HIBIRU DIM 5

1Ba gaŋ maalmaan kpeenm ninsaalib buudi wusa soogin ye o zi'eni ba noba zug, ban ne Wina'am soogin n tis piini ka maal maan n tis Wina'am ba tuumbe'ed yela. 2Ka o na tun'e zo ba nimbaanlig ne bane pu baŋi ne bane yidig la, on meŋ pu kpi'em ka lut tuumbe'edin la zug. 3Ka li nar ye o maal maana tis Wina'am o meŋ tuumbe'ed zug la'am ne nidib la tuumbe'ed. 4Ka so' pu du'osidi n gaŋidi o meŋ ye o a maalmaan kpeenm, amaa Wina'am gaŋid o wuu on da gaŋ Aaron si'em la. 5Ala mene Kiristo da pu du'osi o meŋ ye o lieb maalmaan kpeenm, amaa ka Wina'am da gaŋ o, ka yel o gbauŋin ye, “Fu aa m Biig, ka zina ka m lieb fu Ba'” 6Ka lem yel o zin'isi'a ye, “Fu ane maalmaan saŋa wusa, fune ledig Melkizedek zin'ig la.” 7Ka Yesu n da be dunia nwa ni saŋsi'a la, o sos ka belim Wina'am one mor paŋi na tun'e faaenn o kum zin'igin, ne tansug bedego ne ninto'om. Ka on na'as Wina'am la zug ka o wumi o sosug la. 8Hale baa on a o Biig la, o zamis noyelug siakiri o namisugin. 9Ka on lieb su'um naae la zug ka faangir line ka' naar la yiti o sa'an na, n tisid bane wusa siakidi o noyelug la, 10ka Wina'am nok o pa'al ye o a maalmaan kpeenm one ledig Melkizedek zin'ig. 11Ti mor pian'ad bedego yelkan yela, amaa li toe ne man na pa'ali ya si'em ka ya baŋ nyain, bozugo ya ma'as ne zamisug. 12Ka saŋa paaeya ka li nar ka ya a pa'anib, ka ya nan kpelim bood ye ba lem pa'ani ya Wina'am yela yiiga pa'ala la, wen wuu biise bood bin'isim ka ka' digan'alug la. 13Ka one mekama mu'ad bin'isim ane biig ka nan ka' ya'am na baŋ yelsida yela. 14Ka bane bi' la dit digan'alug, bozugo ba zamisne n mi' line a su'um ne be'ed.

will be added

X\