1 Arazak dima, kelisimi! Kaasimi ka fabil bozugo susa'aŋ kenne ya sa'an na. 2 Ya araza'as pun'eya. Yoya mu'a ya fuud. 3 Teŋze'em kpen'e ya salima ne ya anzurifa. Teŋze'em la na lieb ya kaset, ka na di ya niŋgbina wuu bugum ne. Ya la'as araza'as n guri saria kadib daar la. 4 Ya ma'adi tumtumnib bane tumi ya poodin, ka moŋi ba yood ka ba kaasid n zi'ini ya. Ka ya bunib la kaasig paae Zugsob one so'e nidib wusa la toba ni. 5 Ya be ne beilim suŋ dunia nwa ni. Ya maani ya ya'amin n nobi guri kuub daar. 6 Ya koos sida daan ye o tum tuumbe'ed ka o sini o noor, hale ka ya ku o. 7 Dinzugo m ba'abiise, modigimi ka Zugsob la nyaan ti kena. Gosimi kpaad n modigid si'em guri o poog ka sigsaa ne nya'aŋ saa ti ni, ka li nyaan ti du'a biil suma la. 8 Yanam me modigimi ka gban'e ya sunya ka Zugsob la kenna li'eliya. 9 M ba'abiise, da nyon ne ya taaba, ka li ya'a a ala, Wina'am na kadi ya saria. Gosimi saria kat la zi'e za'anoorin. 10 Zaŋimi Zugsob nodi'esidib bane da pian' o yela la, namisug ne modigir ka li a bigisigo n tisi ya. 11 Ti buoni ba sumalisim dim bane modig ne Wina'am la. Ya wum Job n da modig si'em ka nye Wina'am da maal o si'em narin la. Ne'eŋa pa'alne Wina'am nyoog ne nimbaanlzoor. 12 M ba'abiise, line gaas li wusa wusa ane, da po baa bi'elaa. Da po mak ne teŋ, bee saazug, bee si'el si'ela. Kel ka ya eenn a eenn ka ya ayei a ayei, ka Wina'am da kadi ya saria. 13 So' ya'a be ya sa'an n be yela ni, on sosim Wina'am. On me suunr ma'ee on yuum yuum soma n na'as Wina'am. 14 So' ya'a be ya sa'an ben'ed on buolim Wina'am nidib kpeenmnam, ka ba sos Wina'am tis o ka kpa'e kpaam niŋ o zugin ne Zugsob la yu'ur. 15 Ka pu'usug kan ka ba pu'us ne yadda niŋir la na tilig ban'ad la. Zugsob la na due o. Ka o ya'a tumne tuumbe'ed o na yiisi li bas. 16 Peligimi ya poos n tu'asi ya tuumbe'ed n tis taaba, ka sos Wina'am tis taaba, ka ya na nye laafe. Sidasob sosug mor paŋ li tuuma ni. 17 Elija da ane nid wuu tinam ne, ka sos Wina'am hale ye saa da nii, ka yuma atan' ne nwadis ayuobu, ka saa pu nii. 18 Ka o lem sos ya'as ka saa ni ka zuud la maal. 19 M ba'abiise, ya yinni ya'a kpadigi yi sida la ni, ka so' mor o lebis na, 20 o daana baŋim ye on mekama fendig tuumbe'ed daan o tuumbe'ed sueya ni, na tilig tuumbe'ed sob siig kumin, ka ke ka Wina'am yiis o tuumbe'ed bedego n bas.
