HIBIRU DIM 12

1Dinzugo nidib bedego bane modig namisugin sadigim giligi ti la, keli ka ti me basi zetebisa ne tuumbe'ed line gban'e ti kiŋ kiŋ la, ka modigi zo zoos line be ti tuon la. 2Ka gosid Yesu one a ti yiiga sob ti yadda niŋir yela ne one naadi li la. Sumalisim line digi gur o la zug ka o modig dapuudir la zug, ka pu zoo li nyane, ka yu'un zin'i Wina'am na'am gbauŋ datiuŋ. 3Ten'esim o yela a si'em, tuumbe'ed dim bedego daa ki'is o, ka on modigi n nyaŋ la, da geenn ka ya sunya buke. 4Ya zabid tuumbe'ed yela hale ka pu zot ne ban na kuu yaa. 5Da tam sa'alug line be Wina'am gbauŋin line kpemisidi ya wuu saamnami sa'al ne ba biis si'em la ye, “M biiga, more Zugsob la sa'alug ne nimmua ka da ke ka fu suunr sa'am, o ya'a tansi fu. 6Bozugo Zugsob la sa'ane bane ka o noŋ la ka namisid on mekama ka o di'e la wuu o biig ne.” 7Siakimi namisug wuu ba' mugusidi o biis si'em la, bozugo ya namisug la pa'al ye Wina'am sa'al ne ya wuu o biis ne. Biig be yaa ni, ka o saam pu sa'an oo? 8Ba ya'a basi ya ka pu sa'ani ya wuu ban sa'an biis wusa si'em laa, ya ka'a o meŋ biise, ya ane tampiinb. 9Ti ninsaalib ba'anam sa'ali ti, ka ti tisi ba na'asi. Ka li nar ye ti siaki ti Ba' Wina'am noor hale bedego gaad ti ba'anam noya la. Bee m ma'anee? 10Ba meŋ boodim ka ba sa'ali ti saŋa bi'ela. Amaa on sa'ani ti ne ti meŋ suŋid yela ye ti a popielim dim wuu on ne. 11Ka sa'alug saŋa la ka li zabidi ti ka pu malis tii. Li nya'aŋ ka li nyood a sumalisim line yit popielim ni na n tisid bane ka o sa'ali ba la. 12Dinzugo ugusimi ya nu'us bane a zela la, ka kpe'eŋi ya duma bane buk la, 13ka maal popielim suere n dol, ka bane yadda niŋir pu zu'e la, ka nwaas wuu wabis la da pon'olim naae, ka lee nyene laafe. 14Kpe'eŋimi ya meŋ n nye sumalisim ne nidib wusa, ne popielim. Ka popielim ya'a ka'asige, so' ku nye Zugsob laa. 15Baŋimi ka so' da gu'uŋ Wina'am popielim piini la di'ere, ka so' da mor putoog line daamid nidib bedego. 16Ka so' da tum dian'ad tuuma bee pu dol Wina'am suere wuu Esau one da zaŋi o kpeenm faar n kuos diib yinni yela laa. 17Ka ya baŋ ye lin nya'aŋ ka o bood ye o di'e o kpeuŋ faar ka o saam zan'as o la, o pu nyaŋe tiak line ka o gban'e laa, hale baa on zigi li ne nimmua la. 18Ka ya pu kenne line ka ninsaal na tun'e si'is, wuu Israel dim da keŋ Sinai zuer baba la. Ba nye bugum tita'ar ne lik ne zibisug ne sisi'em 19ka wum na'atana vuud ne kukor kan ka nidibi wumi li ka belim ye li da lem pian' labaar ya'asi n tisi baa. 20Ka ba ku nyaŋe modig noyelug lin ka ba di'e laa ye, “Hale baa bunkonbug ya'a si'is zuer la, ban lom o ne kuga n ku o.” 21Ban nye si'el la da toe hale, ka Moses yel ye, “M zot dabiem ka kirid.” 22Amaa ya kenn Zion zuerin line a Wina'am one voe la teŋ, ka a Jerusalem ameŋa line be arazana ni na. Ka anina ka maleknam bane ka' ben la, be, ka la'as n di'em di'ema. 23Ka bikpeenmnam bane mor kal arazana ni me la'ased anina. Ka Wina'am one a si'el wusa sariakat ka so'e si'el mekama la, ne popielim dim siis bane ka ba maali ba su'um naae la me be anina. 24Ka Yesu one a nonaar paal nu'unwe'ed la one ziim zu'as, ka li pa'al line a su'um n gat Abel ziim a si'em la. 25Baŋimi ka da zan'as one pian'ad laa. Ka bane zan'as one sa'ali ba dunia ni la sadigim pu nyaŋe luak namisug la, ti na niŋ wala yu'un luak namisug ti ya'a zan'as one be arazana ni n sa'ani ti la? 26O kukor la da ke ka teŋ mi'im, ka nannanna o nozi'el la kpelim be ye, “M na lem mi'im dunia noor yinni ya'as, ka ka'ane dunia ma'anee, amaa la'am ne saazug.” 27Pian'agiŋ kaŋa nwaa line ye, “Yinni ya'as la,” pa'al ne ye line ka o maal la na naae. O ya'a mi'im, ka line ku tun'e mi'im la na kpelim. 28Dinzugo keli ka ti sunya ma'ae ne o; ka tiname na di'e na'am so'olim line ku tun'e mi'im la, keli ka ti pu'us Wina'am bareka ne na'asi ne dabiem, 29bozugo ti Wina'am ane bugum kane kanbid.

will be added

X\