HIBIRU DIM 11

1Yadda niŋir zug ka ti mor ti'ir ne line ka ti gur la ne line ket ka ti mi' bun lin ka ti pu nyet ne nini la yela. 2Ka li da ane kudumin dim yadda niŋir yela ka Wina'am da tisi ba pian'asuŋ. 3Yadda niŋir zug ka ti baŋ ye Wina'am maal dunia ne o pian'ad, ka bun kane ka ti nyet la, ka'ane bun line da be ka nidib nyeta. 4Yadda niŋir zug ka Abel da maal maan n tis Wina'am, ka li a su'um n gaad Kain maan la. O yadda niŋir zug ka Wina'am di'e o piini la ka tisi o pian'asuŋ ye o a popiel sob la. Ka o yadda niŋir zugo, hale baa on kpi la, ba kpelim tiendi o tuuma yela. 5Yadda niŋir zug ka Wina'am da nok Enok du agol ka o pu kpii, ka ba da pu nye oo, on da nok o la zug. Ka on da nam pu nok o la, ka Wina'am yel ye o tuuma ma'ed o suunr. 6Ka yadda niŋir ya'a kae', so' ku nyaŋe ma'ae Wina'am suunre. Ka one bood ye o li'el Wina'am, asee o siak ye o be, ka me siak ye o na tis bane ied o ne yelmeŋir la ba yood. 7Yadda niŋir zug ka Wina'am da deŋim sa'al Noa ne nimmua ne yelbane ka so' nan zi' nye la, ka o siaki maal aaruŋ tita'ar n faaenn o yidim la. Noa yadda niŋir tuuma pa'al ye dunia dim ka'a su'um. Ka o di'e nozi'elug line a popielim ka yi o yadda niŋirin la. 8Abraham yadda niŋir zug ka Wina'am da buol o la, ka o siak Wina'am noor ka yi keŋ teŋ kan ka o na ti di'e digil o yaas ka li a ba faar, hale baa on da zi' one ken teŋsi'a ni la. 9Ka yadda niŋir zug, ka Abraham daa kpen' teŋ kan ka Wina'am da pu'ulum tis o la wuu o ane saan n be teŋzuŋin ka ti' fuug doog n be la. Isaak ne Jakob me daa di'e faar kan la. 10Ka o mor poten'er ne teŋ kan ka li eenbir kpi'em. One maan teŋ la ka ba meed, ne one meedi li la, a Wina'am. 11Yadda niŋir zug ka baa Abraham n daa kudug, ka o po'a Sara a kundu'ar la, o daa nyaŋe du'a, on daa mi' ye Wina'am one zi'el noor la a sida sob la zug. 12Dinzug ka dau nwa, one kudug ka pu lal ne ku'um, ka yaas bedego yi o ni na n a bedego wuu nwadibibis la, ka len a wuu mo'ar noorin titanbiise la. 13Ka nimbama wusa kpine ne yadda niŋir ka nam pu di'e nozi'ela laa, amaa ka nyee li lalli, ka ba sunya malis, ka siak ye ba da a saam ne zooma dunia ni. 14Ka bane siakid anwa la, pa'al ye ba iedne ba meŋ teŋ. 15Ba ya'a da ten'esid teŋ kan ka ba yi la na, ba naani moren suer ye ba leb ani. 16Ka lin a si'em la, ba boodne arazana line a teŋsuŋ hale la. Dinzugo, Wina'am pu zot nyan ye ba buol o ye ba Wina'am, on ti'eb teŋi tisi ba la zug. 17- 18Ka yadda niŋir zug ka Abraham da nok o biyimir, Isaak, ye o maal maani tis Wina'am on da tis o noor ye o mak o la. Li ane Isaak on yela ka o di'e nozi'el la ye, o yaas na yi ne Isaak sa'an na la. Ka o sin ka nok o ye o maal maan. 19Abraham da mi' ye Wina'am na tun'e vu'ug Isaak kumin. Wuu pian'ad wen ne, Abraham da di'e Isaak kumin. 