1 Man Juud one a Yesu Kiristo tumtum ne Jemes ba'abiig la, sobid gbauŋ kaŋa tisid bane ka ti Ba' Wina'am buol ka noŋi ba, ka Yesu Kiristo guri ba la. 2 Wina'am na zoo ya nimbaanlig bedego, ka pe'esi ya sumalisim ne noŋir ka li galis. 3 M zuanoŋa, m mor nimmua hale ye m sobi tisi ya faangir line aa ti wusa din la yela. Li nar ye m sa'ali ya ye ya mo ne bane bood ye ba sa'am pa'alug line ka ti siak ka Wina'am niŋi o nidib nu'usin vuguri la. 4 Ba sua' gendig ne ya, ban bane ka kudumin dim da sob ban niŋ si'em la, ye ba ane bane zi' Wina'am ka tiake o popielim piini la ka li ke ka ba tum tuumyaalis, ka ki'isidi Yesu Kiristo one a ti kpi'euŋ sob ne ti Zugsob gullim la. 5 Ya da deŋim baŋi li su'uŋa amaa m bood ye m tienn ya ye Wina'am a one da faaenn o nidib Egipiti teŋin la, ka li nya'aŋ ka o da ku ba sieba bane pu niŋ o yadda la. 6 Ka Wina'am lo maleknam bane me da basi ba so'olim ka bas line sid aa ba beilim zin'ig la, ne bana bane ka' sa'uŋo, ka guri ba likin n ti paae dabistita'ar saria kadib la. 7 Ala men ka Sodom ne Gomorra dim ne teens bane kpi'e ba la da niŋ dian'ad tuuma ne tuumyaalis, ka da nye namisug ba tuumbe'ed yela, line a bugum line pu kpiigida, ka li a sa'alug n tisi ti. 8 Ka la'am ne wala nimbama nwa bane zi' Wina'am la kpelim dol zaansuma line ke ka ba dian'adi ba meŋ, ka zan'as kpi'euŋ dim ka tu'ud bane mor paŋ n be agol la. 9 Hale malek kpeenm, Maikel on da mood ne Sutaana, ka da nwa'asid Moses niŋgbiŋ yela, on da kpi la, da pu kpi'em ye o koos o ne tu'ude, amaa ka lee yel ye, Zugsob la na tans o. 10 Amaa nimbama nwa tu'ud line mekama zu'e gaadi ba ya'am baŋir. Ka yelbane ka saal mi' ba niŋgbiŋin wuu bunkonbane pu ten'esid la, na ke ka ba sa'am. 11 Ba tuund Kain tituunli ka pesigi ba meŋi ne suebe'ed wuu Balaam ye ba nye nyood, ka kpi men wuu Kora ne sieba da zan'as Wina'am noor ka kpi si'em la. Dinzug li na toe n tisi ba. 12 Ba ane bane mor gbada ya noŋilim diib diibin ka la'am di ne taaba ne nyeesim n suŋidi ba meŋ ma'aa. Ba wenne saŋgbana bane kae' saku'om ka sisi'em da'ad, ne tiis bane pu mor welaa, ba welib saŋaa. Ba kpine tol ka ba voonn ba bas. 13 Ba lem wenne mo'ar ku'opilbeda n da'ad pumpuum line a ba nyan tuuma, ka lem wenne nwadibibis bane goond ka Wina'am ti'eb lik tita'ar n guri ba saŋa kane ka' benne. 14 Li ane nimbama yela ka Enok one a tuŋ ayopoi line pin'il Adam ni na la, da di'e Wina'am pian'ad n tis nidib ye gosimi, Wina'am na kena ne o maleknam tusa piiga 15 ye saalib wusa nyee ba tuumbe'ed namisug. O na koos tuumbe'ed dim bane pu dol Wina'am suere, ban tum tuumbe'ed ka pu mor ya'a ne Wina'am la, ne ban pian'ad pian'abe'ednam n ki'isid o la. 16 Ba ane nyuyolug dim, ka niŋidi ba saalib boodim, ka a bane nwe'ed nyo'og hale, ka mor noŋgban malisiŋ ye ba nye nyood. 17 M zuanoŋa, tenri yelkan ka ti Zugsob Yesu Kiristo Tumtumnib da deŋim pian' ye li niŋ la. 18 Ba da yeli ya ye naar saŋa la, ka ninla'adib na be, bane la'ad Wina'am ka dol saalib ya'amleog boodim ka pu dol Wina'am suere. 19 Nimbama nwa ta'asid weligir na. Ba ane saalib ma'aa ka Wina'am Siig Suŋ ka'a ba nii. 20 M zuanoŋa, yanam lee suŋimi taaba n kpe'eŋ ya Wina'am yadda niŋir line a nyain la, ka ke ka Wina'am Siig Suŋ suŋi ya ne ya Wina'am pu'usugin. 21 Kpelim niŋimi ya meŋ Wina'am noŋilimin ka guri ti Zugsob Yesu Kiristo nimbaanlzoor line ta'asid nyovur dine ka' naare. 22 Suŋimi bane yamisid la. 23 Faanmi sieba n teegi ba yiis bugumin na. Ka lem zo nimbaanlig ne sieba amaa ka mor dabiem zotim ne ba, amaa kisigimini ba fuud line ka saalib ya'am boodim dian'a ba la. 24 Wina'am a one na nyaŋe guri ya ka ya ku lu tuumbe'edin ne, ka na more ya keŋe o tuon line a o na'am paŋ zin'igin ka gbada kae', ka sumalisim be bedego. 25 On one a Wina'am gullim, ka a one faandi ti ka li yi ti Zugsob Yesu Kiristo sa'an na la, nyet na'asi ne so'olim ne kpi'euŋ saŋsi'en sa, ne nannanna, ne saŋa line ka' naare. Ami.
