1 Dinzugo li nar ka ti gban'e tiname wum yelsida la su'uŋa, ka da basi lii. 2 Ka pian' kan ka maleknam da yel la ya'a pu lu teŋa, ka one zan'as ka pu doli lii na di'e namisug line nar o. 3 Ka ti ya'a ne'es Wina'am faangir tita'ar nwa, ti na niŋ wala pons namisug la? Zugsob la da deŋim pian' faangir la yela yiiga, ka bane wumi li la pa'ali ti ye li a sida. 4 Ka Wina'am me pa'al ye li a sida, ne tuumnyalima ne tuumkpi'ema buudi buudi ne o Siig Suŋ piini line ka o pudugidi li ne o meŋ boodim la. 5 Ka Wina'am pu ke ka maleknam so'e dunia line ka o da nan ye o maal ka ti pian'ad li yela laa. 6 Li sob Wina'am gbauŋin zin'isi'a ka so' yel ye, “Ninsaal a bo, ka fu ten'esidi o yela? Ka ninsaal biig a bo, ka fu gosidi o yelle? 7 Fu maal o ka maleknam gaad o ne bi'ela, ka fu yu'un pid o na'am zugpibig ne na'asi, 8 ka ke ka o so'e si'el wusa.” Ka on ke ka ninsaal so'e si'el mekama la, o pu bas si'el ka li ka'a o so'olim. Ka lin a si'em la, ti nam pu nye ka o so'e si'el mekamaa. 9 Amaa ti nye Yesu, on ka Wina'am sie n gaad maleknam saŋa bi'ela la, ka o yu'un pid na'am zugpibig ne na'asi, ku'um namisug la yela. Ka li ane Wina'am popielim ke ka o kpi n tis so' mekama yela ka nye na'asi la. 10 Li su'um ye Wina'am one maan ka gosid si'el wusa la, ke ka Yesu one aa ti faangir la a su'uŋa one namis la yela ye, Wina'am zaŋ o biis bedego ka ba kpen'e o na'amin la. 11 Ka on ne nimbane ka o maal ka ba a popielim dim la, babayi wusa mor Ba' yinni. Dinzug ka o pu zot nyan ye on na buoli ba ye o ba'abiise. 12 Ka yel Wina'am ye, “M na pian' fu yu'ur la tisi m ba'abiis, ka na yuum yuma pian' fu yu'ur fu nidib bedego tuon.” 13 Ka lem ye, “M na tie ne Wina'am.” Ka lem yel ya'as ye, “Mane nwa be ne Wina'am biis bane ka o tisi m la.” 14 Ka biis la wusa sadigim mor niŋgbiŋ ne ziim kaŋa nwa, on meŋ da mor niŋgbiŋ kan la men, ye o kum la yela ka o na nyaŋe sa'am Sutaana one mor paŋ na so'e kum 15 ka tis bane ka kum zotim yela ke ka ba a yamis ba beilim wusa ni la yolisim. 16 Ka li a sida ye o ba'a kae' ne maleknama, amaa Abraham yaas ka o ba'a be ne ba. 17 Dinzug ke ka o maal o meŋ wenne o ba'abiis ne, yel mekama wusa ni, ye o lieb maalmaan kpeenm n mor yelsida ka zot nimbaanlig Wina'am tuuma ni, n maan ye Wina'am bas o supeen o nidib tuumbe'ed yela. 18 Ka Sutaana daa ye Yesu maal si'el ka o gos ka pu nye la zug, ka Yesu na tun'e suŋ bane be pan'asugin la.
