LUUK 1

1Naa, ninvosuŋ Teofiluse, nidib bedego kpe'eŋi ba meŋ n sob bun line wusa tume ti sa'an. 2Ba sob lin wusa ka nimbane daa nye pin'ilugin ka mool labaar la, yeli ti ka ti wum. 3Dinzugo, Teofiluse, man n dolis yelbama su'uŋa ba pin'ilugin la zug, ka m ten'es ka li a su'um ye m sobi tienn uf li yela wenne lin nar si'em. 4M niŋid ne'eŋa ye fu baŋ ye, yel ban wusa ka ba pa'al uf la ane sida. 5Saŋkan ka Herod daa dit na'am Juuda teŋin la, dau so' daa be anina ka o yu'ur buon Zekaria. O da ane Wina'am maalmaan, one a maalmaan Abija doog nid. Ka o po'a one yu'ure buon Elizabet a Aaron one da a Wina'am maalmaan la doog nid. 6Ba daa ane popielim dim Wina'am tuon, ka di'ed Wina'am noor ne o noor yelug la wusa, ka ka' taale. 7Ba da pu mor biiga, bozugo Elizabet da ane kundu'ar, ka babayi la wusa me kudigne. 8Ka Zekaria ne o maalmaan taaba saŋa paae ye ba tum Wina'am pu'usum yir tuuma. 9Maalmaanib daa yiti bugulumne gaŋ one na nyu'e tudaare, ka ban daa bugulum la, li daa lu Zekaria zug ye o kpen' Wina'am maluŋ doogin n nyu'e tudaare n tis Wina'am. 10Ka tudaare la nyu'er saŋa la, ka nidib bedego kpelim yiiŋ n sosid Wina'am. 11Ka Zugsob malek nie o meŋ n pa'al Zekaria n zi'e maan zin'ig kan ka ba nyu'ed tudaare la datiuŋ. 12Ka Zekaria n nye o la, ka yirig hale, ka dabiem kpen' o. 13Ka malek la yel o ye, “Zekaria, da zot dabiem, bozugo Wina'am wumi fu sosug. Fu po'a Elizabet na du'a biribiŋ. Ka fu na pud o yu'ur ye Joon. 14Ka ya sunya na ma'ae. Ka ya mor sumalisim bedego. Ka nidib bedego na mor sumalisim biig la du'am zug. 15Ka o na lieb nintita'ar Zugsob sa'an, ka ku nu daam bee dankpi'uŋo. Wina'am Siig Suŋ na pe'el o, hale o du'am saŋa zaŋ ken sa. 16Ka o na mor Israel nidib bedego n leb ba Zugsob sa'an na, 17ka na deŋ Zugsob la tuon, ka mor Wina'am Siig ne paŋ kan ka Wina'am nodi'es Elija da pun mor la, ka na maal ba'anam ne ba biis yela, ka ke ka nimbane ki'isid Wina'am noor la lieb popielim ne ya'am dim, ka ke ka Zugsob nidib la ti'eb ka gur ba Zugsob.” 18Ka Zekaria bu'os malek la ye, “M na niŋ wala n siak nwa? Bozugo man ne m po'a wusa kudigne.” 19Ka malek la lebis o ye, “Man yu'ur buon Gabirel, one zi'e Wina'am sa'an la. Ka one tumi m na ye m tu'as uf ka yel uf labasuŋ nwa. 20Gosima, fu na lieb gik, ka ku tun'e pian'a, asee lin wusa ka m yel uf la ti niŋe naae, bozugo fu pu niŋi m pian'ad la yaddaa. Li saŋa ya'a paae li na niŋ ameŋa.” 