LUUK 10

1Ne'eŋa nya'aŋ ka Yesu lem gaŋ dap piisyopoi sieba n tumi ba ayi yi ye ba gaad tuon n keŋ teens ne zin'is ban wusa ka o meŋ bood ye o keŋ. 2Ka o yeli ba ye, “Poog la zuud zu'eya, amaa ka tumtumnib la pood. Dinzug sosim poog la sob ka o bo tumtumnib na paas poogin la. 3Kemne ka m tumi ya ne wenne pe'ebibis n be kunduna soogin. 4Da zaŋ potmaan, bee kolugo, bee ta'adaa, ka da zi'eni pu'us so' suer zugo. 5“Ka ya ya'a kpen' yi si'a ni, yiiga, yanam yelim ye, sumalisim be ne yikaŋa. 6Ka sumalisim nid ya'a be anina, ya sumalisim na be o zugin. Ka sumalisim nid ya'a kae', li na lebi ya ni. 7Sigim yikan ni n nuud ka dit ban tisi ya si'el, bozugo li nar ye tumtum di'e o yood. Ka da kenne gin nidib yaa. 8“Ya ya'a yiti kpen' teŋ si'a ni ka ba di'e ya yanam dim line ka ba tisi ya la, 9ka ti'eb ban'adnam teŋkan ni ka yel nidib la ye, ‘Wina'am na'am la li'eli ya sa'an.’ 10Ka ya ya'a kpen' teŋ si'a ni ka ba pu di'e ya anina yanam yim sueren ka yel ye, 11‘Hale ya teŋ uusug lin taae ti noba la, ti kpa'asi li ka li a ya zug yel. Amaa baŋimi ne ye Wina'am na'am la li'eli ya.’ 12M yeti ya ne ye, saria kadib daar la li na toe n tis teŋkan dim n gat Sodom teŋ.” 13“Woo, Korazin ne Besaida dima, li na toe n tisi ya. Tuum titada line daa niŋi ya sa'an la, ya'a daa niŋin ne Taya ne Sidon teensin ba naani tiakini ba tuumbe'edin ka yeen boto fuud n zin'in tampeligimin n pa'al ye ba tiakeya. 14Ka saria kadib daar la li ku toe n tis Taya ne Sidon dimi n paae yanama. 15Ka yanam Kapeenum dima, ya ten'es ye ya na du n ti paae saazugo? Ayei, ya na sig ku'um zin'igin.” 16Ka Yesu yel o nya'andolib la ye, “One wumi ya pian'ad wum ne man pian'ad, ka one ki'isi ya, ki'is ne man. Ka one ki'isi man la ki'is ne one tum man la na.” 17Ka dap piisyopoi la yu'un leb na ne sumalisim n yet ye, “Zugsoba, hale ti nyaŋ kikiris fu yu'ur la zug.” 18Ka Yesu lebisi yeli ba ye, “M nye ka Sutaana naane arazana ni n lu wenne saa yiti iank si'em la. 19Gosimi ya, m tisi ya paŋ ye ya noom namis ne wiigi hale ka nyaŋ dataa la ne o paŋ wusa ka si'elsi'el kae' na daami yaa. 20Ka la'am ne wala da ke ka ya sunya malis yaname nyaŋ kikiris la zugo, amaa ke ka ya sunya malis ne ya yuda sob arazana ni la zug.” 21Saŋkan la ka Siig Suŋ la ke ka Yesu sunf malis ka o yel ye, “M Ba' one so'e arazana ne dunia la, m pu'us uf bareka ne fun sua' yelbama ka gbauŋmi'idib ne mi'ilim dim zi' li, ka lee nie li n pa'al bibibis la. Asida, m Ba', ne'eŋa a fu boodim suŋ la zug.” 22“M Ba' tisi m si'el wusa. Ka so' zi' Biig la a so'o, asee Ba' la, ka so' me zi' Ba' la a so'o, asee Biig la, ne ban ka Biig la bood ye o nie n pa'ali ba la.” 23Ka Yesu fendigi gosi o nya'andolib la ka yeli ba baanlim ye, “Yelsum bene bane ka ba nini nyet yanam nyet si'el la. 24Ka m yeti ya ye, Wina'am nodi'esidib ne na'anam bedego da bood hale ye ba nye li ka pu nyee, ka bood ye ba wum line ka ya wum la ka pu wum.” 25Ka wada pa'an so' due zi'e ye o mak Yesu, ka yel ye, “Pa'ana, m na niŋ wala ka nye nyovur line ka'a naare?” 26Ka Yesu lebis n yel o ye, “Bo ka ba sob Wina'am wada la ni? Fu karem ka li gbin a bo?” 27Ka o lebis o ye, “Noŋimi fu Zugsob one a Wina'am ne fu sunf wusa, ne fu siig wusa, ne fu paŋ wusa, ne fu ya'am wusa, ka noŋ fu taab wenne fun noŋi fu meŋ si'em la.” 28Ka Yesu lebis o ye, “Fu yel su'uŋa. Niŋim wala, ka fu na voe.” 29Ka on bood ye o pa'al ye o ane ninvosuŋ la, o bu'os Yesu ye, “Ano'one a m tiraana?” 30Ka Yesu lebis o ye, “Dau so' daa yi Jerusalem teŋin n ken Jeriko teŋin. Ka faandib gin' o ka yeesi o fuud, ka bu' o koosir, ka bas o ka keŋ. 31Ka li niŋ nyalima ka Wina'am maalmaan yinni dol suekaŋa. Ka on nye o la, o biene gaad ka bas o. 32Ala men ka Wina'am maalmaan suŋid kena nye o ka bie n gaad ka bas o. 33Amaa Samaritan nid (on buudi ka Jew dim kis) daa kena nye o, ka zo o nimbaanlig, 34ka kenn o sa'an na ka zaŋ kpaam ne daam bu'e niŋ o fen'ed la ka viligi ba, ka zaŋ o n ban'al o buŋ zugin mor o keŋ saan yir n gos o yela. 35Ka beug nie, ka o yiis anzurifa ligidi ayi n tis saan yir gur la, ka yel o ye, ‘Gosim o yela. Ka ligidi la ya'a po'og, m ya'a ti leb na, m na yo uf.’ ” 36Ka Yesu bu'osi o ye, “Nidib atan' nwa, ano'on ka fu ten'es ye o niŋ dau kan ka faandib gin' la wuu o ane o tiraana?” 37Ka wada pa'an la lebis ye, “One zo o nimbaanlig la.” Ka Yesu yel o ye, “Kem, ka me niŋ ala.” 38Ka ban daa ken la, Yesu daa ti kpen' teŋbil si'a ni. Ka po'a one ka o yu'ur buon ye Marta di'e ba o yin. 39Ka o mor pitu, ka o yu'ur buon Meeri. Ka Meeri zin'in Zugsob la tuon n kelisid o pa'alug la. 40Amaa tuuma la daa galis n tis Marta bedego, ka o keŋ Yesu sa'an n yel o ye, “M Zugsoba, li pu daam uf ne m pitu la ke ka man tumi m kon'o kon' la? Yelim o ka o kena suŋi m.” 41Ka Zugsob la lebis n yel o ye, “Marta, Marta, si'elnam bedego daami fu suunr. 42Amaa bun yinni ma'aa a su'um ye fu paam. Meeri gaŋ bunsuŋ, din ka ba ku maligim di'e o nii.”

will be added

X\