JEMES 1

1Man Jemes one a Wina'am ne ti Zugsob Yesu Kiristo tumtum la sobid gbauŋ kaŋa nwa n pu'usid Wina'am nidib bane widig teŋ teŋ la. 2M ba'abiise ne Yesu Kiristo yelaa, makir kon'ob kon'ob ya'a paae ya, yanam ten'esim li yela ka mor sumalisim; 3ka ya mi' ye ya yadda niŋir makir puugin ket ka ya nyaŋe modigid. 4Keli ka ya sumodigir nobugi kpe'eŋ n ti paae li ben, ka gbada kae'. 5Ya'am ya'a pasig so' ya soogin, on sosim Wina'am one tisid nidib wusa ne ya'amseug, ka pu ied gba'ar la, ka o na di'e. 6Ka ya ya'a sos o, asee ka ya niŋ o yadda ka da bi'es baa bi'elaa. On wusa bi'esid la wen wuu mo'ar ku'opila ka pebisim da'ad ka li tuulim si'em la. 7- 8Niŋkan buudi da mor poten'er ye o na di'e si'el Zugsob la sa'anee. O ane potenda ayi sob ne one pu gban'ad yel yinnii. 9Li nar ka ti ba'abiig one a noŋdaan mor sumalisim bozugo ba na du'os o. 10Ka kpan'amdaan me mor sumalisim ba ya'a sigis o, bozugo o kpan'am la na gaad wen wuu mood puum n gat si'em la. 11Winig yiti du ka li tuulug ziank mood ka puum la soog, ka li venlim sa'am. Ala men ka kpan'amdaan na kpi, hale ka nan kpen be o tuuma ni. 12Yelsum be ne one nyaŋe modig makir puugin. O ya'a nyaŋ makir la, Wina'am na tis o nyovur zugpibig line a piinkan ka o da zi'el noor n tis bane noŋ o la. 13Makir ya'a paae so', on da yel ye, “Wina'am makidi ma.” Bunbe'ed ku nyaŋe mak Wina'am. Ala zug Wina'am pu makid so'oo. 14So' mekama ya'amleog pan'asid o ka o kpen'ed makirin. 15Ka ya'amleog ya'a tuk poog li du'adne tuumbe'ed, ka li me nobugidi n liebid ku'um. 16M ba'abinoŋa, da ke ka so' ma'a ya. 17Piinsuŋ wusa yitne agol, Wina'am sa'an na, one maal winig ne bunam wusa line ket ka li nied nyain. O pu tiakeda ka kpen aa o naŋ naŋ. 18O meŋ boodim ka o maali ti ne o yelsida pian'ad ye ti a yiiga dim bun lin ka o maal wusa ni. 19M ba'abinoŋa, baŋimi ne'eŋa, so' kam zan'a kelisimi su'uŋa ka pian'ad baanlim, ka o sunf da pelig to'otoo. 20Ninsaal supeen pu tum Wina'am yelsida tuumaa. 21Dinzug basimi line a dian'ad wusa, ne tuumbe'ed line nobugid bedego, ka sie ya meŋ n di'e Wina'am pian'ad kane ka o zaŋi niŋi ya sunya ni la, ka lin na nyaŋe faaenn ya. 22Da ma'a ya meŋ n kelisid Wina'am pian'ad la, ka basi lii, amaa siakim tumi li. 23On wusa kelis pian'ad la, ka pu tumi lii, wenne ninsaal one gos gotiŋin n nye o meŋi a si'em. 24O gosi o meŋ ka keŋ ka tam on pa'a a si'em la. 25Amaa one gos Wina'am wada suŋ kane tisidi yolisim la, ka kpelim mood su'uŋa, ka pu tam on wum si'el laa, ka siaki tumi li, Wina'am na tis o yelsum on tum si'el la yela. 26On wusa ten'esid ye o a one dol Wina'am, ka pu gban'e o noore, o ma'ade o meŋ, ka o Wina'am dolim ane zaalim. 27Wina'am dolim kane a nyain ti Ba' Wina'am sa'an ane a nwa: fun na suŋ kpiibis ne pokonya ba fara poogin, ka da ke ka dunia tuumbe'ed kpen' fu.

will be added

X\