1 Dinzugo keli ka ti zo dabiem ka ya so' da wenne o gu'uŋ Wina'am vu'usum zin'igin kpen'ebo saŋkan ka o nozi'el la nan be la. 2 Ka labasuŋ la paae ti sa'an na wenne labasuŋ paae ba sa'an si'em la, ka labakan ka ba wum la pu mor nyoodi ba nii, bozugo ban wumi li la pu di'e li ne yadda. 3 Ka tinam bane niŋ o yadda la kpen'ed o vu'usum zin'igin wuu on yel si'em la ye, “M sunf da peligeya ka m po noor ye ba kudum ku kpen'e m vu'usum zin'iginee.” O yel ne'eŋa hale baa ne o dunia maalug tuuma la naae la. 4 Ka o gbauŋ la yel zin'isi'a dabis kane a Yopoi Daar la yela, ye, “Ka Wina'am da vu'us o tuuma wusa zin'igin, dabis kane a Yopoi Daar la.” 5 Ka o lem yet kpela ya'as ye, “Ba kudum ku kpen'e m vu'usum zin'iginee.” 6 Li kpelimne ye sieba kpen'e li ni, ka bane da deŋim wum labasuŋ la gu'uŋ kpen'eb ba zan'asug la zug, 7 ka Wina'am lem gaŋ dabis si'a ya'as ka li buon ye Zina. Ka na'ab David da pian' li yela yuma bedego line gaad la wenne lin daa deŋim yel la ye, “Zina, ya ya'a wum Wina'am kukor, da endi ya tobaa.” 8 Bozugo Josua ya'a da tisini ba vu'usum zin'ig, Wina'am da ku lem pian' dabis si'a yela ya'ase. 9 Ka lin a si'em la, vu'usum dabis si'a kpelim be Wina'am nidib la yela. 10 Dinzugo one kpen'ed Wina'am vu'usum zin'igin la me na vu'us ne o meŋ tuuma wenne Wina'am n da vu'usi o tuuma ni si'em la. 11 Dinzugo ti kpe'eŋimi ti meŋ ka kpen' vu'usum zin'igin la, ka so' da tuas bane da zan'as ka gu'uŋ kpen'eb laa. 12 Ka Wina'am pian'ad la voene ka tum. Li pulim ka diti gat zaba su'ug mekama kane dit noya ayi la, ka kunsidne n ti paae siig ne vu'usum ben, wuu su'ug la kensid niŋgbina sun'ula ne konba poogin biim si'em la. Ka pian'ad la pa'an nidib potenda a si'em. 13 Ka Wina'am maal si'el wusa la ku nyaŋe sua'a o sa'anee. Li wusa digne paalo ni, one tuon ka li a tilas ye ti zi'en n tu'as ti yela la. 14 Ka tiname pun mor maalmaan kpeenm tita'ar one a Wina'am Biig, Yesu, ka deŋim gaad arazana ni la, ti gban'ami ti yadda la kiŋ kiŋ. 15 Ka ti mor maalmaan kpeenm one zoti ti nyoog ne, tiname pu kpi'em la yela, ka o da nye makir buudi wusa wenne tiname nye si'em la. Ka la'am ne wala o pu tum tuumbe'ede. 16 Dinzug keli ka ti li'el o yelsum na'am gbauŋ la ne sukpi'euŋ ka di'e o nimbaanlzoor bareka la, ka li suŋi ti, ti yelpakir saŋa.
