JEMES 4

1Bo ka ya zabid ka nwa'asidi ne taaba? Li ane ya niŋgbina ya'amleog boodim. 2Ya bood si'elnam ka pu paam. Ya kuud nidib ka mor fufum ne ya taaba bunam, ka pu paam. Dinzug ka ya zabid ka nwa'asid ne taaba. Ya pu mora, yaname pu sos Wina'am la zug. 3Ya sos ka pu paam, yaname pu sos ka li dol suer la zug. Ya sosidne si'elnam ye ya dii li ne ya ya'amleog. 4Yanam bane pu tum line ka Wina'am bood la! One wusa gaŋ ye o maal zuod ne dunia, o na lieb dataa ne Wina'am. Dinzugo on mekama bood ye o maal zuod ne dunia, on maali o meŋ ne Wina'am dataa. 5Bee ya ten'es ye line sob Wina'am gbauŋin la ane zaalim ye, Wina'am Siig kan ka o niŋi ti ni la, guri ti ne dasuŋ kpi'ema? 6O tisidi ti popielim piini bedego. Li sob ye, “Wina'am zan'asid nyeesim dim, ka tisid bane siedi ba meŋ la popielim piini.” 7Dinzugo, zaŋimi ya meŋ n pesigi Wina'am. Zan'asimi Sutaana, ka o na zo ka basi ya. 8Li'elimi Wina'am sa'an na ka o me na li'eli ya sa'an. Tuumbe'ed dim ne potenda ayi yi dima! Piemi ya nu'us ne ya sunya. 9Kaasimi ka fabil ne susa'aŋ. Tiakimi ya la'ab ka li lieb kaasig, ka ya sumalisim lieb susa'aŋ. 10Sigisimi ya meŋ Wina'am tuon ka o na du'osi ya. 11M ba'abiise, da pian'ade be'ed n tisidi taaba. One pian' be'ed n tisid o tiraan bee kat o saria, o pian'ad be'ed n tisid wada la ka kat li saria. Fu ya'a kat wada la saria, fu pu dol wada laa, amaa fu ane wada la saria kat. 12Wina'am ma'aa a one tisid wada ka a sariakat. On ma'aa na nyaŋe tis nyovur ka sa'am li. Ka fu ten'es ka fu aa ano'one n na kati fu tiraan saria? 13Kelisimi! Yanam bane yet ye, “Zina bee beog ti na keŋ teŋ kaŋa n di yuum anina ka tolum n nye nyood la.” 14Hale ya zi' ya nyovur n saa na a si'em beogo. Ya wenne kpaandug n nyeti yina ka li niŋ bi'ela ka li leb la. 15Li su'um ka ya yiti yel ye, “Wina'am ya'a bood, ti na voe ka tum ne'eŋa ne ne'eŋa.” 16Amaa ya pa'ane ya meŋ ka mor nyeesim. Tita'alim bama wusa ane bunbe'ed. 17On mekama mi' line a tuumsuma, ka pu niŋi lii, o tum tuumbe'ed.

will be added

X\