JEMES 2

1M ba'abiise, da dol ti Zugsob Yesu Kiristo, ka lem mor baragaŋaa. 2Li ya'a wenne arazak daan one pid salima baans ka ye fusuma n kpen' ya la'asugin na, ka noŋdaan me ye kparikeend n kpen'e na, 3ka ya tis one ye fusuma la na'asi ka yel o ye, “Naa, zin'inim kpela,” amaa ka yel noŋdaan la ye, “Zi'enim anina” bee “Zin'inim teŋin.” 4Ya pu mor baragaŋi ya soogine? Ka ya pu mor poten'ebe'ed n lieb saria katibaa? 5M ba'abinoŋa, kelisimi. Wina'am gaŋ bane a noŋdim dunia kaŋa nwa ni, ye ba niŋ o yadda su'uŋa ka na di'e na'am kan ka o da zi'el bane noŋ o la. 6Amaa ya ne'esid noŋdim. Ka'a araza'as dimi namisidi ya ka gban'adi ya n ken saria katib tuone? 7Li ka' bane sa'amid Wina'am yu'usuŋ kane ka o tisi ya laa? 8Ya ya'a siaki tum Wina'am so'olim wada line sob Wina'am gbauŋin ye, “Noŋim fu tiraan wuu fu noŋi fu meŋ si'em la” fu tum line a su'um. 9Amaa ya ya'a mor baragaŋ, ya tum tuumbe'ed. Ka wada la na pa'ali ya ye ya tum taal. 10On wusa siak n tum wada la yel si'el wusa, ka sa'am wada la yinni, o sa'ami li wusa. 11Wina'am one yel ye, “Da sa'am po'a la,” on me lem ye, “Da ku nida.” Hale fu ya'a pu sa'am po'a ka ku nid, fu ane one sa'am wada la. 12Pian'ami ka tum wen wuu nimban ka ba na kadi ba saria n dol wada la suer line tisid yolisim la. 13Wina'am ya'a ti kad saria, o ku zo nimbaanlig ne niŋkane pu zot o taaba nimbaanliga. Bozugo nimbaanlzoor nyaŋed saria kadib. 14M ba'abiise, li su'um a bo n tis dau kane yel ye o niŋid Wina'am yadda ka o tuuma pu pa'ali lii? Yadda niŋir kan na tilig o bee? 15Li ya'a wenne ya ba'abiig be ka ka' fuugo, ka pu mor diib na dii, 16li su'um a bo ka ya yinni yel o ye, “Kem ne sumalisim, n di su'uŋa ka pil fuug ka waad da kpen' fu” ka lee pu tis o, o niŋgbiŋi bood si'el la. Li suŋir a bo? 17Ala men ka yadda niŋir gullim ka tuuma kae' me a zaalim. 18Ka so' na yel ye, “Fun mor yadda ka mam mor tuuma.” Pa'alim man fu yadda niŋir ka li tuuma kae', ka man na pa'al uf man yadda niŋir ne m tuuma. 19Ya siak ye Wina'am yinni ma'aa be. Li a su'um. Hale kikiris me siak li ka kirid ne dabiem. 20Yalim nwa. Fu bood ye fu baŋ ye yadda niŋir ma'aa ka tuuma kae' pu mor nyoode? 21Ti yaab Abraham da niŋ wala n lieb popielim sob Wina'am tuone? Li ane o tuuma poogin, on da zaŋ o biig Isaak ye o ku maal maan n tis Wina'am la. 22Fu nye o yadda niŋir ne o tuuma la'am tum ne taaba. O tuuma la ke ka o yadda niŋir la paae li ben. 23Ka line sob Wina'am gbauŋin niŋ ameŋa ye, “Abraham da niŋ Wina'am yadda ka Wina'am gosi o yadda niŋir ka ye o ane popielim sob o tuon.” Ala zug ka Wina'am buol o ye o zua. 24Nid tuuma na ke ka o lieb popielim sob Wina'am tuon ka li ka' o yadda niŋir ma'ane. 25Ala mene, li da ane wala ne po'agoondir one ka ba buon Rahab la. O tuuma zug ka o da lieb popielim sob Wina'am tuon, on daa di'e Jew dimi daa tum nidib ye ba keŋ labis baŋ teŋ la, ka o su'a ba o yin. Ka yiisi ba ka ba toom suer n kul la. 26Niŋgbiŋ naan be ka siig kae' ka li a zaalim la, ala men ka yadda niŋir ya'a be ka tuuma kae', li ane zaalim men.

will be added

X\