21Nidib la daa gur Zekaria yiib na, ka bood ye ba baŋ line ke ka o yuug Wina'am pu'usum yin la. 22Ka on yi na la, o pu tun'e pian'ada. Ka ba baŋ ye o nyene bunnyalima Wina'am pu'usum yin la. Ka o pa'ani ba ne nu'us, ka kpelim a gik. 23Ka o tuuma saŋa daa naae la, ka o kul yin. 24Ka lin nya'aŋ la, o po'a Elizabet daa tuk poog, ka sua' li nwadis anu, ka pu yel so', ka yel ye, 25“Nwa ane Zugsob la tuuma, one yu'un gos m yela, ka yiis m nyan nidib soogin.” 26Ka Elizabet poog la nwadis ayuobu saŋa la, Wina'am daa lem tum malek Gabirel, Galilee so'olim lin be Nazaret teŋin la, 27ye o keŋ po'asadir one nan zi' dau sa'an. O ane Josef po'a'eliŋ. Ka o yu'ur buon Meeri. Josef ane na'ab David yaaŋ. 28Ka malek la keŋ Meeri sa'an n pu'us o ye, “Ne fu zugsuŋ. Zugsob la be ne fun, ka niŋ fu zug yelsum.” 29Malek yelug la zug ka Meeri yirig hale ka dabiem kpen' o, ka o ten'esid ye, bo pu'usum nwa? 30Ka malek la yel o ye, “Meeri, da zot dabiem, ka fu mor yelsum Wina'am sa'an. 31Gosima, fu na tuk poog n du'a biribiŋ. Ka fu na pud o yu'ur ye Yesu. 32O na ti a nintita'ar. Ka ba na buol o ye, Wina'am one gat bun wusa la Biig. Ka Zugsob Wina'am la na tis o, o yaab David na'am gbauŋ. 33O na niŋ Jakob yaas na'ab, saŋa line ka' naare. Ka o na'am saŋa ku mor benne.” 34Ka Meeri bu'os malek la ye, “Li na niŋ wala ka m tuk pooga, man zi' dau la?” 35Ka malek la lebisi n yel o ye, “Wina'am one gat si'el wusa la, na ke ka o Siig Suŋ sigi fu zugin, ka Wina'am paŋ na be fu ni, dinzugo popielim bikan ka fu na du'a la, ba na buol o ye Wina'am Biig. 36Gosima, fu du'ad Elizabet one ka ba buon kundu'ar la, tuk biribiŋ poog nwadis ayuobu nwana, la'am ne on a po'anya'aŋ la. 37Bozugo si'el kae' ka Wina'am ku nyaŋe maale.” 38Ka Meeri lebis ye, “Man ane Wina'am tumtum po'ak. Kel ka li niŋ ala n tisi m wuu fun yel si'em la.” Ka malek la bas o ka keŋ. 39Ka dabis ban ni, ka Meeri due to'oto n keŋ Juuda so'olim line a zueya teŋ la. 40Ka on paae Zekaria yin n pu'us Elizabet la, 41ka Elizabet n daa wum pu'usug la, biig la due o poogin. Ka Wina'am Siig Suŋ pe'el Elizabet, 42ka o tans ye, “Fu mor yelsum po'ab soogin. Biig kane ka fu na du'a la na mor yelsum. 43Bozug ka fun kane a m Zugsob ma la, kena ye fu kaae ma? 44Gosima, fun kena ka m wum fu pu'usug la, biig kane be m poogin la duene ne sumalisim. 45Yelsum be ne one niŋ Wina'am pian'ad la yadda, ye lin ka o yel la wusa na maal.” 46Ka Meeri yel ye, “M pian'ad Wina'am yu'ur ne m suunr wusa. 47M mor sumalisim, Wina'am one a m faangid la zug, 48bozugo o tiend man kane a o tumtum po'ak tadiŋ la yela. Ka nannanna ken sa, zumaana wusa na buon m ye yelsum sob. 49Wina'am one mor paŋ la maal bunsuŋtita'ar n tis man. O yu'ur ane yu'usuŋ. 50Ka o zot nimbaanlig ne bane zot o la zumaana wusa ni, 51ka o nu'ug tum tuumtita'ar, ka sa'am nyeesim dim ne ba nyeesim potenda, 52ka yiis na'anam bane mor paŋi ba na'am gbana zut, ka du'os tadimnam, 53ka diisid bane ko'om zabid la ne disuma, ka ba tig, ka ke ka kpan'amnam leb nu'uzaalis. 