1 Melkizedek nwa, one daa a Salem na'ab ne Wina'am one gat si'el wusa la maalmaan. Abraham n daa keŋ tanpin n nyaŋe na'anam anaasi ka kun na la, Melkizedek tu'os o ka niŋ o zug bareka. 2 Ka Abraham n zabi nyaŋ ka nok la'asieba la wusa, o yiisne yinni piiga puugin n tis Melkizedek. Melkizedek yu'ur la gbin ane ye, “Popielim na'ab,” ka lem a Salem na'ab, ka li gbin ane “Sumalisim na'ab.” 3 Si'el kae' pa'al ye o mor ba' ne ma ne yaanama. Si'el kae' me pa'al o du'am ne o ku'um saŋa, ka o kpelim a maalmaan saŋa wusa wenne Wina'am Biig la ne. 4 Baŋimi Melkizedek n mor kpi'euŋ si'em. Abraham, ti yaa yalin yak tis o yinni piiga wusa puugin line a la'ad line ka ba nok zaba ni la. 5 Ka Wina'am tis noor si'a ye bane a Levi yaas ka me a Abraham yaas ka a Wina'am maalmaanib la, di'es nidibin la ayinni piiga wusa puugin. Ba di'esi ba buudi ni hale baa ban a Abraham yaas la. 6 Ka Melkizedek ka'a ba yaanam yaaŋa, amaa o di'e Abraham sa'an ayinni piiga wusa puugin, ka niŋ Abraham zug bareka, on Abraham one di'e Wina'am nozi'ela la. 7 Li a sida ye one tisid yelsum gat one di'edi li. 8 Ka maalmaanib la yela la, ka bane na kpiid la di'ed yinni pudugir piiga la ni, ka nya'al ka Melkizedek one ka Wina'am gbauŋ sob ye o voe la, me niŋidi ala. 9 So' tun'e yel ye hale Levi meŋ one di'esid ayinni piiga wusa puugin la da yo yinni piiga wusa puugin ka li naan o yaab Abraham nu'usin, n keŋ Melkizedek sa'an, 10 bozugo Melkizedek n da tu'os Abraham la, saŋkan ka Levi nan kpelim be o yaab Abraham poogin. 11 Li da ane Levi yaas bane a maalmaanib saŋa la, ka Wina'am tis nidib la wada. Ka Levi maalmaanib tuuma ya'a da nyaŋe keen ka nidib aan su'um naae, li pu narin ye maalmaan buud si'a kena ya'ase, one ledig Melkizedek zin'igin la ka ka' Aaron zin'iginee. 12 Ka maalmaan yela ya'a tiak, asee ka wada me mor tiaker. 13 Ka ti Zugsob one yela ka ba yel ne'eŋa la, ane Israel dim buud si'a nid, buudi kan nid nan zi' tum maalmaan tuuma. 14 Li a sida ye Zugsob la ane Juda buudi, amaa Moses da pu pudug buudkaŋa yela on da pian'ad maalmaanib yela laa. 15 Ka maalmaan so' one a Yesu kena one wen wuu Melkizedek la, ka maalmaan yela maligim nie nyain. 16 Li ka'ane wada line dol ninsaal du'am yela, amaa li ane nyovur line ka' sa'uŋ la paŋ yela ka o lieb maalmaan. 17 Ka Wina'am gbauŋ yel ye, “Fu na ledig Melkizedek zin'ig n a maalmaan saŋa wusa.” 18 Yel yinni ane ye, noyelug kudug la pu kpi'emaa, ka ka' tumire ka pu ket ka si'el si'el a su'um la zug, ka Wina'am basi li. 19 Moses nozi'elug la da pu nyaŋe ke ka si'el si'el a su'uŋa. Amaa ti'ir suŋ line ke ka ti li'el Wina'am kena. 20 Wina'am da po ne gaŋ o. 21 Ka bane deŋim lieb maalmaanib la da pin'ili ba tuuma ka poor kae'. Ka Wina'am maal Yesu ka o a maalmaan ka yel ye, “Zugsob la poya ka ku tiake o poten'ere. Fu ane maalmaan saŋa wusa.” 22 Ne'eŋa ke ka Yesu zi'e ti nya'aŋ n a nonaar suŋ. 23 Ka maalmaan kuda la da ane babig, ka ku'um yela ka ba pu kpelimi ba tuuma la nii. 24 Ka Yesu n pu kpiid la o a maalmaan saŋa wusa. 25 Dinzugo ban wusa ken Wina'am sa'an na, ka li yi ne Yesu ma'asim zug o nyaŋe faandi ba wusa. Bozugo on voe la, o be Wina'am tuon n nwe'ed Wina'am nu'ug ba zug. 26 Li nar ka ti mor maalmaan kpeenm wuu oŋa nwa, one a nyain ka gba'ar ne dian'ad kae', ka fuue o meŋ yiis tuumbe'ed dim zin'igin, ka Wina'am du'os o gaad saŋgbauŋ. 27 O pu wenne maalmaan kpeenm bamma, bane ka li nar ye ba maal maana daar wusa ba meŋ tuumbe'ed yela yiiga, ka nyaan yuolim maal nidib yela la. On lee nokne o meŋi maal maan ba tuumbe'ed la zug vuguri. 28 Wada la gaŋ dap bane tuumsoma po'og ka ba a maalmaan kpeenmnam. Amaa Wina'am poor yela line yuolim kena la gaŋ Biig la one a su'um saŋa wusa la.
