JEMES 3

1M ba'abiise, da bood ye ya tita'am a pa'aniba. Bozugo ya mi' ye tinam bane a pa'anib la ba na ti kadi ti saria ka li kpi'em. 2Ti wusa tum line pu tu'ale bedego. So' ya'a pu pian' line pu tu'ale, o sid ane ninsuŋ ameŋa. O na nyaŋ ke ka o niŋgbiŋ wusa tum line a su'um. 3Ti ya'a lia widi ne saliba ye ba niŋi ti boodim, ti nyaŋedi ba niŋgbina wusa ka ba niŋ tiname bood si'el. 4Gosim aaruma titada a si'em, hale la'am ne ban bedim la ka pebisim da'adi ba ka ba ken la, ba tun'e nweligi li ne dabil ka li keŋ one ga'ad la n bood zin'isi'a. 5Ninsaal zilim me wenne ala, li a fiinn nwa niŋgbiŋin, amaa ka nyaŋed pian'ad nyeesim pian'ad. Gosim bugum bi'ela na nyaŋe la'aŋ sian'atita'ar. 6Zilim wenne bugum ne. Li mor tuumbe'ed buudi wusa ti niŋgbina ni, ka ket ka tuumbe'ed sa'ame ti niŋgbiŋ wusa. Sutaana ket ka zilim pian'ad be'ed ne tuumbe'ed wusa. 7Ninsaal na nyaŋe milis niis ne bunkonbid bane ken ne noba, ne bane vuud ne bane be ku'omin wusa. Saalib pun nyaŋ milis bama sa. 8Amaa ninsaal kae' na nyaŋe milis o zilim ne. Li pe'el ne pian'abe'ed wenne yabig ne. 9Ti more zilim pu'usidi ti Zugsob one a ti Ba' la bareka, ka lem more li po noor tisid taaba, bane ka Wina'am maal wenne o meŋ la 10Nid yinni na'asid Wina'am ka lem po noor tisidi o tiraan. M ba'abiise, li pu su'um ka li a ala. 11Ku'osuŋ ne ku'otoog na nyaŋe yi bulnoor yinni ni naa? M ba'abiise, ka kekaŋ na nyaŋe wel ta'ama? 12Bee ganya tiig na nyaŋe wel kekama? Ala zug bulig kane bul ku'otoog me ku nyaŋe bul ku'osuŋo. 13Ano'one ten'es ye o mor ya'am ne baŋire ya sooginee? On pa'alimi li ne o tuumsuŋ line ka o tum ne sumbugusum ne ya'am la. 14Amaa ya ya'a mor fufum ne nennim ya da nwe'e ya nyo'og ka ma'a ziri n zan'as yelsida laa. 15Ne'eŋa ka' ya'am kane yi arazana ni na. Li ane dunia ne Sutaana bun. Ka li ka' Wina'am bunne. 16Fufum ne nennim ya'a be zin'isi'a, daamug ne tuumbe'ed ne li buudi wusa na be anina. 17Amaa niŋkane ka o ya'am yi Wina'am sa'an la, na a nyain, ka lem mor sumbugusum ka a baanlim, ka zot nidib nimbaanlig, ka suŋid nidib bedego, ka tum tuumsoma bedego, ka pu gaansida ka a sida sob. 18Zabpansid bane but ne sumalisim la, bun ne popielim biis.

will be added

X\