolib si'em la.” 2Ka o yeli ba ye, ya ya'a sosid, yanam yelim ye, “Ti Ba', kel ka fu yu'ur nye pian'asuŋ, ka ke ka fu na'am kena. 3Tisimi ti dabisir wusa ne li diib, 4ka yiisi ti taal n bas, ka tinam me ke bane tumi ti taal la n bas. Ka da ke ka ti kpen' makir pooginee.” 5Ka o yeli ba ye, “Ano'one be ya sa'an n mor o zua, ka o na keŋ o ni yu'uŋ tisoos, n yel o ye, ‘M zua, tisim sa'apela atan', 6ka m zua yi suer zug n sigi m na, ka m ka' si'el na tis o ka o dii.’ 7“Ka one be doog poogin la lebis yel o ye, ‘Da daami ma, ka m yoo m za'anoor ka m digne ne m biis, ka ku nyaŋe due n tis uf fun bood si'ela.’ 8Amaa m yeti ya ye, o ya'a pun ku nyaŋe due n tis o si'ela ban a zuod la zugo, o na due n tis on bood si'el la, bozugo on pu zo nyan ne sosug la zug. 9“Ka m yeti ya ye, sosimi, ka ya na di'e. Iemi, ka ya na nye. Kabirimi, ka ba na siak ka yo'og n tisi ya. 10Bozugo, on wusa sos na di'e. Ka one ied na nye. Ka one kabirid, ba na yo'og n tis o. 11“Ano'one be ya soogin nwa, ka o biig ya'a sos ziŋ, ka fu zaŋ waaf n tis o? 12Bee o ya'a sos gel, ka fu zaŋ naŋ n tis o? 13Yanam bane a nimbe'ednam la ya'a baŋ ye ya zaŋ piini line a su'um n tis ya biis la, ya Ba' one be arazana ni niŋid line a su'um n gat yanam la ka na zaŋi o Siig Suŋ n tis nimbane sosid o la.” 14Ka Yesu da kat kikirig kane da a gik, ka kikirig la da yi ka dau gik la yu'un pin'il pian'ad ka li pak nidib la. 15Ka nidib la sieba yel ye, “O kat kikiris la ne Beelzebul one a kikiris na'ab la paŋ.” 16Ka sieba bood ye ba mak o gos, ka ye o maalim tuum nyaluŋ si'a line yi arazana ni na ka ba nye. 17Ka on baŋi ba potenda la, ka yeli ba ye, “Na'ab so'olim dim ya'a nwa'as ne taaba n welig, so'olim kan na sa'am. Ala men yir mekama me ya'a mor weligir li me wa'ae ne sa'uŋun 18Ka weligir ya'a be Sutaana na'am so'olimine li ye li niŋ wala zi'ene? Yanam pun ye mam kat kikiris ne Beelzebul paŋ. 19Ka mam ya'a kat kikiris ne Beelzebul paŋa, ka yanam nya'andolib la mor bo paŋi kati ba? Dinzugo ya nya'andolib la na kadi ya pian'ad la saria. 20Ka li ya'a ane Wina'am paŋ ka m more kat kikiris, alaa Wina'am so'olim la paae ya. 21“Ka dau kane mor paŋ ya'a ti'eb su'uŋa ne o budaalim la'adi guri o yir la'ade, si'el si'el ku bodige. 22Amaa one mor paŋi gat o ya'a kena zabi nyaŋ o, o na faaenn o zaba la'ad ban ka o ti'eb la yiiga, ka nyaan faaenn o yir la'ad la keŋ ka ba pudug. 23“Ka on mekama pu be ne ma kisimne ka on mekama pu la'ased ne m la, widigidne.” 24Ka Yesu lem ye, “Kikirig ya'a yi nid sa'an o dolisidne pipirigin n ied zin'ig ye o be, ka o ya'a ie zin'ig la gu'uŋ, o yetne ye, ‘M na lebne m yikudug kan ka m yi na la.’ 25O ya'a leb na nyene ka li piis nyain n maal venliŋa n digil, 26o wa'ene n mor kikiris ayopoi bane tuumbe'edi gat on meŋ din la na ka ba kpen'e pe'es o anina, ka saŋkan la, dau kaŋa beilim yu'un na maligim a be'ede gaad o yiigin beilim la.” 27Ka Yesu n yel ala naae la, ka po'a so' pian' bedego nidib la sisoogin ye, “Yelsum na be ne po'a kane du'a uf ka mo'as uf la.” 28Ka Yesu lebis yel ye, “Yelsum lee na be ne bane wum Wina'am pian'ad ka more li.” 29Ka nidib maligim paasid la ka Yesu yel ye, “Zumaaŋ be'ed nwa dim ane bane ied tuum nyaluŋ, amaa ba ku lem nye tuum nyaluŋ si'a, asee Wina'am nodi'es Jona tuum nyaluŋ la ma'aa. 30Ka wenne lin da niŋ Jona si'em la ka li lieb zabin n tis Nineve teŋ dim la, ala men ka Ninsaal Biig la me a zabine n tis zumaaŋ kaŋa dim. 31Ka saria kadib daar la po'ana'ab one da yi Seba teŋin la na, na due n zerig zumaaŋ kaŋa nwa dim ba tuumbe'ed yela. Bozugo o da yine hale lallisa na ye o kelis na'ab Solomon ya'am pian'ad la, amaa one gat Solomon be kpela. 