54- 55Ka pu tam yel kan ka o daa tisi ti yaanam laa, ka kena ye o suŋ o tumtum Israel, ka tiend o nimbaanlzoor ne Abraham ne o yaas la wusa saŋkane ka' benne.” 56Ka Meeri daa be ne Elizabet paae nwadis atan', ka leb kul o yin. 57Ka Elizabet du'am saŋa daa paae. Ka o du'a biribiŋ. 58Ka o kpi'es ne o du'adib wum ye Zugsob la zo o nimbaanlig bedego. Ka ba wusa maal sumalisim ne o. 59Ka daba anii daar la, ka ba kena ye ba kpen'es biig la baŋo, ka bood ye ba zaŋ o ba' Zekaria yu'ur n pud o. 60Amaa o ma yel ye, “Ayei, o yu'ur na ane Joon.” 61Ka ba lebis ye, “Fu du'adib baa yinni kae' ka o yu'ur buon alaa.” 62Ka ba bu'os biig la ba' ne nu'us ye ba baŋ on bood ye ba pud biig la yu'ur si'a. 63Ka o pa'ali ba ne nu'ug ye ba tisi o si'el ka o sob. Ka o di'e sob ye, “O yu'ur ane Joon.” Ka li lidigi ba wusa. 64Ka aniŋa yim ka o zilim lak, ka o ya'ae o noor n pian'ad Wina'am yu'ur. 65Ka dabiem kpen' ba kpi'es la wusa. Ka labakaŋa yadig Juuda zueya teŋ la wusa. 66Ka ban wusa n daa wumi li yela la, daa ten'esid ka bu'osid ye, “Bikaŋa na ti a ano'one? Bozugo Zugsob la nu'ug be o ni.” 67Ka Wina'am Siig Suŋ kpen' biig la ba' Zekaria ni. Ka o di'e Wina'am pian'ad n yel ye, 68“Keli ka ti pian' Wina'am one a Israel Zugsob la yu'ur, bozugo o kena ye o faaenn o nidib ka tisi ba yolisim. 69O tisi ti Faangir tita'ar, one yi o tumtum David gbinin na la, 70wuu on da pian'a n tis o nodi'esuma bane da be kudum kudum sa, 71ye, o na faaenn ti, ti bi'emnam nu'usin, ne bane kisi ti la nu'usin. 72Ala ka o pa'al o nimbaanlzoor ne ti yaanam, ka tiendi o noor zi'elug ne ba. 73Li ane poor kan ka o daa po' ne ti yaab Abraham la, 74ye o na faaenn ti, ti bi'emnam nu'usin, ka ke ka ti tum o tuuma, ka dabiem kae'. 75Ka ti na be o tuon ne tuumsoma ne yelmeŋir ti nyovur ben wusa ni. 76Ka fun, m biig nwa, ba na buon uf ye, Wina'am one gat bun wusa la nodi'es, bozugo fu na deŋ tuoni n maal suere n tis Zugsob la. 77Ka fu na yel nidib la ye, Wina'am na faaenn ba ka yiisi ba tuumbe'ed n bas. 78Li ane Wina'am nimbaanlzoor la zug ka o yelsum daar na nie nyain 79n tis bane be likin ne bane ka ku'um kpen'esidi ba dabiem, ka pa'ali ti suekane ka ti na dol ka nye sumalisim.” 80Ka biig la nobug, ka mor ya'am ne siig la paŋ, ka be moogin hale n ti paae saŋkan ka o yiisi o meŋ paalo ni Israel dim sa'an.

will be added

X\