HIBIRU DIM 6

1Dinzugo Kiristo pa'alug kan ka ti daa zamis pin'ilugin la, ti basimi tiname da a si'em pin'ilugin la, ka niŋ Wina'am yadda, ka keŋ tuon n nobug ka da kpelim wenne ti pin'ilne n bood ye ti paam tiaker ti tuumbe'ed yela laa. Ka da kpelim be tuum kane ta'asid ku'um laa. 2Ne ku'om suub pa'alug ne nok nu'us paal nidib zutin yela, ne ku'um vu'ugir yela, ne sariakadib yela line ka li saŋa ka' ben la yela. 3Wina'am ya'a siak, ti na niŋ ala. 4Ka bane da wum Wina'am labasuŋ ka baŋi li, ka nye o piini, ka di'e o Siig Suŋ, 5ba mi' Wina'am labaar yelsum ne tuumkpi'ema paŋ line na ti kena la, 6ba yadda ya'a lu, ba ku nyaŋe len leb na n tiake bas ba tuumbe'ed la ya'ase, bozugo ba na lem kpa' Wina'am Biig la ku'um dapuudir zug ka diis o nyan nidib soogin. 7Teŋ kane di'ed saku'om line niid bedego la, teŋ kan du'adi biis tisid kpaadib ka ba nyet Wina'am yelsum. 8Ka teŋ kane yit gon'os ne mobe'ed, li ka' nyoode, li pu lal ne nopoore. Ka li ba'asug ane bugum na dii li. 9M zuanoŋa, hale baa ti pian'ade anwa, ti mor sukpi'em ne ya, ka mi' ye ya mor yelsum line dolne faangir. 10Ka Wina'am ka' ziri soba na tami ya tuuma ne noŋir line ka ya niŋ o yela n tisi o nidib ka nam kpelim niŋid la. 11Ka ti bood hale ye ya yinni yinni maal ala men ne nimmua ka ya mor ti'ir ka pu bi'esida n ti paae li ben. 12Ti pu bood ye ya mor gbanya'am, amaa wenne ne ya taaba bane niŋ Wina'am yadda, ka modig ka di'e Wina'am nozi'el kan ka o digil la. 13Wina'am n da zi'el noore n tis Abraham la, ka so' kae' n gat on Wina'am la zug, ka o noki o meŋ n po noor, 14ka ye, “Asida, m na niŋi fu zug bareka ka fu yaas na ti a bedego.” 15Ka Abraham da modig ka di'e Wina'am nozi'el la. 16Ka ninsaal ya'a ye o po noor, o pood ne one gat o la, ka li gu'e noŋgban nwa'ar wusa. 17Wina'am da bood ye o nie li nyain n pa'ali bane na di'e o nozi'el la, ye o kudum ku tiake o yelug la, linzug ka o po n pe'es o nozi'elugin la. 18Ka yelbama ayi nwa bane pu tun'e tiakeda, ka ban yela ka Wina'am ku ma' baa bi'ela. Dinzug ka tinam bane zo keŋ o sa'an ye o faaenn ti la na mor sukpi'euŋ ye ti mor ti'ir ne line digi ti tuon la. 19Ti ti'ir kaŋa nwa wenne aaruŋ kpa'are ba' ku'omin kaŋ kaŋ si'em la. Ka one yela ka ti mor ti'ir la ane Yesu. One paae Wina'am zin'igin la. 20Ka Yesu lieb maalmaan kpeenm saŋa kane ka' ben la n ledig Melkizedek zin'igin la. Ka ti ti'ir be o ni, ka o zi'e ti noba zug n gaadi ti tuon n kpen'ed Wina'am zin'igin la.

will be added

X\