32Ka Nineve dim me na due saria kadib daar la n zerig zumaaŋ kaŋa nwa dim ba tuumbe'ed yela. Bozugo ban da tiake ba sunya ka bas tuumbe'ed, Jona da mool Wina'am pian'ad la. Ka gosima, so' be kpela n gat Jona. 33“So' ku nyu'e fitla ka zaŋi su'a bee noki li n pibil ne peogo, amaa o nokidne n sun'ul si'el zug ka li nie nyain n tis bane kpen'ed la. 34Ya nini aa ya niŋgbina fitla, ka ya nini ya'a a su'uŋa, ya niŋgbina wusa a nyain, ka ya nini ya'a ka'a su'uŋa, ya ane lik biridi. 35Dinzugo baŋimi ka ya niŋgbina wusa line nie nyain la da lieb lika. 36Ka niŋgbina wusa ya'a nie nyain ka lua si'a ka'a lika, li wusa na nie nyain, wuu fitla nie si'em n tisid nidib la.” 37Ka Yesu n da nam pian'ad la, ka Farisee dim nid yinni buol o ye, o kena ka ba la'am di. Ka o kpen'e zin'in ye ba di. 38Ka li pak Farisee nid la on nye ka Yesu pu pie o nu'use ka nyaan di la. 39Ka Zugsob la yel o ye, “Yanam Farisee dim piesidne ya nwama ne ya laas nya'aŋ, amaa ka ba poogin lee pe'elne dian'ad wenne ya sunya pe'el ne faaung ne tuumbe'ed si'em la. 40Zon na! Li ka'ane Wina'am one maane li nya'aŋ la me maane li poogin nee? 41Nokimi line be nwama la ne laas la poogin la n tis noŋ dim ka si'el wusa na lieb nyain n tisi ya.” 42“Woo! Farisee dima, li na toe tisi ya. Bozugo zenvaand line la'am pu nara, hale ne dine ka ya nye wusa ya pudugid zin'is piiga ka zaŋid yinni n tisid Wina'am ka lee pu tum yel sida ne Wina'am n noŋ si'el la. Bama narin ye ya niŋin hale ne tuumsuma sieba. 43“Woo! Farisee dima, li na toe tisi ya. Ya bood zin'isuma la'asug doodin hale ka bood na'asi pu'usum da'asin. 44“Woo! Yanam, bane wenne yaad line naalim ne teŋ ka nidib noodi ba zuti gat ka zi' ye yaad be anina.” 45Ka wada pa'an yinni yel o ye, “Pa'ana, fu ya'a pian'ad ala, fu la'am po'ogidne ti wusa.” 46Ka Yesu lebis ye, “Woo! Yanam bane a wada pa'aniba, li na toe tisi ya. Ya pa'an wada la ka li wenne zetebisa ka ya ziil nidib, ka yanam meŋ lee pu si'isidi li ne ya nu'ubila. 47“Woo! Li na toe tisi ya. Yaname meed nodi'esidib bane ka ya yaanam da ku la yaad la. 48Ka yaname meed ban ku sieba la yaad la, pa'al ye ya siaki ye ya yaaname da tum si'el la a su'um. 49Dinzug ka Wina'am one mor ya'am la yel ye, ‘M na tum nodi'esidib ne Tumtumnib tisi ya, ka ya na ku sieba ka na namis sieba,’ 50ka zumaaŋ kaŋa nwa dim na di'e ba tuumbe'ed namisug ban da ku nodi'esidib hale dunia pin'ilugin sa la, 51ka li pin'ilne Abel kuubin la n ti paae Zekaria kuub saŋa, one ka ba kuu o maan maalug bimbim zug la ne Wina'am zin'isuŋ teŋsuk la. Ka asida ka m yeti ya ye, zumaaŋ kaŋa dim na nye namisug li wusa yela. 52“Woo! Yanam bane a wada pa'anib, li na toe tisi ya. Bozugo ya kpiank baŋir saafi la ya sa'an, ka yanam meŋ pu kpen'eda, ka me giŋ nidib bane mood ye ba kpen'e la.” 53Ka Yesu toomi anina ka gbauŋmi'idib ne Farisee dim pin'il n boodi o noorin ka bu'osid o bu'osa bedego. 54Ka bood ye ba bend o, ka o noor ti fan' pian' pian'abe'ed ka ba gban' o.

will be added

X\