20Ka yadda niŋir zug ka Isaak tis Jakob ne Esau wusa yelsum. 21Ka yadda niŋir zug ka Jakob tis Josef biis ayi yelsum, on da bood ku'um la, ka zaŋi duore tik n sunri n sosid Wina'am la. 22Yadda niŋir zug ka Josef, on da bood ku'um la, ka yel Israel dim ye ba na ti yi Egipiti teŋin la, ka zi'el noor ye ba ya'a ti yit n lebidi ba meŋ teŋin la, ban nokim o niŋgbiŋ n mum anina. 23Ka yadda niŋir zug ka ban da du'a Moses la ka o ba' ne o ma sua'a o nwadis atan'aŋa, ban nye ka o a bivenliŋ la, ka pu zot dabiem na'ab wada yela la. 24Yadda niŋir zug ka Moses, on da nobug la, ka zan'as ye ba da buol o na'ab Faaro po'ayua biiga. 25O gaŋ ye o la'am namis ne Wina'am nidib n gat ye o nye tuumbe'ed malisim line pu ya'asid naare. 26Ka siak ye ba ya'a tu' on Kiristo zug, li a su'um n gat kpan'am line be Egipiti teŋgbauŋin wusa, bozugo o mor poten'er ye o yood be tuon. 27Ka yadda niŋir zug ka o bas Egipiti ka pu zot dabiem ne na'ab la supeene, ka da modig, bozugo o nye one ka ninsaalib pu nyet ne ba nini la. 28Yadda niŋir zug ka o maal ku'um malek gaadug maan, ka zu'as ziim la ye malek one kuud bikpeenmnam la da ku Israel dim bikpeenmnama. 29Ka yadda niŋir zug ka Israel dim da lo'oŋ Ateuk Zen'ug la wen wuu ku'omi kpin'ei ka ke teŋ la kpi'emis si'em la, ka Egipiti dim me tu'as ye ba lo'oŋ ka ku'om la dii ba. 30Yadda niŋir zug ka Jeriko teŋ zaŋguom beda la lu, saŋkan ka Israel dimi da keŋ giligi teŋ la daar wusa noor yinni keŋ paae daba ayopoi. 31Ka yadda niŋir zug ka Rahab one da a po'agoondir la tilig, on da di'e nimbane kena ye ba labisi gos Jeriko teŋ la, ka pu kpi wenne bane da zan'as laa. 32Ka m na yel bo ya'ase? M ka'a saŋa na pian' Gideon ne Barak ne Samson ne Yefta ne David ne Samuel ne Wina'am nodi'esidib la yelaa. 33Yadda niŋir zug ka ba nyaŋ na'anam so'olim, ka so'e nidib ne yelsida, ka di'e nozi'ela, ka kpar gbigima noya, 34ka buk bugum la paŋ, ka pons ne zaba su'uraug, ka nye paŋi ba tadimisin ka lieb paŋ dim zaba ni, ka nyaŋ saam zabzabidib. 35Ka po'ab len di'e ba nidib bane kpi ka vu'ug la. Ka sieba namisid bedego ka zan'as ye ba paam yolisug, bozugo ba bood ye ba ti vu'ug kumin ka nye nyovur suŋ. 36Ka ba la'ad ka fi'ebid sieba, ka lo sieba more kpen'es sarega ni, 37ka lob sieba ne kuga n ku, ka nok kampenta su'ugo son' sieba n ku, ka ku sieba ne su'uraad. Ka sieba yirid ka ye' pe'es ne buus gbana, ka pu mor si'el si'ela, ka di fara ne namisug. 38Ba ane bane ka dunia la pu nar ne ba laa, ka yiridne moogin ne zueya ni ka gbeend bunbo'adin ne tampiilema ni. 39Hale baa ba yadda niŋir yela ke ka ba nye yu'usuŋ la, ba so' pu di'e Wina'am nozi'el laa. 40Ka Wina'am pun deŋim maal bunsuma tisi ti la, ye li ya'a ka'ane ti yelaa, ba ku lieb bunsuma ameŋa ka gba'ar kae'.

will be added

X\